VOV4.K’ho - Drim ngai 28 nhai 12, Sở Văn hoá-Thể thao mờ Du lịc càr Dăk Lăk bơyai lơh dờp sră rơndăp săp sèng tiah tềl kah yau kấp càr gơwèt mờ tiah tềl kah yau rài lài do Hìu lơh broă Ủy ban ntào tam lơh càr Dăk Lăk nam 1945.

Tiah tềl kah yau Hìu lơh broă Ủy ban ntào tam lơh càr Dăk lăk nam 1945 geh lơh tềng hìu sồ 71 gùng Lý Thường Kiệt, ƀòn dờng Buôn Ma Thuột. Geh lơh bơh nam 1943, do là hìu bơh ồng Đầu Viết Chúc, dùl hìu kăc màng bơh Việt Minh dê. Bơh nam 1944, tàm hìu do neh gơs anih lơh broă ndơ̆p ndơr bơh Việt Minh tàm càr Dăk Lăk mờ tàm tiah tàm gùl lơgar, ròng siam mờ pồn uă cau ling kăc màng. Tàm mang ngai 19 nhai 08 nam 1945, tàm hìu do geh bơyai lơh Pơrjum jal mhar bơh Mpồl đơng lam ing càr Dăk Lăk, ai geh kơrnoăt bè broă geh gơnoar atbồ tàm kấp càr, pơgồp bal dùl broă lơh geh cồng nha tàm Kăc màng nhai 8 nam 1945 bơh dà lơgar dê. Bal mờ broă geh rơndăp săp sèng tiah tềl kah yau kấp càr dê, tiah tềl kah yau Hìu lơh broă Ủy ban ntào tam lơh càr Dăk Lăk nam 1945 geh jào gơnoar atbồ ƀòn dờng Buôn Ma Thuột in atbồ, bơcri priă lơh niam wơl mờ tơnguh bơta kuơ, drơng broă bơto bơtê rài lài do mờ nhơl chờ.

Cau mblàng Ndong Brawl