VOV4.K’ho - Tus ngai (27/01), broă lơh anih pờ tơlik jơnau đơs crih tềng gah plung ơm tơnao dà Xuân Hương neh lơh gơs broă lơh dŭt ndơl, di tŭ ai ngui drơng tàm broă nhơl chờ cau năc mờ làng bol kis tàm ƀòn dờng do in di tàm satềp Ñâm Zần nam 2022.

          Broă lơh do geh là bơta tờm ƀòn dờng Dà Làc dê tŭ trồ mang, drơng làng bol mờ cau năc in sền

Broă lơh pờ tơlik jơnau đơs crih mờ dà do geh kờp jơh khà priă bơcri mờr 10 tơmàn đong, geh Kông ty Kổ phần bơcri priă Lan Anh-Dà Làc jào pà. Broă lơh do geh crăp tàm tềng tiah plung ơm tơnao dà Xuân Hương, lơh mờ bơta phan đơs crih bơr đồng tàm dà, ală broă lơh ndrờm geh lơh mờ phần mềm geh ngui uă. Broă lơh phan pờ jơnau đơs crih di bŭ lah geh bă ù ờ dờng, mơya tŭ geh ai lơh tềng pòt bơh tơnao dà Xuân Hương, pơgồp bal mờ ù tiah niam, ală ƀlàng nhơl dềt, jơnau đơs crih, đèng sòl àng... lơh geh dùl bơta niam pa ai gah nhơl chờ ƀòn dờng Dà Làc in. Ờ mìng tàm satềp mờ broă lơh đơs crih dà do geh lơh sùm tàm mang ală ngai dơ̆ prao, dơ̆ poh, ngai rơlô pah poh, lơh tus ngai 31 nhai 12 nam 2024.

Cau mblàng Ndong Brawl