VOV4.K’ho- Bơh rài yau, jat niam chài bơh jŏ lơgar VN dê neh geh dơ̆ lơh chờ mù lơh sre. Bal mờ broă lam lơh sa tềp tam chi, Củ tịc Hồ Chí Minh kung neh tus bal dơ̆ lơh chờ mù lơh sre; Bác Hồ neh mù tàm sre nàng lơ òr bal mờ làng bol. Nam 2009, tơnơ̆ mờr 100 nam ơm ờ bơyai lơh, dơ̆ lơh chờ mù lơh sre ngan ngồn geh lơh wơl tàm xã Đọi Sơn, kơnhoàl Duy Tiên, càr Hà Nam. Bơh hơ̆ tus tŭ do, pah nam, tàm dơ̆ do, kwang đơng lam bồ Đảng mờ dà lơgar ndrờm tus bal dơ̆ lơh chờ mù lơh sre, mù tàm sre lơ òr sre bal mờ làng bol lơh broă sa.

Dơ̆ lơh chờ mù lơh sre Đọi Sơn nam do geh lơh tàm 3 ngai, bơh ngai 5 tus ngai 7 nhai 1 sa tềp nam Ñâm Zần. Tàm hơ̆, ngai 5 mờ ngai 6 nhai 1 sa tềp, ală broă lơh duh khoai bè bơyai lơh yal jơnau, bơyai lơh rò dà guh hờ tơrñang pơ dơng phan duh khoai, bơyai lơh Sái Tịnh, bơyai lơh duh khoai hòi dan ring lơngai tàm hìu phờk Đọi Sơn... Ngai 7 nhai 1 sa tềp là ngai chờ tờm ngan. Tơnơ̆ dơ̆ mut lơh, mpồl bơyai lơh yal mờ jàu sră cơng tàng ai ală xã tơl khà ƀòn lơgar pa lơh lài càr Hà Nam nam 2021. Nàng gàr niam broă lơh rơcang sơndră kòp Kovid-19, ală broă lơh tàm bơnah lơh chờ nam do geh tơrmù ƀà; mìng gam lơh chờ pơrlòng sềr, bơka rơpu; ràng tơlik bơh Mpồl phan bơka thị xã; ràng tơlik ală anih yal tơnggit phan lơh gơs bơh suơn sre, lơh sa mờ măi mok dềt geh pơn rơ bơh thị xã dê.

Dơ̆ lơh chờ mù lơh sre Đọi Sơn geh sền là ngai chờ mù lơh sre dờng ngan rlau jơh tiah ring đah tô dà lơgar. Geh bơyai lơh pah nam tàm bồ nam pa, dơ̆ bơyai lơh chờ cèng bơta niam chài uă ngan, pơgồp bơnah dong kờl bơto pơlam broă lơh sa mờ ai tơnggŏ nùs nhơm kah ưn ngài ală rơnàng bèp ồng lài do tàm broă rồ ù, lơh gơs lŏ sre, tơnguh nùs nhơm rềp làng bol, ki ngàm cau lơh broă sa, broă lơh sa suơn sre. Nam 2022, tơngkah 1 rbô 35 nam ngai bơtau Lê Đại Hành sơn đờm bơceh lơh lơ òr sre tàm ƀlàng sre hơ đơm jơng bơnơm Đọi Sơn, tŭ do là xã Tiên Sơn, thị xã Duy Tiên. Do kung là nam dơ̆ 13, chờ do geh gơnoar atbồ tàm do bơyai lơh. Nàng dơ̆ lơh chờ cèng wơl cồng nha mờ bơta kuơ ngan ngồn, mpồl bơyai lơh neh tam pà kơnòl ngan ngồn, nền nòn ai ală mpồl geh gơ rềng in; pơn jờng ală kwang bàng mờ nac nhơl chờ test kòp Kovid-19 lài mờ tŭ tus bal dơ̆ lơh chờ; rơndap ơn anih quét mã QR Code nàng sền git bè gơ rềng kòp bơtờp.

Cau mblàng K’Duẩn