VOV4.K’ho- Drim ngai 08/4, tàm hìu pơrlòng tàp pràn să jan càr Dăk Lăk, ƀòn dờng Buôn Ma Thuột, Sở Văn hóa, Thể thao mờ Zu lịc càr pơgồp bal mờ Ƀan jơi bơtiàn kòn cau càr bơyai lơh Mut lơh Pơrlòng tàp pràn să jan ală jơi bơtiàn kòn cau càr Dăk Lăk dơ̆ 18 nam 2022.

Ala mat Kwang đơng lam bồ càr pà bồng bi kir sơnrai ai ală mpồl tus bal pơrlòng in

Dơ̆ pơrlòng geh lơh bơh ngai 08/4 tus ngai 10/4 do. Rlau 600 nă cau pơrlòng tus bơh 15 mpồl bơh ală kơnhoàl, thị xã mờ ƀòn dờng Buôn Ma Thuột, tus bal pơrlòng tàm 7 môn là Nhơl bơlai (cau klau, cau ùr), coh plai mini cau klau, ntoat (cau klau, cau ùr), lòt cak càng èk (cau klau, cau ùr), pañ sơna kam (cau klau, cau ùr), droh gai (cau klau, cau ùr) mờ dŏ che.

Ală cau tus bal pơrlòng tàm môn pơrlòng ntoat cau ùr

Do là ală môn tàp pràn să jan ờs mờng, sùm geh lơh tàm ală dơ̆ lơh chờ tàm càr. Pơrlòng tàp pràn să jan ală jơi bơtiàn kòn cau càr là dơ̆ pơrlòng tàp pràn să jan ờs mờng geh lơh pah nam, mơya tài kòp Kovid-19 gơlik geh kal ke, dơ̆ pơrlòng nam 2021 gơtìp ơm kung lời tus nam do. Ală cau pơrlòng tus bal là làng bol ală jơi bơtiàn kòn cau dùl êt nă cau gam ơm kis mờ lơh broă tàm càr Dăk Lăk. Bơh dơ̆ pơrlòng, bal mờ bơtàu tơnguh làm uă srơh pơlam tàp, pơrlòng tàp pràn să jan, tơnguh pràn kơldang să jan, nùs nhơm ai làng bol in; ngui, prap gàr mờ tơnguh ală bơta kuơ niam chài bơh jŏ, sơlơ tơrbŏ kơ̆ nùs nhơm tam klac bal tàm mpồl bơtiàn ală kòn cau tàm càr.

Cau mblàng K’Duẩn