VOV4.K’ho - Kòn cau Mnông kis tàm càr Dăk Lăk, Dăk Nông geh bơhiàn kis đềt mềr mờ ù tiah geh is, đềt mềr mờ brê bơnơm. Ală phan ngui nàng trŭ geh ală phan sa pah ngai kung mìng geh bơh brê mờ tàm suơn tàm mìr. Tàm hơ̆, biăp prùng là 1 tàm ală phan sa ờs mờng kòn cau Mnông dê.

                                                                          Biăp nse

Pah dơ̆ mŭt tàm brê ha là lòt lơh broă tàm mìr, kòn cau Mnông ndrờm geh ngui phan neh geh lài tàm brê, tàm mìr nàng trŭ geh ală phan sa. Ală phan kờñ trŭ gơm mờ ală nàng tĕ ndrờm geh bơh tàm brê bơnơm dê. Bi Y Xim Du, kis tàm ƀòn Yuk La 1, xã Dăk Liêng, kơnhoàl Lăk, càr Dăk Lăk pà git: “Biăp sa bơh kòn cau Mnông dê geh hòi ha là lơh biăp sa sràt mờ mìng là biăp buh ha là trŭ. Mờ biăp sa mìng geh trŭ tàm ală ding đơr, kơrlô, ờ ngui glah nàng trŭ. Biăp prùng là dùl tàm ală biăp sa ờs mờng kòn cau Mnông dê”

                                             Biăp, poăc neh geh prùng tàm ding đơr

Phan nàng prùng gơs biăp là dinh đơr, ding kơrlô, tơmơl jơh ală bơta biăp tàm ding đơr hơ̆ lài mờ tŭ he buh tàm rơnga ồs. Biăp brê mờ ală bơta poăc ndrờm geh trŭ tàm ding kơrlô, den tàng kòn cau Mbnông sơnđan là Prùng. Bi Y Xim pà git tai: “Lài ngan là geh tah poăc ha là ka neh ro ha là poăc sur, poăc kơnrồ neh ro ndrờm gơtùi lơm, sơlơ bơkah rơlao, gam biăp brê den geh pĭc biăp nse mờ gòl. He sreh gòl hơ̆ sồng klò gòl nàng trŭ, sa gòl bơtăng drèng mờ di lah sa uă den lơngồt. là biăp brê den kung geh lơngồt, geh bal boh, ƀòk ngòt mờ mrĕ tai”.

                             Bi Y Xim Ndu bal mờ cau năc lơgar Ấn Độ gam sa biăp prùng

Tơnơ̆ mờ tŭ neh pĭc biăp mờ rào kloh, tơmơl tàm ding, tah poăc dềt, gòl kung tơmul bal tàm ding sơl, ai nha prìt dơ̆p wơl mờ buh tàm ồs, cau buh geh sền gàr mờ pơrlăc ding sùm nàng ding bañ gơtìp ồs sa. Di pơgăp 30 phút tơnơ̆ den biăp sin den he ai gai gle dềt nàng jroh tai tàm ding. Dŭt ndơl he blah ding kơrlô mờ sa. Bi Y Xim Du yal, tŭ sa biăp do, cau sa geh gŏ bơkah krơi is ngan. “Biăp sa do geh pơgồp bal mờ rài kis kòn cau Mnông dê, geh ai tơngŏ rài kis bơh kòn cau do dê. Phan trŭ ndrờm geh tàm brê, den tàng ai tơngŏ rài kis chài rơgơi nùs nhơm pơgồp bal mờ brê bơnơm mờ ù tiah geh is”.

Tài bơta niam chài krơi is bơh biăp Prùng do dê, den tàng tơl nă kòn cau Mnông bŭ lah lòt tus tàm tiah ngài kung gam kah bơta bơkah bơh biăp Prùng kòn cau dê. Bŭ lah ờ lơh uă kal ke, mơya kung gam geh bơta bơkah bơh brê bơnơm dê. Biăp Prùng neh ai tơlik loh ală bơta niam krơi is bơh broă lơh sa, rài kis pah ngai mờ broă kis gơrờm mờ brê bơnơm bơh kòn cau Mnông dê.

Cau cih H’ Zawut-Cau mblàng Ndong Brawl