VOV4.K’ho- Ngai 04/04, Ƀộ trưởng Ƀộ Văn hoá, Thể thao mờ Zu lịc ồng Nguyễn Văn Hùng neh kĭ kơrnoăt ai dơ̆ lơh chờ Ka tê bơh cau Prum càr Bình Thuận dê cih tàm sră cih mat phan lời wơl niam chài ờ di mờ phan bơna dà lơgar dê. Ka tê là dùl dơ̆ lơh chờ ờs mờng bơh yau dờng tàm nam bơh làng bol kòn cau Prum jăt yàng Balamon dê geh lơh tàm bồ nhai 07 jăt nam cau Prum dê pah nam, hơ̆ là di tòm lồi nhai 09 bồ nhai 10 nam tây.

Do là dơ̆ lơh chờ ờs mờng bơh yau niam bơnĕ ngan, nàng kờñ kah kơlôi ală cau yàng bơh cau Prum dê mờ kah kơlôi tus mò pàng, jơi nòi. Dơ̆ lơh chờ Ka tê geh lơh tàm ù tiah dờng ơnàng ngan, sơnđờm bơh ală hìu kwơ̆ tơnơ̆ hơ̆ lơh tus thôn, ƀòn mờ lồi dŭt là tus tơl hìu bơnhă cau Prum dê. Làng bol kòn cau Prum càr Bình Thuận geh rlau 8 rbô 300 hìu, ơm kis tơrgùm tàm 9 thôn ơm tàm bơrlŭ bal mờ 4 xã mìng cau Prum lơm. Tàm hơ̆, rlau nggùl khà cau Prum tàm do jăt yàng Balamon. Dơ̆ lơh chờ Ka tê neh gơ gơs là dùl broă lơh kwơmàng bơh làng bol cau Prum dê tàm Bình Thuận, pơgồp bơnah sền gàr, prăp gàr mờ ngui niam bơta kwơ niam chài bơh làng bol cau Prum dê. Mờ do kung là tŭ niam nàng yal tơngĭt bơta niam chài cau Prum dê tus mờ năc lòt nhơl tàm dơlam mờ bơdìh lơgar.

Cau mblàng Lơ Mu K’Yến