VOV4.K’ho- Mho ngai 27/05, tàm ƀòn dờng Buôn Ma Thuột, Ƀảo tàng kah yau dà lơgar pơgồp bal mờ Ƀảo tàng càr Dăk Lăk bơyai lơh pơrjum yal bơh sơnrờp cồng nha jòi sền phan lời wơl bơh yau ñrùh dà Hai dơ̆ 2. Tiah tềl lời wơl bơh yau ñrùh dà Hai gơwèt ù tiah thôn 6, xã Ia Jlơi, kơnhoàl Ea Sup, càr Dăk Lăk.

Ală cau tus sền phan lời wơl bơh yau geh ràng tơlik

Phan lời wơl bơh yau do geh sền gŏ bơh nam 2020 mờ jòi sền dơ̆ 1 tàm nhai 3 nam 2021. Tàm dơ̆ jòi sền dơ̆ 2 geh lơh bơh lồi nam 2021 tus tŭ do, ală cau jòi sền phan yau neh tơrgùm geh dùl mpồl tiah lời wơl, phan lời wơl bơh yau lila bè: sùng ƀôn lŭ, phan ù buh, phan khàr, tiah tơ̆p ƀồc, rlau 1 rơbô nơm trồm khuàng lŭ ală bơta mờ gĭt nđờ jơ̆t rơbô nsàng bơcah dềt. Jat ală cau jòi sền phan lời wơl bơh yau, phan lời wơl bơh yau ñrùh dà Hai là tiah tềl lời wơl tơrgùm ală phan, geh tiah ơm kis, tiah tơ̆p ƀồc mờ kung là tiah lơh broă mòn lơh phan khuàng lŭ dờng ngan. Phan lời wơl geh pơgap mờ do bơh 3 rơbô 500 nam tus 2 rơbô nam lài mờ gam sùm jŏ jòng pơgap 1 rơbô nam.

Cau mblàng K’Hạnh