VOV4.K’ho- Ờ lơhă bĭc, jê bồ, kơrwài di gơlan gơbàn mờ ală cau lơi, mơya di lah bơta do gơbàn sùm, jŏ ngai den pal jòi sền nàng gĭt bơta lơi mờ geh broă tơmù mơ nàng pleh mờ bơta lơh aniai tus mờ bơta pràn kơl dang să jan di gơlan gơbàn.

Tơngai bĭc là tŭ să jan ờ ơwañ să, măt ñềm, tồr ờ kơno, bơr ờ đơs... hơ̆ là tŭ tơngoh ờ lơh broă. Tŭ do, mìng geh đah plai nùs, gùng mhàm lơh broă nàng dong kờl ơlòt mhàm tus mờ ală tiah tàm să jan nàng ai oxy mờ ală phan bơkah dong kờl broă tam gơl să jan nàng bơta kis să jan geh sùm. Dùl nă cau bè ờs pal bĭc ờ uă ngan là 7 jơ tàm 1 ngai. Dŏ bĭc geh dong kờl ală bơta tàm să jan ơm ơlô mờ gơguh niam wơl, tàm hơ̆ ală ơră mờ ală tế bào tơngoh. Tàm cau gam kơnòm, bĭc mờng geh uă rơlao mờ ờ gơtìp tài bơh bơta lơngañ bơh bơdìh. Gam tàm cau dờng sơnam, bĭc di gơlan gơtìp kah rơngal. Do là ală bơta tơngŏ bè ờs bơh broă bĭc lơhă mờ niam ai bơta pràn kơl dang să jan in.

Bơta ờ lơhă bĭc pal kah là tus tŭ rê bĭc kung gam ờ lơhă bĭc, tàm bồ tơngoh gam kơlôi broă do broă ndai, geh tŭ trồ tiah neh nggùl bơnăng kung gam ờ hềt lơhă bĭc sơl, di lah lơhă bĭc den mìng geh ờ uă. Tus àng drim guh, să jan glar ờ sô. Mờ di lah dùl nă cau ờ bĭc tơl 6 jơ den di gơlan gơtùi đơs là ờ lơhă bĭc. Ờ lơhă bĭc di gơlan là bơta tơngŏ krơi is, mơya di gơlan lơh gơbàn bè jê bồ, kơrwài mờ bơdìh hơ̆ tai pơgồp bal mờ ờ uă kòp ndai.

Geh uă ngan bơta lơh gơbàn tus mờ bơta do, bè tài broă tam gơl dơ̆ bĭc; Ờ lơhă bĭc tài lơngañ ha là tài trồ tiah duh ir, mrềt ir, tài phan sa geh bơta lơh ờ lơhă bĭc ha là tài hùc dà ce, kơphe... Ală bơta do ndrờm di gơlan geh tơmù ha là rơhời geh jơh. Mơya di lah ờ lơhă bĭc tài gơtìp ală bơta kòp, tàm hơ̆ geh kòp mhar bè kòp nggù jroă, kòp jê bồ ha là gơtìp ờ lơhă bĭc tài kòp jŏ nam bè jê gòr ntìng ngko lơh gơtìp kòl gùng mhàm tus tàm tơngoh, tơngoh ờ tơl oxy mờ ai ală phan bơkah tus, ală tế bào tơngoh gơlĭc geh ală tờm khăt gơboh... den ờ mìng lơh gơtìp ờ lơhă bĭc mờ gam lơh jê bồ, kơrwài. Di lah bơta ờ lơhă bĭc do gơtìp rơlao 1 nhai mờ ờ tơngŏ gơmù, den bơta ờ lơhă bĭc gơs kòp jŏ nam, lơh gơbàn ờ niam tus mờ rài kis broă lơh bơh cau kòp dê uă ngan.

Nàng tơmù bơta ờ lơhă bĭc, làng bol mờ gơ̆p gơyô pal sền wơl jơ rê bĭc, jơdŭ bĭc pal kloh niam, ờ duh ir tàm kàl duh, ờ mrềt ir tàm kàl mrềt... Pal kah, pleh mờ broă sa phan lơh gơtìp gơsồr klung, kal ke tàm broă tơrdih phan sa bè phan chàng, phan uă đạm tàm trồ mang, bañ hùc dà ce, kơphe, dà hùc geh bơta lơh gơsồr lơh gơtìp mờ lơhă bĭc. Tàm hơ̆ mìng geh ngui sơnơm an thần ha là sơnơm bĭc tŭ geh jơnau bơto sồr bơh bác sĩ dê, di lah hùc uă lơh ờ niam tus mờ klờm, leh, di lah hùc uă ir liều den lơh gơtìp ờ kah geh tŭ gơtìp chơ̆t.

Nàng gơtùi tơmù bơta ờ lơhă bĭc niam ờ do ờ dă mờ geh cồng nha, bơdìh mờ broă pal kah tus mờ tơngai bal mờ jơdŭ bĭc, he kung gơtùi rơwah tai ală phan geh dong kờl nàng lơhă bĭc, tơnguh broă gơlòt mhàm niam, ai tơl mhàm nàng ròng tơngoh, ai oxy mờ phan bơkah tơngoh in. Do là broă lơh nàng tơmù bơta ờ lơhă bĭc niam ờ do ờ dă ai ală cau in.

Bơta tòm lơh gơtìp ờ lơhă bĭc là tài ờ tơl oxy tus tàm tơngoh, tài gùng mhàm ai mhàm tus tàm tơngoh ờ ơnàng, tài stress ha là tài gơtờp vi khuẩn bơh ală cau gơtìp viêm xoang, ală cau gơtìp kòp jê gòr ntìng ngko tài tiah tìp bal bơh gòr ntìng gơtìp kòl, lơh mhàm lòt ờ pràn... Den tàng, nàng tơnguh mhàm lòt, he pal rơwah phan gơtùi dong kờl mhàm lòt mờ bơta tờm là Ginkgo Biloba... bơdìh mờ Ginkgo Biloba den phan he gơtùi rơwah nàng ngui pal geh là hơ̆ Cao Blueberry mờ bơta ngui nàng dong kờl tơnguh bơta pràn gah tơngoh, kơrian kòp plai nùs, gùng mhàm... bơdìh hơ̆ tai, pal geh ală bơta phan là tai, pal geh ală bơta phan là vitamin B1, B2, B6 geh dong kờl lơh gùng mhàm tơngoh gơguh wơl mhar... Den tàng, nàng tơmù bơta ờ lơhă bĭc, jê bồ, kơrwài mhar mờ ờ do ờ dă, geh cồng nha, he pal rơwah phan geh ală bơta phan do.

Bơdìh hơ̆ tai, tơl nă cau pal ai să tờm in geh rài kis, broă lơh di pal, broă sào sa tơl phan bơkah, dong kờl lơhă bĭc bè phan sa geh gar sen, kơnuh sen, phan geh omega 3, prìt. Bal mờ broă ai geh tŭ bĭc is den cau lơi kung pal bơsram tàp să jan pah ngai, rơwah broă tram jơng, hùc dà ram đe, dà toh ram đe lài mờ tŭ rê bĭc... nàng dong kờl geh dơ̆ bĭc lơhă.

Cau mblàng Ndong Brawl