VOV4.K’ho- Ngai 28/04, Mpồl lơh broă bơh Mpồl duh broă phan lời wơl niam chài dà lơgar dê neh geh dơ̆ lơh broă mờ Ủy ƀan Ñân zân càr Gia Lai bè jơnau sồr bơh UNESCO dê gơwèt mờ ală phan lời wơl ờ di phan bơna ala măt bơh kòn bơnus gùt dunia dê, sền gàr mờ ngui niam bơta kwơ tiah tềl lời wơl dà lơgar, phan dà lơgar sền gàr.

Jơh gùt anih dơ̆ lơh broă bơh Mpồl duh broă phan lời wơl niam chài dà lơgar dê mờ Ủy ƀan Ñân zân càr Gia Lai

Càr Gia Lai geh 33 tiah tềl lời wơl, mpồl tiah tềl lời wơl neh geh săp sèng. Tàm hơ̆ geh ală tiah tềl lời wơl Tây Sơn Thượng đạo tàm thị xã An Khê geh dờp là tiah tềl lời wơl dà lơgar dờng màng, bal mờ 8 tiah tềl lời wơl dà lơgar mờ 16 tiah tềl lời wơl kâp càr. Bal mờ hơ̆, Ù tiah niam chài cing mồng, Yal yau cau Bahnar dê, Dơ̆ lơh yàng dan mìu bơh Yang Bơtau Apui dê, geh cih tàm sră cih mat phan lời wơl niam chài ờ di phan bơna dà lơgar dê. Mờ ală tiah tềl lời wơl An Khê mờ kơnhoàl Đăk Pơ, ală nam rềp ndo neh gŏ uă phan geh bơta kwơ, geh sơnam geh lơh pơgăp mờ do pơgăp 800 rbô nam, geh sền là tŭ tơngai sơnrờp bơh jơnau kah yau Việt Nam dê. Bulah bè hơ̆, broă prăp gàr ală tiah tềl lời wơl niam chài kwơmàng do kung gam sơl uă kal ke. Tàm dơ̆ lơh broă, ală kwang bàng tàm Mpồl duh broă Phan lời wơl niam chài dà lơgar dê sồr, bal mờ broă pal lơh niam broă lơh prăp gàr, càr Gia Lai pal sền ală phan lời wơl niam chài là bơta pràn kwơmàng nàng bơtàu tơnguh lơh sa, wèt tus bơ̆t bơtàu Gia Lai gơ gơs là anih tus phan lời wơl tàm Tây Nguyên.

Cau mblàng Lơ Mu K’Yến