VOV4.K’ho- Tàm dơ̆ pơrlòng gùng đơs crih gùt lơgar geh lơh tàm ƀòn dờng Buôn Ma Thuột, Mpồl cau bơceh jơnau đơs crih Việt Nam pơgồp bal mờ Mpồl cih sră niam chài đơs crih tamya càr Dăk Lăk neh bơyai lơh Cribơyai Gùng đơs pơnđik kòn cau Tây Nguyên tàm rài kis đơs crih tŭ do. Dơ̆ cribơyai neh gơ hòi gơ jà gal ngan ală cau cih sră, cau chài đơs crih tamya tus bal mờ uă jơnau tàm lùp geh tơngume li la ngan.

Tàm dơ̆ cribơyai, ală cau tus bal neh cribơyai ală tơngume bè: mờng chài bơceh ngui ală gùng đơs pơnđik bơh yau bơh ală jơi bơtiàn kòn cau ơm kis bơh jŏ tàm ƀòn lơgar dê; ngui gùng đơs pơnđik bơh yau nàng ngui tàm ală jơnau bơceh pa; bơta krơi is gùng đơs pơnđik tàm yal yau Tây Nguyên; bơta niam gùng đơs pơnđik Tây Nguyên tàm rài kis mờ niam chài đơs crih pa. Ală cau tus bal cribơyai đơs là, nàng bơceh dùl jơnau đơs crih pa cèng bơta krơi is jơi bơtiàn kòn cau halkà ù tiah, cau bơceh lài ngan pal tus rềp, git gùng đơs pơnđik, gùng đơs crih ală tiah dê bơh ală gùng đơs pơnđik mờ nhơl phan teh gùng đơs crih bơh yau mờng quèng, tiơng pơn rơ bơh jơi bơtiàn kòn cau hơ̆ dê. Bơh hơ̆ cau bơceh geh gùng đơs pơnđik, kơlôi sơnơng mờ ai hơ̆ lơh tơngume nàng ngui tàm jơnau bơceh pa. Cau bơceh jơnau đơs crih Mạnh Trí tàm Dăk Lăk geh jơnau đơs: “Bơta pal geh là he pal lòt sền ngan ngồn, jòi git nàng kơlôi sơnơng gùng đơs, iat là git mơ hơ̆ là gùng đơs pơnđik bơh jơi bơtiàn kòn cau lơi, den tŭ hơ̆ he bơceh hơ̆ sồng di gùng di dà, dilah ờ den gơ ờ di, he ờ kờñ mơya gơ lơh tìs den lơh roh bơta niam chài bơh dùl ù tiah lơi hơ̆”.

Ală jơnau đơs crih tamya Tây Nguyên niam ngan sơn đờm dơ̆ cribơyai

Uă cau tus bal cribơyai kung geh jơnau đơs pal đal git mờ pơn jat tai prap gàr, ngui sùm ală gùng đơs pơnđik nàng lơh gơlik ală jơnau đơs crih pa tàm tơngai tŭ do. Bulah bè hơ̆, broă bơtàu tơnguh do pal geh gùng dà ai tơlik lài mờ pal sền gàr nggu tờm gơ dê tàm tŭ bơtàu tơnguh, pleh broă lơh roh bơta niam chài mờ nggu tờm bơh gùng đơs pơnđik bơh yau dê tŭ ngui kờñ bơceh gơs dùl jơnau đơs crih pa. Cau bơceh jơnau đơs crih- Nghệ sỹ ưu tú A Đuh tàm càr Kon Tum đơs: “Jat añ den pal lơh loh nggu tờm gùng đơs pơnđik khi dê, hơ̆ là gùng đơs pơnđik tờm kung gam gàr bè ờs. Ai bè bơtàu tơnguh, jat tàm ală nggu tờm hơ̆ mờ he bơtàu tơnguh, cih wơl, hơ̆ là gơ ơm tàm bơta bơceh pa ờ di là ai bơta tờm gơ dê nàng lơh roh nggu tờm gơ dê, hơ̆ là bơta tìs he dê, ai he git ngui gơ, bơh gùng đơs niam hơ̆ bol he lơh gơ in niam rlau tai den hơ̆ sồng gơtùi đơs là bơtàu tơnguh, bơceh pa”.

Cau tus bal neh cribơyai song dơpă bè tơngume gùng đơs pơnđik bơh yau Tây Nguyên dê tàm rài kis đơs crih tŭ do

Mờ 12 jơnau tàm lùp geh đơs tàm dơ̆ cribơyai, ală cau tus bal neh cribơyai song dơpă nàng jòi geh ală broă lơh bơceh gùng đơs crih pa di mờ rài kis tŭ do mờ gơtùi jờng rơ bơta niam chài krơi is bơh gùng đơs pơnđik bơh yau bơh ală jơi bơtiàn kòn cau Tây Nguyên dê. Cau bơceh jơnau đơs crih ồng Đỗ Hồng Quân, Củ tịc Mpồl niam chài Mpồl cau bơceh jơnau đơs crih Việt Nam đơs: do là tơngume cèng bơta gơlik geh pah ngai mờ ală jơnau đơs bơh ală cau tus bal cribơyai dê cèng bơta mờng chài uă. Dơ̆ cribơyai là broă lơh kơlôi sơnơng sền tìs dê geh uă bơta kuơ tàm dơ̆ pơrlòng gùng đơs crih gùt lơgar dơ̆ do. Ồng Đỗ Hồng Quân đơs: “Mờ ală jơnau đơs den tơl nă cau ndrờm geh dùl bơta kơp kờñ bal là lơh bè lơi nàng gùng đơs crih Tây Nguyên bol he dê ờ mìng gơtùi gàr bè ờs, prap gàr mờ gam geh ală bơta nàng ngui sùm, geh bơtàu tơnguh bơh ală jơnau bơceh pa bơh ală cau bơceh jơnau đơs crih ngai do dê. Mờ bơta kuơmàng tai là ờ mìng ngui ală gùng đơs pơnđik bơh yau bơh ală jơi bơtiàn kòn cau Tây Nguyên dê mờ bơh bơta hơ̆ den nàng bol he bơceh ală gùng đơs crih pa, ală tơngume pa, den bè hơ̆ hơ̆ sồng gơtùi tơnguh bơta gơ rềng gùng đơs pơnđik mờ kung di mờ bơta kơp kờñ bơh làng bol dê, hơ̆ là gùng đơs crih lòt bơh đơs pơnđik bơh yau tus gùng đơs crih pa.”

Cau mblàng K’Duẩn