VOV4.K’ho- Jat jơnau đơs bơh Sở Văn hóa, Thể thao mờ Du lich càr Đồng Tháp dê, bơdìh mờ ală tiah gam bơtàu tơnguh niam ngan bè nhơl chờ mờ li la ală bơta broă lơh nhơl chờ den gam uă tiah, tàm hơ̆ geh ală tiah tàm tiah nhàr dà lơgar bơh càr dê kung gam ờ hềt ngui jơh bơta pràn, bơta ƀuơn he dê tàm gah do. Kờñ chồl pràn, lơh gơlik bơta niam nàng nhơl chờ tiah nhàr dà lơgar in brồ guh tàm tơngai tus, Sở Văn hóa- Thể thao mờ Du lich càr neh pơgồp bal mờ kơnhoàl Hồng Ngự lam lơh lòt sền, mờ kung lam lơh jat Nghị quyết bơh Hội đồng Nhân dân càr dê, cih bè broă lơh dong kờl bơtàu tơnguh nhơl chờ tàm càr Đồng Tháp tus ală cau dùl nă să, mpồl bal gam bơt bơtàu ală broă lơh nhơl chờ

Famstay “Tơnau dà hìu” bơh bi Tô Kim Thi ơm tàm kơnhoàl Tân Hồng rềp ndo geh uă nac nhơl chờ git tus là dùl anih nhơl chờ pa, niam ngan, gơ hòi gơ jà cau tus tàm tiah nhàr dà lơgar bơh càr Đồng Tháp dê.

Tŭ do, famstay “Tơnau dà hìu” geh 2 cơldŭ geh bơceh mòn jat broă lơh rềp mềr mờ tiah ơm kis, geh lơh mờ dơm chi lơm, tàm dơlam geh rơcang wil tơl phan bơna bơh dùl cơldŭ ơm wơl dê. Kuơmàng, lơh gơ kờñ ngan tus mờ nac nhơl chờ tŭ tus ndo là anih ơnàng, geh suơn biaơ, tơnau dà ròng ka mờ ală phan bơka niam, krơi is ngan: “Bơta tờm he dê tàm do geh dùl hìu gŭ, do là dùl bơta krơi is ngan bơh làng bol kis tàm tiah dà dê, lài do hìu bơnhă añ kung neh geh tŭ kis tàm dà dờng, tàm hìu gŭ bè do, den añ kờñ cèng tus tơnau dà hìu do nàng ală bơyô in gơtùi jòi git ngan ngồn dùl ngai geh kis tàm hìu gŭ bè lơi, jơh ală là añ neh rơcang wơl tơl jơh phan ngui tàm hơ̆.”

Tài tơnau dà ơnàng den tàng ala mờ ơm tàm hìu gŭ tàm dà dờng, tŭ do, nac nhơl chờ gơtùi sền git rài is tàm tiah dà bồ tô Đồng Tháp dê tàm Tơnau dà hìu do tơn. Rềp mờ tơnau dà ròng ka gam geh tơnau dà tam tờm sen mờ bi Tô Kim Thi pà git, gam tam tai suơn chi sa plai kung bè gam lơh sir anih ơm wơl, broă drơng ala jòi git ngan ngồn, drơng sàu sa ai nac nhơl chờ in tŭ ngan ngồn pờ mpồng: “Añ kờñ gơp bơyô tŭ tus ndo den geh ai oh kòn khi dê jòi git ngan ngồn geh tam biap, gơtùi cih wơl ngai, nhai tam nàng geh jơnau tus wơl sĕ còp he tai, hơ̆ sồng gơtùi lòt pik bơkàu sen đah tơnau ne, đì rơkì, pik sen, sơn pàm, đàr ka, tàm do neh rlau 10 nam, ka tàm do geh is uă ngan.”

Famstay Tơnau dà hìu mìng là 1 tàm uă anih tus tàm tiah nhàr dà lơgar Đồng Tháp. Rềp kơnhoàl Tân Hồng, kơnhoàl Hồng Ngự geh 6 anih geh sac rơ wah nàng ai tơlik lài gùng dà tàm tơrbŏ bal bơtàu tơnguh nhơl chờ geh: ƀòn hìu gŭ tàm dà, tiah tam biap ờdo ờdă tàm xã Long Thuận, ală hìu yau neh jŏ rlau 100 nam, hìu duh khoai Long Khánh geh sap sèng tiah tềl kah yau kấp dà lơgar, ƀòn tàñ phan bơh jŏ mờ ƀlàng um dà tàm xã Long Khánh A.

Bulah ờ hềt ngan ngồn geh dờp là anih lòt sền nhơl chờ càr dê mơya tơngai lài, uă nac nhơl chờ tàm lơgar mờ lơgar ndai neh rơ wah tiah do là anih tus tàm broă nhơl chờ he dê. Bè hơ̆ den tàng, gơnoar atbồ tiah do kung neh tơnguh broă lơh atbồ tàm ală anih tus, mờ kung hời rơ hời bơt bơtàu rùp hin nhơl chờ bơh kơnhoàl dê. Ồng Nguyễn Đức Trí, Kuang atbồ Phòng Văn hóa thông tin kơnhoàl Hồng Ngự, càr Đồng Tháp pà git: “Ủy ban Nhân dân kơnhoàl geh jơnau đơng lam ală kấp, ală gah broă lơh, tàm hơ̆ geh gah niam chài pơgồp bal mờ Ủy ban Nhân dân xã Long Khánh A lơh niam broă lơh lài ngan là gàr lơngap lơngai ờdo ờdă, dơ̆ 2 là gàr kloh niam tiah ơm kis. Dơ̆ 3 là lir loh làng khà priă tac tàm ală anih nhơl chờ.”

Bơdìh mờ broă pơlam tai 2, 3 jơnau sổ tàm broă lơh atbồ mờng chài lơh broă ai kấp hơ đơm in, Sở Văn hóa, Thể thao mờ Du lịch kung neh lam lơh ală broă lơh dong kờl bè bơtàu tơnguh nhơl chờ tàm càr, jat nghị quyết sồ 20 bơh Hội đồng Nhân dân càr dê. Mùl màl, geh dong kờl bơcri priă lơh hìu nac ơm ơpah, dong kờl priă cồng ai càn bơcri bơtàu tơnguh broă lơh nhơl chờ mpồl bơtiàn gơ wèt mờ mpồl cau, cau dùl nă să jat jơnau sồr tàm Nghị quyết do. Jat ồng Ngô Quang Tuyên, Phó Kuang atbồ Sở Văn hóa, Thể thao mờ Du lịch càr Đồng Tháp đơs: “Tơnơ̆ broă lòt sền do den bol hi geh bal mờ gơp nggui wơl nàng sền sơ wì gơ in di mờ bơta pràn, bơta ƀuơn. Dơ̆ 2 là bol he geh bơt bơtàu tai phan bơna tam hơ̆, dong kờl ală hìu bơnhă mờ ală tiah nàng lơh gơlik ală phan bơna nhơl chờ krơi is, bơh bơta pràn bơh tơl tiah dê, bol he geh dong bơto pơlam, bơto bơtê nàng gơtùi bơtàu tơnguh nhơl chờ nàng sơn đờm mut lơh broă, nàng lơh nhơl chờ tàm tiah do, nàng lơh bè lơi gơ in geh cồng nha.”

Bal mờ ală bơta ƀuơn mờ bơta niam geh is, bal mờ hơ̆ là ală broă lơh dong kờl ngan ngồn geh là bơta ƀuơn nàng làng bol mờ ală cau bơcri priă in rề ơnàng, tơnguh rlau tai bơta niam ală broă drơng ala, dong gah nhơl chờ tàm kơnhoàl Hồng Ngự đơs is mờ ală tiah tàm tiah nhàr dà lơgar bơh càr Đồng Tháp dê đơs bal ngan ngồn brồ guh tàm tơngai tus.

Cau cih VOV4- Cau mblàng K’Duẩn