VOV4.K’ho- Mờr tus ngai sa tềp bơhiàn dà lơgar dê, bi Siu Phi Lip deh nam 1992, ơm tàm ƀòn Yon Tok, xã Ia Glai, kơnhoàl Chư Sê, càr Gia Lai gam bal mờ hìu bơnhă rơcăng ală phan sa tàm ngai sa tềp in.

Drăp tơrnờm, puăc kơnrồ ìs tàm tơngai dùl ngai, iar, sur, phe mbar neh geh tơl lơm. Jăt bi đơs, sa tềp ờ gơtùi ờ geh dùl phan cik bơh cau Jrai dê. Hơ̆ là boh ngòñ sràt. Bi bal mờ bi ùr he dê lơh nền lòt tus xã Ia mơr, kơnhoàl Chư Prông, ngài mờ anih bi ơm kis pơgăp 20 kơi sồ nàng jòi ngòñ. Bi Siu Phi Lip, đơs: Boh ngòñ sràt sùm sơnđờm bơh tàm kàl prang, den bơkah ngan rlau jơh. Tài bơh kàl prang geh tăp ngòñ. Kàl prang den añ bơh hìu lòt tus xã Ia Mơr, kơnhoàl Chư Prông, kàl do uă ngan rlau jơh, cèng jăt bal kơldung ni lông, pềs mờ thùng. Gŏ rơsòn ngòñ den he ai mờ rơco dùl êt. Uă tŭ lòt tŭ 3 jiơ drim tus 8 jiơ neh neh tơl kơldung rao, geh tŭ geh tus 2, 3 kĭ tơn, dilah bơtuah. Tŭ rê hờ hìu, he geh tram tàm dà gơ in sàng goh, ìs rañ bơh 1 tus 2 ngai. Tơnơ̆ hơ̆ he bŏ mờ boh, mrĕ, lời tus ngai sa tềp halà lời tus 2, 3 nhai tơn. Mŭt tàm dơ̆ lơh chờ sa tềp, he sùm cik boh do mờ puăc kơnrồ, puăc sur, puăc đe den là bơkah ngan...

Cau mblàng Lơ Mu K’ Yến