VOV4.K’ho - Lơh yàng Khai hạ mùl màl là lơh yàng tă tờm gơnơng, mờng geh ală cau bơyai lơh tàm mho ngai 7 nhai 1 nàng tơn jơh ală ngai ơm rơlô satềp. Jăt mờ bơhiàn ờs mờng bơh rài yau, tờm gơnơng satềp geh tơn tào tềng đăp ƀlàng hìu bơh ngai 23 nhai 12, ha là jơla ngan, tàm tờm gơnơng geh yồng dùl nơm kòng wil mờ yồng uă phan ngui geh nùs nhơm lơh rùp jăt mờ tơl tiah, bơhiàn, jơi bơtiàn kòn cau. Geh tiah cau yồng nha prìt sơkò, gle, đơr neh tàñ lir mờ pơ-àr tơlir pơrhê, nha juh trang geh rùp cà ràk, biàng mã, jơnau pơnhồr ha là rùp phan mờ ù neh buh... geh tiah là kơl dung dềt ơn cùr sa nha mờ ding kơwào, pơr lềm càl, ală bơnah lòs dờng dềt, nha thiên tuế, tơnò iar, kơnuh tỏi. Tŭ geh càl khồm, phan yồng mờ ală bơnah lòs geh ntas leng klèng. Tềng jơng tờm gơnơng geh rơsìh vôi ƀòk mờ cih rùp sơna kam.

Tơnơ̆ mờ ală ngai wă rò satềp chờ hờp, tus ngai 7 satềp, ală hìu lơh yàng tă tờm gơnơng. Lài mờ tŭ tă tờm gơnơng, cau tờm hìu ơn dùl nơm kơ ƀàng dềt, hờ đang kơ ƀàng do geh ơn dùl nơm preng plai rơpung kài, ờ uă plai cih, bơkào... ơn tơn tềng tờm gơnơng kờñ geh yal mờ ù tiah, trồ tiah là hìu nhă neh satềp chờ hờp. Tơnơ̆ mờ hơ̆, rơngô tờm gơnơng nàng gơjrùh jơh nha ro den hơ̆ sồng tă tờm gơnơng mờ cèng nha juh trang yồng tềng mpồng dờng tàm hìu. Mờ ală hìu kă bro, ngai 7 satềp cau lơh yàng duh khoai nàng geh tìp bơtoah tàm broă kă bro, lơh sa geh uă cồng nha tàm nam pa. Rùp tờm gơnơng ngai satềp neh geh tàm văn họk zân gian jơnau đơs nrĭ bè: “Poăc tơngi, rơpung han, jơnau pơnhồr pơrhê. Tờm gơnơng, che pháo, mbar tơlir”.

Mờ bơta kwơ màng bơh ngai lơh yàng tă tờm gơnơng geh jơnau đơs kung là dùl “satềp” hơ̆ là satềp Khai hạ. Geh kwơ màng kung ndrờm mờ lơh yàng tam jào sơnam sơl. Den tàng, lài mờ tŭ chu ñàng lơh yàng tă tờm gơnơng, cau yau kung chu pháo chờ gờm. Uă hìu nhă geh nùs nhơm rơlĕ gam geh bal broă lơh yàng hờ bơdìh bè lơh yàng tàm tŭ tam jào sơnam tai. Lài mờ tŭ tă jơh phan geh pơdơng tàm 1 poh, den lài jơh pal lơh jăt broă lơh gơs biàng jơh priă. Tơl dơ̆ lơh yàng biàng, priă duh khoai ndrờ geh lơh is jăt săp sèng bè: Hìu yàng lài, hìu gơnrơh tơnơ̆-bơh ală cau dờng ngan tus mù hờ đơm. Lài mờ tŭ tă tơl dơ̆ lơh yàng bè hơ̆, cau tờm hìu ndrờm đơs jơnau răc dan. Tŭ lơh yàng tă tờm gơnơng, ală hìu crơcang: Sơlào piang duh khoai, gơtùi là piang gời ha là piang geh poăc ndrờm gơtùi. Ntờc dà, ơlăk, ñàng, bơkào, plai chi, preng phe, preng boh. Priă biàng, sớ. Ràng tơl mờ lơh gơs hờ bơdìh, cau tờm hìu bơyai lơh chu ñàng, răc dan ală nàng dan ală mò ồng tàm hìu nhă lài do, tơnơ̆ mờ hơ̆, hơ̆ sồng lơh yàng hờ bơdìh ù tiah.

Cau mblàng Ndong Brawl