VOV4.K’ho - Pơrjum bơta niam chài rơgơi gùt lơgar lơh jăt Nghị quyết Pơrjum dờng Đảng gùt lơgar dơ̆ 13 geh Bộ Chính trị, Ban Bí thư bơyai lơh geh kơ̆p kờñ bè dùl “Pơrjum Diên Hồng bè bơta niam chài rơgơi Đảng dê” pa geh bơyai lơh tàm Hà Nội. Tàm pơrjum, ală kuang bàng ala măt neh tơrgùm cri bơyai bè broă bơyai lơh, lơh jăt broă lơh jŏ jòng bơta niam chài rơgơi tus nam 2030, mờ lơh loh ală broă lý luận mờ mùl màl bơh bơta niam chài rơgơi tàm broă tơnguh bơtàu mhar, kơl jăp dà lơgar; ai geh ală broă lơh mùl màl, di pal nàng ai geh bơta tam gơl tờm tàm broă tơnguh bơtàu bơta chài rơgơi, kòn bơnus Việt Nam.

Jơnau yal tàm Pơrjum đơs loh: Bơta niam chài rơgơi Việt Nam là cồng nha rơbô nam lơh broă, bơceh lơh, tam dră pràn kơl dang, bơ̆t bơtàu dà lơgar mờ sền gàr dà lơgar, là cồng nha tìp bal mờ dờp iăt bơta niam bơh uă bơta niam chài rơgơi dunia dê nàng geh lơh gơs să tờm.

                                                                    Anih pơrjum

Tơnơ̆ mờ 35 nam tam gơl pa dà lơgar, ală gah, mpồl bơtiàn sền gròi tus mờ broă bơto bơtê kòn bơnus tơl ală bơta bơh tàm tŭ gam dềt, tàm cấp bơsram sră; pơgồp bơto sră, bơto kòn bơnus, bơto bơta git wă. Đơs tàm pơrjum, Bộ trưởng Bộ Văn hoá Thể thao mờ Du lịch ồng Nguyễn Văn Hùng đơs: Ală bơta kuơ nùs nhơm ờs mờng geh prăp gàr, tơnguh, tam gơl pa jăt broă lơh gơdờp bal mờ broă lơh sa drà kă bro, tơrgùm bal mờ dunia. Uă bơta niam chài rơgơi geh pơn jờng. Phan niam chài rơgơi kòn cau ờ gal bơnus geh sền gròi, prăp gàr mờ tơnguh, tàm hơ̆ uă ngan là kơnòl prăp gàr mhar bơta niam chài rơgơi ală jơi bơtiàn kòn cau. “Tàm bơta geh bơh bơta niam chài rơgơi Việt Nam tơnơ̆ mờ 35 nam tam gơl pa pà gŏ, jơnau git wă bè bơta niam chài rơgơi, mpồl bơtiàn, kòn bơnus ngai sơlơ geh tơl ală bơta, jăk chài rơlao. Nùs nhơm kơlôi sơnơng mờ rài kis-gah lơh tờm bơh bơta niam chài rơgơi neh geh ală tam gơl niam; broă lơh adăt boh lam bè bơta chài rơgơi pơn jăt tai geh lơh gơs, ai tơl bơta niam nàng làng bol tus bal tàm broă bơceh lơh mờ dờp bơta niam chài rơgơi...Mùl màl neh ai tơngŏ, ală tŭ dà lơgar kal ke bè ală bơta kuơ niam chài rơgơi niam bơnĕ bơh dà lơgar dê geh gơguh mờ tơnguh pràn kơl dang; nùs nhơm kờñ gơboh mờ dà lơgar, nùs nhơm dong kờl bal, kis geh kuơ, geh gùng geh dà, geh uă bơta niam chài rơgơi Việt Nam sơlơ àng gơcrà ngan”.

              Kuang atbồ Ban Tuyên giáo Dà lơgar ồng Nguyễn Trọng Nghĩa geh jơnau đơs tàm pơrjum

Tàm pơrjum, ala ăt kuang đơng lam ƀòn dờng Hà Nội; càr Thừa Thiên Huế mờ càr An Giang neh đơs tus mờ ală cồng nha neh lơh geh bal mờ jơnau bơsram broă mờng chài tàm broă tơnguh bơta kuơ niam chài rơgơi, tàm broă bơ̆t bơtàu mờ tơnguh bơtàu lơh sa mpồl bơtiàn. Ala măt ală cau ngăc ngar jăk chài, cau khoa học mờ cau đơs crih tamya neh đơs uă tus mờ bơta niam chài rơgơi-kòn bơnus là bơta tờm gàr niam broă tơnguh bơtàu kơl jăp lơgar Việt Nam. Giáo sư, Tiến sỹ Khoa học ồng Vũ Minh Giang, Kuang atbồ Mpồl duh broă Khoa học mờ bơto bơtê, Hìu bơsram Đại học Dà lơgar Hà Nội đơs tờm tus mờ kơrnoăt geh cồng nha tàm broă tơnguh bơtàu dà lơgar tus pas gơs là tơnguh nùs nhơm kơ̆p kờñ dà lơgar. Nùs nhơm kơ̆p kờñ geh lam tus pin dờn mờ gơtùi lơh gơs ală bơta pràn geh is gơs bơta geh, bơta pràn: “Broă lơh kuơ màng sơnrờp ngan là pal tam gơl bồ tơngoh git wă tờm ngan. Lài ngan pal wă nền nòn nùs nhơm, broă lơh bơta niam chài rơgơi ờ mìng là dùl gah broă lơh he pal wă bơta chài rơgơi lơh gơs bơta tờm nùs nhơm bơh mpồl bơtiàn dê là bơta tờm là bơta pràn bơh dùl lơgar dê. Tàm rài tŭ do, bơta niam chài rơgơi ờ mìng là phan bơna nàng he prăp gàr nàng geh ròng nàng he pơn yờ mờ pal geh sền là bơta pràn tờm dà lơgar dê nàng gơtùi pờ ơnàng broă lơh bal mờ tàm pơrlòng di pal mờ dunia”.

Đơs tàm pơrjum, Phó Thủ tướng ồng Vũ Đức Đam kung đơs tờm, broă lơh jăt broă lơh jŏ jòng bơta niam chài rơgơi tus nam 2030 pal geh lam sồr nùs nhơm kơ̆p kờñ tàm gùt làng bol, pơn jăt tai ai geh bơta pràn nàng bơceh lơh, bơta pràn gùt làng bol nàng tơnguh bơtàu mhar mờ kơl jăp. Kờñ lơh geh bơta do, ală cau lơh bơta niam chài rơgơi pal mùl màl geh pơnrơ jăk bè bơta niam chài rơgơi, nùs nhơm niam mờ rài kis niam: “Ală cau geh pơn jờng niam, pas sơm, bơsram jăk di gơlan ờ gŏ geh pơn jờng mờ broă geh bơta niam chài rơgơi. Añ kơ̆p kờñ ngan ală cấp, ală gah lơh broă dà lơgar, sền wơl rơlao tus mờ bơta niam chài rơgơi. Ai bơta niam chài rơgơi uă tơngai, uă bơta pràn rơlao. Tơnguh bơta kuơ dà lơgar Việt Nam. He pơn dềt să, mơya bơtơl tai broă pơnyờ să mờ dà lơgar. He pin dờn geh bơ̆t bơtàu, tơnguh bơtàu dà lơgar, tơnguh bơtàu pas gơs mờ bơta chài rơgơi Việt Nam àng gơcrà, lòt bal tàm bơta ngăc ngar kòn bơnus dê”.

Bơh 6 jơnau bơsram broă mờng chài geh ai gŏ, Pơrjum Bơta niam chài gơrơi gùt lơgar ring bal jơnau kờñ, gùng dà mờ broă lơh tờm nàng bơ̆t bơtàu mờ tơnguh bơta kuơ niam chài rơgơi, bơta pràn kòn bơnus Việt Nam tàm tơngai tus. Tàm hơ̆, tơrgùm bơ̆t bơtàu bơta niam chài rơgơi kòn bơnus Việt Nam tơnguh bơtàu tơl ală bơta, wèt tus bơta niam bơnĕ, git wă nùs nhơm dà lơgar, lơh tờm, khoa học mờ kòn bơnus niam. Bí thư Đảng dà lơgar, Kuang atbồ Ban Tuyên giáo Dà lơgar ồng Nguyễn Trọng Nghĩa đơs loh: “Tơrgùm kơlôi sơnơng, ai gŏ mờ lơh jăt broă bơ̆t bơtàu bơta kuơ dà lơgar, bơta kuơ niam chài rơgơi, bơta kuơ kòn bơnus Việt Nam pơgồp bal mờ prăp gàr, tơnguh bơta kuơ hìu nhă Việt Nam tàm rài pa. Drơng gàr, bơ̆t bơtàu kòn bơnus Việt Nam tơnguh bơtàu tơl ală bơta, bơta tờm là bơto bơtơl nùs nhơm kờñ gơboh mờ dà lơgar, nùs nhơm pơn yờ să dà lơgar, nùs nhơm, rài kis, broă lơh, bồ tơngoh. Pơgồp bal bơ̆t bơtàu, bơsram tàp nùs nhơm mờ lơh jăt gơnoar kòn bơnus, gơnoar mờ kơnòl tờm bơh làng bol dê”.

Cau mblàng Ndong Brawl