VOV4.K’ho- Pa do, tàm Hà Nội, Đoàn Ơruh pơnu Kộng sản Hồ Chí Minh dà lơgar pơgồp bal mờ Ƀan Tuyên giáo Dà lơgar, Ủy ƀan Bơta niam chài mờ Bơto bơtê Quôk hội dê, Ƀộ Văn hoá Thể thao mờ Zu lịc, Anih Sơñio rùp Việt Nam mờ Tơrgùm ală Mpồl Jơnau cih đơs crih tam ya Việt Nam bơyai lơh Cribơyai “Anih internet mờ gơnoar broă sền gàr nhàr niam chài bồ tơngoh rơnàng kơnòm să dê”. Đơs tàm dơ̆ cribơyai, Kwang ătbồ Ƀan Tuyên giáo dà lơgar ồng Nguyễn Trọng Nghĩa sồr ală kâp ƀộ Đoàn ngui jơh ală bơta pràn bơh anih internet dê, ală tŭ tam gơl sồ nàng tơnguh uă bơta gĭt wă bơh rơnàng kơnòm să dê bè bơhiàn kah yau, ală bơta kwơ niam chài niam bơnĕ ngan, krơi is ngan bơh ală jơi bơtiàn dê.

Tàm dơ̆ cribơyai, ală kwang bàng tơrgùm sền swì bè bơta gơrềng, bơta tàm bơtờp bơh anih internet dê, ală drơng broă gan tiah nhàr lơgar gơwèt mờ gơnoar broă sền gàr nhàr niam chài bồ tơngoh tàm tơngai tŭ do. Đơs tus ală phan bơna niam chài tàm anih internet, ală jơnau đơs đơs là, pal geh mpồl gròi sền gơwèt mờ ală phan bơna do tàm anih internet, nàng kờñ yal tơngĭt jơnau dùl bă di pal, song dơ pă, loh làng, niam bơnĕ, pơlam gùng niam chài ai làng bol in, ngan là rơnàng kơnòm să; lơh gơlik tiah ơm kis ring niam, niam bơnĕ nàng ală bơnàng jă, ală phan bơna niam chài tàm anih internet tàm lơgar bơtàu tơnguh.

Nàng rơnàng kơnòm să tàm sơm băt tê bal sền gàr bơnàng jă niam chài bồ tơngoh tàm anih internet, Phó Giáo sư- Tiến sĩ Nguyễn Thị Thu Phương, Kwang ătbồ Viện Niam chài Đơs crih tam ya dà lơgar Việt Nam gơwèt Ƀộ Văn hoá, Thể thao mờ Zu lịc đơs là, pal lơh gơlik ală mpồl ai rơnàng kơnòm să in bơceh pa. Mò Nguyễn Thị Thu Phương, đơs: Ală mpồl lơh khi in pin dờn, khi geh wă wờng, kờñ pal geh ală anih cribơyai halà ală broă lơh gơcèng bơta tơngume is, halà bơyai lơh uă ală dơ̆ lơh chờ...Ală broă lơh hơ̆ là broă nàng lơh gơlik geh anih, tiah ơm kis nàng ală cau kơnòm să in gơtùi tàm tơrbŏ wơl mờ jơnau neh rlau. Ờ geh broă lơh lơi ngan ngồn rlau, bềng bơta lơh gơrề rlau tŭ să tờm cau kơnòm să tam gơl ală bơta lơi gơwèt mờ bơta kwơ tờm bơh ală broă lơh tơngŏ pa, broă gĭt gŏ pa bơh khi dê.

Jơh gùt anih bơyai lơh dơ̆ pơrjum

Đơs tàm dơ̆ cribơyai, Kwang ătbồ Ƀan Tuyên giáo dà lơgar ồng Nguyễn Trọng Nghĩa đơs niam ngan Đoàn Ơruh pơnu mờ rơnàng kơnòm să Việt Nam neh mờ gam bơyai lơh uă srơh, broă lơh loh làng ngan nàng pơgồp bơnah sền gàr, prăp gàr mờ ngui niam bơhiàn niam chài jơi bơtiàn dê, sền gàr nhàr bồ tơngoh niam chài tàm tŭ tơngai tam gơl sồ. Hơ̆ là gĭt nđờ rbô dơ̆ cribơyai cíñ trị, ală broă lơh lòt sền nàng gĭt rê hờ tiah nggu rơyas, lòt còp ƀảo tàng, tiah tềl lời wơl kah yau, lòt sền hờ bơdìh. Ală dơ̆ pơrlòng jòi gĭt bè bơta niam chài, bơhiàn kah yau bơh jơi bơtiàn dê geh ngai sơlơ uă, ngan là broă ngui măy mok sồ geh lam lơh pràn kơldang. Mpồl Đoàn, Mpồl ơruh pơnu neh geh uă jơnau bơceh lơh, lơh gơlik geh anih, dong kờl priă lơh, pơlam gùng dà broă lơh, mpồl cau lơh broă dong ai ơruh pơnu sơnđờm mŭt lơh broă tam gơl pa bơceh lơh in tàm uă gah broă lơh, tàm hơ̆ geh uă cau lơh sa kă bro là cau kơnòm să neh lơh geh cồng nha tàm gah lơh sa mờ măy mok niam chài, mờ ală phan bơna niam chài cèng bơta krơi is ngan kơnhoàl ù tiah ƀòn lơgar, gơ jăt bal niam chài mờ nhơl chờ, mờ măy mok jak chài pa tŭ do. Bulah bè hơ̆, tàm tơngai tam gơl bơta yau gơ gơs bơta pa lơh sa mờ măy mok dơ̆ 4, mờ bơta bơtàu tơnguh pràn kơldang bơh jak chài mờ kông nghệ dê, bơh tam gơl sồ dê, Kwang ătbồ Ƀan Tuyên giáo dà lơgar ồng Nguyễn Trọng Nghĩa sồr ală kâp ƀộ Đoàn ngui uă ngan bơta pràn bơh anih internet dê, ală tŭ tam gơl sồ dê nàng tơnguh uă bơta gĭt wă bơh rơnàng kơnòm să dê bè bơhiàn kah yau, ală bơta kwơ niam chài niam bơnĕ ngan, krơi is ngan bơh jơi bơtiàn dê kung bè bơngă mờ gơnoar broă bơh niam chài dê gơwèt mờ ală tŭ bơtàu tơnguh dà lơgar.

Ồng Nguyễn Trọng Nghĩa đơs: Ală kâp ƀộ Đoàn ngui uă ngan rlau jơh bơta pràn bơh anih internet dê, ală tŭ tam gơl sồ nàng tơnguh uă bơta gĭt wă bơh rơnàng kơnòm să dê bè bơhiàn kah yau, ală bơta kwơ niam chài niam bơnĕ ngan, krơi is ngan bơh jơi bơtiàn dê kung bè bơngă, gơnoar broă bơh niam chài dê gơwèt mờ ală tŭ bơtàu tơnguh dà lơgar. Tàm dơ̆ tam gơl bơta yau gơ gơs bơta pa lơh sa mờ măy mok dơ̆ 4, mpồl Đoàn pal tơrgùm kơlôi sơnơng, geh ală broă lơh dong kờl ơruh pơnu sơnđờm mŭt lơh broă tam gơl pa bơceh lơh tàm gah broă lơh niam chài; bơyai lơh, bơcri priă, dong kờl ală dơ̆ pơrlòng, rơndăp broă lơh sơnđờm mŭt lơh broă bè niam chài, ală jơnau kơlôi lơh, phan bơna niam chài geh bơta kwơ uă, geh bơta pràn lơh gơrề uă tàm ơruh pơnu, kơnòm pa tàu mờ kơnòm dềt.

Ồng Nguyễn Trọng Nghĩa, Kwang ătbồ Ƀan Tuyên giáo dà lơgar

Tàm dơ̆ cribơyai, ală kwang bàng kung tơrgùm cribơyai ală tơngume bè đal gĭt bơta kwơmàng, bơta tàm bơtờp, bơta lơh gơrềng bơh anih internet dê, ală drơng broă gan nhàr lơgar gơwèt mờ gơnoar broă sền gàr nhàr niam chài bồ tơngoh tàm tơngai tŭ do; bơta geh ngan mờ broă lơh nàng ngui niam bơta kwơ niam chài ờs mờng bơh yau bơh jơi bơtiàn dê pơgồp bơnah dong kờl gah lơh sa mờ măy mok niam chài tàm lơgar Việt Nam bơtàu tơnguh mờ ndrờm pal mờ dunia...Bàr pe nă kwang bàng kung dan geh mpồl gròi sền gơwèt mờ ală phan bơna niam chài tàm anih internet; tă pơgồp jơnau đơs, pơlam gùng dà nàng dong Đoàn Ơruh pơnu Kộng sản Hồ Chí Minh, ală kâp, ală gah mờ rơnàng kơnòm să Việt Nam tus bal ngan ngồn rlau, uă broă rlau tàm broă lơh sền gàr nhàr niam chài bồ tơngoh.

Cau cih VOV1- Cau mblàng Lơ Mu K’Yến