VOV4.K’ho- Drim ngai 08/04, tàm xã Hùng Lô, ƀòn dờng Việt Trì, càr Phú Thọ neh yŭ rơyùm bơyai lơh dơ̆ dờp rò Dơ̆ lơh chờ ờs mờng bơh yau “Dơ̆ lơh chờ Hìu duh khuai Hùng Lô” là phan lời wơl niam chài ờ di mờ phan bơna kâp dà lơgar mờ yal kơrnoăt bơh càr Phú Thọ dê dờp anih nhơl chờ niam chài mpồl bơtiàn Hùng Lô. Ƀòn Hùng Lô rài yau geh mat hòi là Khả Lãm Trang, tơnơ̆ do tam gơl gơ gơs là ƀòn An Lão.

Yal yau yal wơl là, tàm dùl ngai niam ngan ne, bơtau Hùng bal mờ kòn ùr bơtau dê mờ ală kwang bàng tàm gơlang bơtau lòt sơlơ̆u wơl jăt hiòng dà dờng Lô nàng lòt nhơl, ting cuh phan brê mờ lòt còp sền ù tiah brê bơnơm dà ia. Tus kơnhoàl ù tiah Hùng Lô, Bơtau gŏ ù tiah brê bơnơm niam bơnĕ ngan, ù tiah nđiơm gơs ngan, chi che tơlir niam mờ geh tai nhơm kis ndu tàm den tàng ơm rlô jơng wơl. Ală kwang bàng dờng sơnam mờ làng bol ƀòn lơgar gŏ bè hơ̆ den tàng rơcăng phan bơna lòt rò cau bơtau. Bơtau chờ hờp ngan mờ bơto sồr làng bol sơrbac mhar rò ù bơ̆t bơtàu ƀòn lơgar.

Bơh hơ̆ rê hờ tơnơ̆ do, làng bol ƀòn Hùng Lô lơh hìu duh kah nàng rbô nam kah chu ñàng sùm mờ di tàm dơ̆ ngai 9 mờ ngai 10/03 jăt nam he pah nam bơyai lơh tai dơ̆ lơh chờ nàng kah kơlôi bơtau. Jăt broă lơh duh khuai ờs mờng bơh yau, dơ̆ lơh chờ hìu duh khuai Hùng Lô geh 7 broă lơh tờm, tàm hơ̆ geh dơ̆ lòt rò yàng là dùl tàm ală broă lơh yŭ rơyùm ngan, geh lơh dờng ngan rlau jơh bal mờ gĭt nđờ rhiang nă cau tus bal lòt tùng tơrnùng.

Tŭ do, tàm ù tiah xã Hùng Lô gam prăp gàr geh 50 nơm hìu lơh mờ dơm chi yau geh lơh pơgăp mờ do bơh rlau 100 nam rlau hơđang, ală hìu ndrờm prăp gàr wơl ală bơta kwơ jơnau kah yau, hìu đam, niam chài li la bal mờ ală hìu đam niam bơnĕ krơi is ngan geh lơh jăt hìu đam bơh rài niam chài lơh broă sa sươn sre lơh kòi sre. Broă dờp Dơ̆ lơh chờ ờs mờng bơh yau “Dơ̆ lơh chờ Hìu duh khuai Hùng Lô” là phan lời wơl ờ di mờ phan bơna dà lơgar dê mờ anih nhơl chờ niam chài mpồl bơtiàn là bơta nàng làng bol Hùng Lô ngui niam bơta kwơ niam chài, lơh bơtàu tơnguh nhơl chờ.

Cau mblàng Lơ Mu K’Yến