VOV4.K’ho- Tàm Anih tờm Niam chài càr Dăk Lăk, Kụk Bơta chài lơh, Ƀộ Văn Hoá, Thể thao mờ Zu lịc pơgồp bal mờ Ủy ƀan Ñân zân càr Dăk Lăk, Mpồl cau bơceh jơnau đơs crih Việt Nam, Mpồl Cau chài Tam ya Việt Nam pa bơyai lơh dơ̆ pơrlòng đơs crih tam ya gùng đơs crih gùt lơgar nam 2021, dơ̆ 2.

Dơ̆ pơrlòng đơs crih tam ya gùng đơs crih gùt lơgar nam 2021 dơ̆ 2, geh rlau 1 rơbô nă cau chài, cau lơh tus bơh 22 mpồl đơs crih tam ya tàm gùt lơgar. Tơl mpồl dan tus bal lơh 1 broă lơh jòng bơh 65 tus 110 phuk, gơwèt bơta chài là đơs crih, tam ya, gùng đơs crih halà teh kơlñi, đơs crih tam ya lơh lèo, gùng đơs crih lơh lèo. Tàm tơngai bơh tŭ do tus jơh ngai 30/06 tus, ală mpồl geh dơ̆ dùl dơ̆ lơh pơrlòng nàng sac rơ wah ală mpồl jak ngan rlau jơh sắp khà mờ jàu gai lòng.

Pà bơkào mờ phan kir sơn rai ai ală mpồl tus bal dơ̆ pơrlòng in

Jat Nghệ sĩ Ưu tú  Trần Ly Ly, Kwang atbồ ing Kụk Bơta chài lơh, Cau atbồ Mpồl bơyai lơh dơ̆ pơrlòng đơs, tơnơ̆ tơngai jŏ jòng gơtìp gơrềng tài bơh kòp Kovid-19, ală mpồl đơs crih tam ya tus bal tàm pơrlòng neh geh bơta tam gơl uă ngan nàng tơngŏ bơta kờñ broă lơh, lơh tơngŏ bơta chài kung bè bơta kờñ ngan bơceh pa, kờñ ngan tă pơgồp bal dà kơl hề.

Mpồl Dăk Lăk pơrlòng sơnđờm tàm dơ̆ pơrlòng

Jat Nghệ sĩ Ưu tú  Trần Ly Ly đơs: Dơ̆ pơrlòng đơs crih tam ya, gùng đơs crih mờng chài gùt lơgar tơnơ̆ kòp dờng Kovid-19 den rê wơl tàm dơ̆ 2 do mờ 22 mpồl tus bal, mờ ală bơta tềl tơngŏ niam ngan nàng bơtàu tơnguh niam chài đơs crih tam ya kung bè hòi jà ai nhơl chờ Việr Nam in. Tơl nă cau rcang niam ngan mờ ală cau chài mờ ală bơta kờñ ngan tă pơgồp dà kơl hề he dê neh geh lơh jơh nùs. Añ kơlôi là mờ ală tềl tơngŏ bè do den dơ̆ pơrlòng do geh lơh geh ală cồng nha kung bè ală cồng nha là uă ngan.

Jơnau pơrlòng rcang niam ngan mờ uă bơta đơs crih tam ya niam

Tơnơ̆ dơ̆ sơnđờm mut lơh, Mpồl đơs crih tam ya jơi bơtiàn kòn cau càr Dăk Lăk sơnđờm mang lơh dê. Mờ tơngume “Ală pang rùp Bazan pơrhê”, mpồl Dăk Lăk neh cèng tus 11 jơnau lơh niam ngan, cèng bềng bơta niam bơnĕ mờ gùng đơs crih Tây Nguyên dờng ơning ơnàng dê. Bơta rcang lài niam, bơta lơh mờng chài bơh ală cau chài, cau lơhdê bal mờ jơnau ntas cing, mpồl phan teh kòn cau bơh yau neh cèng wơl ală tŭ jiơ jơnau đơs crih tam ya gơ kờñ ngan, bềng bơta gơ lơh ngoh rơngăc, dờp geh bơta kờñ, jơnau dreo dờng jơh nùs bơh cau sền dê. Cau đơs crih Y Hoắt Byă, Mpồl đơs crih tam ya jơi bơtiàn kòn cau Dăk Lăk đơs: Oh mi neh lơh ngan jơh bơta pràn mờ ràng lơh  jơh nùs tàm dơ̆ lơh ngai do dê, sền gŏ he pa lơh den cau sền tàp tê tơn den he lơh kung jơh nùs ngan sơl.

Cau cih H’ Xíu thực hiện – Cau mblàng K’Hạnh