VOV4.K’ho- Tàm pơrjum pờ tơlĭk tàm internet bè bơta gơtìp, broă lơh jal mhar tàm broă sơndră, tam dră mờ kòp Covid-19 geh bơyai lơh tàm ngai 19 nhai 5, Thủ tướng ồng Phạm Minh Chính đơs uă tus mờ broă hòi jà tơrgùm jơh bơta pràn, sơbăc mhar ai broă sơndră, tam dră mờ kòp gơtờp. 

Kuơ màng, Thủ tướng đơs tờm tus mờ ală bộ, gah lơh broă pal bơsong ală kal ke, bơta tơlòng ai ală tiah jăt mờ bơta pe ờ: ờ đơs ờ tơl priă ai broă sơndră, tam dră mờ kòp gơtờp; ờ đơs ờ tơl sơnơm sơm ba, phan lơh kloh niam, phan rơcang sơndră mờ kòp gơtờp; ờ đơs ờ tơl ală cơ chế broă lơh ai broă sơndră, tam dră mờ kòp gơtờp.

Đơs tus bơta mùl màl tŭ do, geh ờ uă tiah gam uă kal ke, kòp gơtờp kal ke rơlao bè tàm càr Bắc Ninh, bắc Giang mờ dùl bơnah Hà Nội, pa do ngan là tiah kòp gơtờp tàm ƀòn dờng Hồ Chí Minh. Rơlao tai, tam gơl să virus dơ̆ do ngòt rơngơ̆t mờ kal ke tàm broă sền gròi rơlao. Gơbàn broă gơtờp bơh mpồl bơtiàn tus mờ tiah lơh sa mờ măi mŏk mờ sơlơ̆u wơl, gơtìp gơtờp bơh broă gal cau, broă pơrjum gùng yàng, Thủ tướng đơs uă bè broă đơng lam, lam sồr bơyai lơh pal tơl ală bơta, mhar, geh cồng nha; mhar bơsong kal ke bè cơ chế, broă lơh, kal ke bơh ală bộ, gah lơh broă dà lơgar. Lơh pràn, mhar tàm broă lơh sơnơm vaccine. Ai broă sò tơm lơh tờm.

Thủ tướng đơs tờm, tơngai tus, broă lơh jăt tơngu me sền gàr bơta pràn kơl dang să jan màng kis làng bol gam là rơlao jơh, tàm hơ̆ uă ngan là broă tơmù, kơrian, sền gròi, gơsơ̆t kòp gơtờp, tàm hơ̆ uă ngan là tàm ală tiah geh kuơ bè Bắc Giang, bắc Ninh, tàm hơ̆ uă ngan là ală tiah lơh sa mờ măi mŏk mờ ƀòn dờng Hồ Chí Minh. Broă đơng lam là pơn jăt tai nùs nhơm “tam dră mờ kòp bè tam dră mờ ling sò tơm”. “Tŭ do pal sò tơm tơl ală bơta, tơl bơta pràn, sơbăc mhar, pràn kơl dang, geh cồng nha rơlao tai tàm jơh ală mpồl lơh broă chính trị mờ gùt làng bol mờ nùs nhơm lơh ngan uă rơlao, lơh ngan pràn rơlao tai, lơh broă sơbăc pràn rơlao, geh cồng nha rơlao, tơrgùm uă rơlao tai, tơrgùm, wàng se gơsơ̆t kòp, ring niam bơta mhar rơlao.

He pal pơn jăt tai gĭt yal lài niam bơta kòp, pơgồp bal di pal geh cồng nha bơh broă rơcang sơndră mờ sò tơm, mơya pal geh sò tơm là broă lơh tờm, rơcang sơndră là broă lơh tờm, là kuơ màng, là jŏ jòng, gam sò tơm là broă lơh mhar pal lơh mơ. Bañ ờ sền gròi, ờ geh broă rơcang lài tŭ gơtìp kòp, mơya sơlơ̆u wơl bañ ngòt, bañ gơtìp gơrơm să, ờ lơh jăt nền nòn, ờ kơ̆ nùs tŭ gơtìp kòp lơh gơtìp ală kơrnoăt lơh ờ di pal, ờ geh cồng nha uă”.

Thủ tướng sồr lơh jăt nền nòn broă lơh glài, lam sồr bơceh lơh tàm broă sơndră, tam dră mờ kòp, tơnguh broă sền gròi, tơnguh broă tam pà gơnoar, ƀuơn sền, ƀuơn sền gròi, ƀuơn gĭt. Lơh ndang mờ ai geh jơnau bơsram broă mờng chài ndang, bơtơl broă lơh niam, geh cồng nha, Sền kuơ broă lam sồr, sồr làng bol, jà làng bol tus bal, cri bơyai bal, geh dờp bal cồng nha tam dră mờ kòp gơtờp. Tơl nă cau pal sền gàr is să tờm, sền gàr mpồl bơtiàn, tài bơta kuơ jơi bơtiàn, dà lơgar.

Bè ală kơnòl broă lơh tờm, Thủ tướng đơs tờm, pal sền gròi nền nòn bơta gơlĭk geh, mhar di tŭ, ai geh ală kơrnoăt, gùng dà, broă lơh mùl màl. Thủ tướng đơs loh, tềng đăp măt, ai Phó Thủ tướng ồng Vũ Đức Đam đơng lam bal gah broă do; Phó Thủ tướng Thường trực ồng Trương Hoà Bình sền gròi đơng lam bal tàm ƀòn dờng Hồ Chí Minh. Phó Thủ tướng ồng Lê Văn Thành đơng lam broă brồ guh lơh sa, kă bro bàr càr Bắc Ninh, Bắc Giang là tiah lơh sa mờ măi mŏk. Tàm Hà Nội, Bí thư Thành ủy Hà Nội ồng Đinh Tiến Dũng đơng lam tơn.

Ală anih lơh broă pal tam pà broă lơh loh làng, nền nòn, geh cồng nha. Lơh broă ndang mờ ai geh broă mờng chài ndang. Bañ lời gơtìp ờ thàn, ờ gĭt bè lơi. “Ală bộ, gah lơh broă pal di tŭ bơsong kal ke ai ală tiah in mờ gùng dà broă lơh “pe ờ”: Ờ đơs ờ tơl priă; ờ đơs ờ tơl cau lơh broă, sơnơm sơm ba, phan lơh sơnơm, phan lơh broă, phan bơna; ờ đơs ờ tơl ală cơ chế, broă lơh ai broă sơndră, tam dră mờ kòp gơtờp. Di lah sơrlèt mờ gơnoar broă pal yal Chính phủ”.

Thủ tướng sồr, pal sơndră, tam dră bơh ngài, bơh gờñ lài mờ tŭ kòp gơtìp mờ jơnau sồr 5K+vaccine; ngui ală broă lơh công nghệ pa tàm broă jòi tềl, sền gròi ờ do ờ dă Covid, tam dră mờ ală cau ờ lơh jăt...; rơcang sơndră gờñ, gŏ gờñ, tam cah mhar, sơm kòp sơbăc, mhar ring niam bơta kòp. Sền gròi nền nòn cau mŭt mờ cau ơm kis ờ di mờ adăt boh lam. Bè broă lơh jăt sơnơm vaccine, Thủ tướng đơs tờm pal lơh bè lơi nàng geh sơnơm vaccine.“Gùt dunia tŭ do ndrờm kờñ geh sơnơm vaccine den gơtìp kal ke nàng he in geh sơnơm vaccine, mơya ờ di bè hơ̆ mờ he ờ gơtùi geh. Pal jòi tơl bơta; pal lơh ngan lơh geh sơnơm vaccine tàm lơgar; jòi geh công nghệ. Lam sồr bè broă bơyai cĭt sơnơm vaccine jăt bơta kờñ lài bè ală mpồl lơh broă, tiah geh kuơ.

Mblàng loh nàng làng bol cĭt sơnơm vaccine tài do là broă rơcang sơndră niam ngan. Hòi jà jơh ală bơta pràn di mờ adăt boh lam ai broă sơndră, tam dră mờ kòp gơtờp, tàm hơ̆ uă ngan là blơi sơnơm vaccine. Thủ tướng hòi jà ală anih lơh broă, mpồl lơh broă, ală càr, ƀòn dờng, mpồl lơh sa kă bro, làng bol tă priă, tă phan, tă bơta ngăc ngar, broă lơh nàng blơi sơnơm vaccine. Pơn jăt tai bơ̆t bơtàu kes priă sơnơm vaccine sơndră kòp Covid-19”.

Bè broă lam sồr, Thủ tướng đơs tờm, pal đơs nàng làng bol wă bè gùng dà broă lơh bơh Đảng, adăt boh lam bơh Dà lơgar gơrềng tus mờ broă sơndră, tam dră mờ kòp gơtờp. Pal bơto sồr nàng làng bol bal mờ gùt mpồl lơh broă chính trị, cấp ủy, gơnoar atbồ tus bal; tam pà bal kal ke, ai bơta niam nàng làng bol pin dờn tàm broă lơh bơh Đảng, Dà lơgar; hòi jà bơta pràn bơh làng bol pơgồp bal tus mờ broă lơh do mờ jơnau kờñ tơl ală bơta, gơrgùm bal, geh lơh jơh, geh cồng nha.

Thủ tướng đơs tờm, pal tơnguh bơta niam, rơcang lài, bơceh lơh, ring bal bơh cấp ủy, gơnoar atồ ală cấp mờ broă bơceh lơh bơh làng bol. Ală bộ, gah lơh broă dà lơgar, ală càr, ƀòn dờng pal lơh sơbăc, mhar, geh cồng nha. Thủ tướng kơ̆p kờñ mờ pin dờn uă ngan, mờ broă kờñ bal bơh gùt làng bol, he lơh geh cồng nha broă sơndră, tam dră mờ kòp gơtờp.

Cau mblàng Ndong Brawl