VOV4.K’ho - Mờ tơngu me “pal kis mờ kơ̆p gơn”, Ngai jơnau nrĭ Việt Nam dơ̆ 20 geh bơyai lơh tàm càr Dăk lăk neh bơyai lơh bơh ngai 15 tus 16 nhai 2, tàm gùng sră-kơphe Buôn Ma Thuột. broă lơh do geh Hội Văn học Nghệ thuật càr Dăk Lăk pơgồp bal mờ Sở Văn hoá Thể thao mờ Zu lịc bơyai lơh mờ uă broă lơh niam bơnĕ ngan, geh uă bơta niam chài ală jơi bơtiàn kòn cau kis bơh yau tàm do.

                           Broă tơnpar jơnau nrĭ tàm ngai jơnau nrĭ Việt Nam tàm càr Dăk Lăk

Mŭt sơnrờp ngan mờ broă dròng cing bal mờ jơnau jà ñô tơrnờm wă năc bơh kòn cau Rơđê dê, Ngai jơnau nrĭ Việt Nam dơ̆ 20 geh bơyai lơh tàm càr Dăk Lăk hòi jà geh gal cau năc tus sền. Tàm tiah geh bơyai lơh tàm gùng sră-kơphe Buôn Ma Thuột, ală cau năc geh sền broă lơh geh uă bơta niam chài rơgơi, pơgồp bal đah ală dơ̆ dròng cing, teh phan đơs crih kòn cau, đơs jơnau nrĭ, bal mờ uă broă lơh ndai bè wăc rùp cau, trah rùp mờ dơm chi, dan cih akhar thư pháp, ràng tơlik rùp niam... Cau chài Linh Nga Niê Kđăm, kis tàm ƀòn dờng Buôn Ma Thuột đơs: “Tàm kòp Kovid-19 he bơyai lơh geh bè do là niam ngan, geh uă bơta bè jơnau mờ ală broă lơh, añ gŏ geh uă ngan mờ geh broă pơgồp bal niam bơnĕ ngan. Kơ̆p kờñ là ală ngai bè do geh tai khà cau gơboh mờ jơnau nrĭ, gơboh mờ văn học geh gơguh, mờ bơta niam chài sền sră cau Việt Nam dê geh gơguh niam wơl”.

                             Broă lơh chài rơgơi geh uă bơta niam chài rơgơi Tây Nguyên dê

Tàm hơ̆ uă ngan là tàm dơ̆ mŭt bơyai lơh ngai jơnau nrĭ Việt Nam tàm càr Dăk Lăk neh lơh wơl gơl đơs khan M’drong Dam, yal bè dùl nă cau jăk tàm jơnau yal yau kòn cau Rơđê dê. Do là dơ̆ sơnrờp broă lơh do geh ai đơs tàm jơnang, tơlik geh tàm bơta niam mpồl bơtiàn ƀòn dờng Buôn Ma Thuột. Nghệ sĩ Ưu tú Vũ Lân, cau kơlôi sơnơng bơta chài rơgơi rài yau Tâ Nguyên đơs, broă ai jơnau đơs khan tàm tơngu me broă lơh do neh ai geh bơta niam bơnĕ, mìng geh tàm Tây Nguyên tàm ngai chờ jơnau nrĭ dà lơgar dê. “Añ di nùs ngan là yal: Klei Khan”, hơ̆ là jơnau đơs khan bơh kòn cau Rơđê dê. Mùl màl hơ̆ là dùl jơnau đơs nrĭ bơh cau Tây Nguyên dê, cau đơs nrĭ nrềng, tàm hơ̆ uă ngan là ală jơnau nrĭ geh đơs tus mờ tơl jơnau dùl, den lơh gơs jơnau nrĭ ai jơnau đơs hơ̆ in. Mờ jơnau đơs hơ̆ geh pơgồp bal nền nòn mờ ală jơnau nrĭ jơnau pơn đik Tây Nguyên dê. Hơ̆ là dùl bơta niam bơnĕ ngan”.

Mờ tơngu me “Pal kis mờ kơ̆p gơn”, broă lơh ngai jơnau nrĭ gam geh ală tơngu me geh jơnau kờñ gơboh bal bè pà ală jơnau cih jơnau đơs crih tamya nàng tăc tàm pơrlòng khà priă, lơh geh kes priă dong kờl cau kòp rơƀah in, broă đơs jơnau nrĭ pơyoa geh ală jơnau kơ̆p kờñ bè jơnau nrĭ bal mờ rài kis niam bơnĕ. Mò Niê Thanh Mai, Củ tịc Hội Văn họk Nghệ thuật càr Dăk Lăk pà git, broă lơh do geh lơh tus ngai 17 nhai 2, mờ nùs nhơm kơ̆p kờñ geh uă jơnau gờñ gơboh bal văn học nghệ thuật tus mờ ală cau in. “Bol añ kơ̆p kờñ ngan là ngai chờ pal là ai ală cau kờñ gơboh mờ jơnau nrĭ mùl màl, den tàng tàm broă lơh ngai do den bơta tờm mờ bơta krơi is bơh bơta niam chài rơgơi Tây Nguyên geh ai tơngŏ. Mờ tàm broă lơh mang do “Pal kis mờ kơ̆p gơn”, bol añ geh ală jơnau đơs bè Tây Nguyên ndu gơnrơh, cau chài cih jơnau nrĭ mờ jơnau kơ̆p kờñ, jơnau nrĭ mờ nam pa bal mờ ală jơnau kơ̆p kờñ niam bơnĕ pa nàng pơyoa tus ală kwang bàng bal mờ ală bơyô in tàm nùs nhơm cèng geh ală bơta chờ tus mờ ală cau kờñ gơboh mờ jơnau nrĭ in”.

Cau cih H’ Xíu-Cau mblàng Ndong Brawl