VOV4.K’ho- Dùl tàm ală broă lơh rơcăng sơndră kòp Covid-19 geh cồng nha geh ală anih lơh broă ờs mờng gah broă lơh do bơto sồr là 5k mờ sơnơm vaccine. Pa do, Thủ tướng Chính phủ neh geh kơrnoat sồr lơh mhar broă cĭt sơnơm vaccine rơcăng sơndră kòp Covid-19. Tàm poh lài, Ủy ban Thường vụ Quốc hội lơh nền ngui 12 rbô 100 tơmàn đong priă tềm priă dơ̆ ngui nam 2020 nàng blơi sơnơm vaccine rơcăng sơndră kòp Covid-19. Tàm Tây Nguyên, tus tŭ do, ală tiah neh jơh lơh sir broă cĭt sơnơm vaccine rơcăng sơndră kòp Covid-19 dơ̆ dùl, mìng is càr Gia Lai neh lơh sir jơh dơ̆ 2.

Jăt jơnau yal bơh Sở Y tế càr Kon Tum dê, tus tŭ do, càr neh lơh sir jơh broă cĭt sơnơm vaccine rơcăng sơndră kòp Covid-19 dơ̆ dùl, mơkung pơn jăt tai lam lơh mờ lơh jăt ală broă lơh jal mhar rơcăng sơndră kòp. Kờp jơh, càr Kon Tum geh mờr 11 rbô nă cau neh geh cĭt sơnơm vaccine rơcăng sơndră kòp Covid-19 ding dơ̆ dùl, lơh geh rlau 83% khà cau geh ai lài cĭt sơnơm vaccine rơcăng sơndră kòp dơ̆ dùl. Do là ală cau lơh broă tàm ală hìu sơnơm mờ cau tus bal rơcăng sơndră kòp Covid-19. Tàm ală tŭ cĭt, gah lơh sơnơm càr Kon Tum sền gŏ geh 2 nă cau gơtìp kơn jơ̆ tơnơ̆ tŭ cĭt tàm Hìu sơnơm dờng càr mờ Hìu sơnơm dờng tiah Ngọc Hồi. Tŭ do, să jan bơh 2 nă cau do dê neh pràn bè ờs wơl.

Kung tàm dơ̆ dùl pa do, càr Dăk Nông geh Bộ Y tế pà rlau 9 rbô ding sơnơm vaccine rơcăng sơndră kòp Covid-19. Tơnơ̆ tŭ dờp sơnơm vaccine tơn, gah lơh sơnơm càr Dăk Nông neh sồr ală anih lơh sră cih măt ală cau geh ai lài, lam bơto pơlam dờp ngui, prăp gàr sơnơm vaccine mờ lam cĭt. Nàng broă cĭt sơnơm vaccine rơcăng sơndră kòp lơh geh cồng nha, gah lơh sơnơm càr Dăk Nông bơyai lơh cĭt tàm 8 anih, tàm hơ̆ geh: Hìu sơnơm dờng càr, 7 hìu sơnơm ală kơnhoàl gam wơl. Ală cau geh ai lài cĭt dơ̆ do, tàm hơ̆ geh: kuang bàng, cau lơh sơnơm, ală cau tàm Mpồl đơng lam, ală mpồl cau tàm tiah lam lài rơcăng sơndră kòp...jăt Kơrnoat sồ 21 bơh Chính phủ dê. Ồng Hà Văn Hùng, Phó Kuang ătbồ Sở Y tế càr Dăk Nông pà gĭt, jơh gùt càr neh geh rlau 10 rbô 200 nă cau geh cĭt ding dơ̆ dùl sơnơm vaccine rơcăng sơndră kòp Covid-19. Tơnơ̆ tŭ cĭt geh rlau 1 rbô 700 nă cau geh bơta gơ tơngŏ dùl êt, bè: duh să dùl êt, kiăt, jê tềng anih cĭt, gơtuh hă mờ ờ gŏ sền gŏ geh cau lơi gơtìp aniai tài bơh cĭt sơnơm. Tŭ do, să jan bơh ală cau geh cĭt sơnơm dê ndrờm bè pràn wơl bè ờs. Ồng Hà Văn Hùng, đơs: Gah lơh sơnơm neh pơgồp bal mờ ală sở, gah, sơnah lơh broă lam lơh jăt niam. Bol añ rơcăng wil tơl phan bơna, măy mok, cau lơh broă tàm ală anih cĭt di jơnau sồr. Tàm cĭt sơnơm sùm bol añ ờs bơyai lơh cĭt tàm ală hìu sơnơm xã, ai dơ̆ cĭt sơnơm vaccine rơcăng sơndră kòp Covid-19 do den bol añ tơrgùm cĭt tàm ală hìu sơnơm càr mờ kơnhoàl dê. Tài bơh sơnơm vaccine rơcăng sơndră kòp Covid-19 pa mờ bol añ pal ơn bơta tơl khà ờdo ờdă rlau mờ bơta lơi jơh, den tàng tŭ cĭt tàm hìu sơnơm dilah geh bơta lơi gơlik ală bơta aniai ndai den gah lơh sơnơm geh phan bơna wil tơl nàng bơsong sền gàr niam ờdo ờdă ai cau cĭt in.

Ală càr Tây Nguyên sền bal neh lơh sir jơh broă cĭt sơnơm vaccine rơcăng sơndră kòp Covid-19 dơ̆ dùl

Broă cĭt sơnơm vaccine rơcăng sơndră kòp Covid-19 dơ̆ do, càr Dăk Lăk geh pà 17 rbô 50 ding nàng cĭt ai 3 mpồl cau in, tàm hơ̆ geh ală cau lơh broă tàm ală hìu sơnơm, cau tus bal rơcăng sơndră kòp mờ mpồl phàu crong. Tơngai cĭt bơh ngai 24/4 tus ngai 5/5/2021. Nàng lơh geh jơnau kờñ geh rlau 95% cau ai lài geh cĭt sơnơm, Dăk Lăk ngui ală anih cĭt pờ ơnàng neh geh tàm càr mờ bơtơl tai 2 broă lơh cĭt lài cĭt sơnơm ờdo ờdă tàm Hìu sơnơm dờng tiah Tây Nguyên mờ Hìu sơnơm dờng ƀòn dờng Buôn Ma Thuột. Tàm tŭ dilah kờñ ngan, Sở Y tế geh tơrgùm tai ală anih cĭt sơnơm drơng ala mờ ală anih ndai tơl bơta pal geh cĭt sơnơm tus bal.

Nàng sền gàr ờdo ờdă, geh cồng nha tàm broă lơh cĭt sơnơm vaccine rơcăng sơndră kòp Covid-19, Sở Y tế càr Dăk Lăk neh bơyai lơh bơto pơlam nền cê ai ală kuang bàng đơng lam bồ, cau lơh broă cĭt sơnơm; yal tơngĭt bè sơnơm vaccine rơcăng sơndră kòp Covid-19; bơto pơlam ngui, sac rwah lài mờ tŭ cĭt; bơto pơlam bơsong dong kờl mhar bơta gơbàn aniai tài bơh cĭt sơnơm, ờdo ờdă cĭt sơnơm...Bè broă gròi sền mờ bơsong bơta aniai ờ kuơ tơnơ̆ tŭ cĭt sơnơm vaccine rơcăng sơndră kòp Covid-19. Bác sĩ Chuyên khoa 2 là bi Trịnh Hồng Nhựt, Kuang ătbồ Khoa Hồi sức tích cực mờ Tam dră khih- Hìu sơnơm dờng tiah Tây Nguyên, tơngkah: Tŭ cĭt sơnơm vaccine den pal kah ală bơta tơngŏ tơnơ̆ do: Gơwèt mờ làng bol pal sền gŏ bơta gơ tơngŏ gơ aniai digơlan gơlik geh khăt tàm tŭ lơi. Hơ̆ là tơnơ̆ tŭ cĭt sơnơm vaccine geh ală bơta gơ tơngŏ tềng kơltau halà jê ndul gơtuh hă, geh bơta gơ tơngŏ gơ săp nhơm halà bơta gơ tơngŏ ờ bè ờs lơi hơ̆ den pal tus mhar tơn hờ hìu sơnơm nàng geh kham. Ai gơwèt mờ cau lơh sơnơm tŭ cĭt sơnơm vaccine rơcăng sơndră kòp pal kah rơcăng lài jơh ală phan bơna kung bè sơnơm tơm ba nàng rơcăng lài bơsong ală bơta aniai ờ niam, nàng kờñ sền gŏ gờñ mờ sơm kòp di tŭ nàng cèng wơl cồng nha ai dơ̆ cĭt sơnơm rơcăng sơndră kòp dơ̆ do in.

Mìng is Gia Lai, càr geh cau bơtờp kòp Covid-19 dơ̆ sơnrờp tàm Tây Nguyên, den tàng neh jơh lơh sir broă cĭt sơnơm vaccine dơ̆ 2 tàm bồ nhai 5 pa do. Dơ̆ do, càr Gia Lai geh pà 16 rbô 650 ding sơnơm vaccine. Cau cĭt tàm dơ̆ do là mpồl cau lam lài tam dră mờ kòp, tàm hơ̆ geh ală cau lơh broă tàm ală hìu sơnơm; kuang bàng tàm Mpồl đơng lam rơcăng sơndră kòp kấp kơnhoàl, kấp xã; cau lơh broă tàm ală tiah ơm yah ngài, lơh kơnòl broă, jòi tiah lòt rê bơh cau kòp dê, lùp sền tiah bơtờp kòp, cau lơh băo. Bơdìh hơ̆ tai, 1 rbô 883 nă cau neh cĭt ding dơ̆ dùl tàm dơ̆ dùl kung pơn jăt tai geh cĭt ding dơ̆ 2 tŭ tơl tŭ tơngai bơh 4 poh rlau hơđang.

Lơh jăt jơnau hòi jà bơh Thủ tướng Chính phủ dê bè broă gờñ ai sơnơm vaccine rơcăng sơndră kòp Covid-19 tus mờ jơh tơl nă làng bol in kung bè kơ̆p kờñ geh tàm sơm băt tê bal mờ jơh gùt mpồl bơtiàn, gah ngân hàng neh tă pơgồp uă ngan priă jền gơguh tus gĭt nđờ rhiang tơmàn đong. 4 ngân hàng kă bro, là: Vietcombank, Vietinbank, BIDV mờ Agribank tơl ngân hàng dong kờl 25 tơmàn đong nàng blơi sơnơm vaccine. Kuơmàng, pa do, ồng Vương Đình Huệ Chủ tịch Quốc hội neh kĭ ai ngui Kơrnoat bơh Ủy ban Thường vụ Quốc hội dê bè broă ngui priă tềm pềr dơ̆ ngui mờ priă jền gam wơl bơh kes priă dà lơgar nam 2020 dê. Jăt mờ hơ̆, Ủy ban Thường vụ Quốc hội lơh nền ngui 12 rbô 100 tơmàn đong priă tềm pềr dơ̆ ngui nam 2020 nàng blơi sơnơm vaccine rơcăng sơndră kòp Covid-19. Ủy ban Thường vụ Quốc hội jàu Chính phủ in sồr ală Bộ, anih lơh broă dà lơgar mờ ală tiah lam lơh jăt sơrbac mhar, di tŭ broă blơi sơnơm vaccine rơcăng sơndră kòp Covid-19, gàr niam cồng nha, ờdo ờdă ai làng bol mờ ai jơh gùt mpồl bơtiàn in.

Quốc Học tơrgùm cih- Cau mblàng Lơ Mu K’Yến