VOV4.K’ho- Bơh ngai 27/6 tus tŭ do, tàm hìu sơnơm ing sồ 1 ƀòn dờng Hồ Chí Minh neh geh rlau 1 rbô 700 nă cau kòp Covid-19 geh rê bơh hìu sơnơm. Do là ală cau geh cồng nha xét nghiệm ờ gam kòp halà bơtờp kòp mơya khà virus dùl êt, ờ geh bơta pràn bơtờp tàm mpồl bơtiàn.

Hìu sơnơm ing sồ 1 geh 4 rbô 500 nơm jơ nờng geh lơh tàm Hìu ơm bal bơh Anih tờm bơto bơtê sền gàr dà lơgar mờ sền gàr lơngap lơngai gơ wèt Hìu bơsram Đại học Quốc gia ƀòn dờng Hồ Chí Minh, lơh broă bơh ngai 26/6. Tàm do, gam sơm 4 rbô 423 nă cau kòp F0 in. Hìu sơnơm geh kơnòl sơm jơh khà cau bơtờp pa mờ ală cau gam geh tam cah is tơrgùm bal (bơh F1 gơ gơs F0).

Bơh ngai 13/7, Sở Y tế ƀòn dờng Hồ Chí Minh lam lơh tơrlòng lài tơrmù tŭ tơngai sơm F0 ờ geh tềl tơnggŏ kòp tàm hìu sơnơm. Jat hơ̆, F0 xét nghiệm RT-PCR ngai dơ̆ 10 geh cồng nha ờ bơtờp kòp halà gam bơtờp mơya khà virus dùl êt den ntrờn rê tam cah is tàm hìu dilah gàr tơl ală bơta bè ờdo ờdă, rơcang sơndră bơtờp kòp.

Cau mblàng K’Duẩn