VOV4.K’ho- Nghệ ñân H’Ƀim Kƀuôr (sùm hòi là mè Blan), 50 sơnam, ơm tàm ƀòn Ƀling, xã Cư̆ M’gar, kơnhoàl Cư̆ M’gar, càr Dăk Lăk là cau jơh nùs ngan mờ bơta niam chài bơh yau dê. Ală nam do, mò sùm kờñ ngan jòi gĭt mờ bơsram ală bơta kwơ niam chài bơh yau jơi bơtiàn he dê. Ờ mìng kờñ đơs jơnau đơs crih, teh phan teh kòn cau lơm gời mờ mò H’Ƀim kung gam jak ngan tàñ ồi yau mờ tàn sơ̆, sah.

Làng bol mờ gơ̆p bơyô gam iăt jơnau đơs Eirei bơh săp đơs nghệ nhân mò H’Ƀim Kƀuôr dê. Làng bol ƀòn Ƀling sùm hòi mò H’Bim là nghệ ñân geh uă bơta chài. Mò kah uă jơnau đơs Eirei, mờ bơta chài tơlik akhar jơnau đơs pơn đick ngăc ngar, mò gơtùi đơs Eirei bè khat dùl tơngume lơi tàm rài kis pah ngai dê. Bơdìh hơ̆ mò kung gam đơs gùng đơs Kư̆t, bơh jŏ là ală cau nghệ ñân klau dê sùm đơs.

Jat bơhiàn kòn cau Rơđê dê, pah tŭ iês ƀồc, cau sùm đơs Eirei nàng pơndờm pơniang hìu bơnhă cau chơ̆t dê, yal bè rài kis bơh cau neh chơ̆t. Geh săp đơs crih jơnhoa, niam, mpong gơ kờñ ngan mờ cau iăt, den pah dơ̆ hìu bơnhă lơi geh cau chơ̆t tàm ală ƀòn rềp, ngài, hìu bơnhă hơ̆ sùm jà nghệ nhân H’Ƀim Kƀuôr tus đơs Eirei. Tơl nă cau gơ ơm tàm jơnau đơs, gùng đơs Eirei bal mờ săp đơs iăt bơkah tồr ngan bơh nghệ ñân dê. Nghệ ñân H’Ƀim Kƀuôr đơs, pah dơ̆ lòt đơs tàm hìu geh cau chơ̆t gơtùi đơs tus mang àng tài bơh bơta kờñ, đơs nàng pơn dờm pơniang hìu bơnhă cau chơ̆t dê, đơs yal wơl bè rài kis bơh cau neh chơ̆t dê, kung bè đơs bè bơta kờñ gơboh bal ùr klau, đơs bơto tơngkah oh kòn kòn sau kis niam, geh kwơ. Bơdìh hơ̆ mò kung đơs tàm ală dơ̆ lơh chờ ƀòn lơgar dê, dơ̆ ràng tơlik đơs crih tam ya, tìp mat lơh kwèng mờ ală tiah ndai. Mò H’ Ƀim Kƀuôr đơs: Añ lòt đơs Eirei uă ngan rlau jơh tàm ală dơ̆ tơ̆p ƀồc, tàm hìu pơrjum mpồl bơtiàn, tàm ală dơ̆ lơh chờ, añ kung lòt đơs tàm ală xã, kơnhoàl ndai bè lòt đơs tàm càr ndai sơl. Ală jơnau mờ he ờ hềt gĭt den he kơno cau ndai đơs den hơ̆ sồng he iăt mờ bơsram jat bal. Geh ală jơnau he đơs yal bè rài kis kal ke nùs nhơm gơlơh ngoh rơngăc den đơs jài ñìm jài. Bơdìh hơ̆ añ kung tañ sơ̆, đồng, nir mờ đơs jài Eirei sơl...

Nghệ ñân H’Ƀim uh điñ năm

Nghệ ñân H’Ƀim đơs: bơta kờñ gơboh jơnau đơs pơn đick mờ phan teh kòn cau neh gơmut tàm poăc mhàm mò dê bơh tàm tŭ dềt, pah dơ̆ jat mè bèp lòt tàm mìr, kơno gùng uh điñ năm bơh ồng, bơh bèp dê mò jòi gĭt is, bơsram is broă uh mờ tus 14 sơnam mò uh jak ngan điñ năm mờ bàr pe phan teh kòn cau ndai bè điñ tut, điñ buốt... Ờ mìng jak đơs tàm tơrbŏ bal tŭ đơs jơnau đơs pơnđick, gĭt loh phan teh kòn cau, jak tàñ sơ̆, sah lơm mò gam gĭt tàñ ồi yau mờ ală gùng bơkàobơka niam krơi is ngan.

Rài kis pa tŭ do, broă lơh niam chài geh bơta tàm bơrlŭ bal. Rơnàng kơnòm să kờñ mờ bơta pa, mờ gam kờñ mờ bơta niam chài bơh yau tai. Kơlôi sơnơng tềng bơta geh ngan hơ̆, nghệ ñân H’ Ƀim Kƀuôr sùm hòi ală kơnòm pa tàu tus nhơl tàm hìu; tàñ sơ̆ jài đơs Eirei jài, yal jơnau niam chài ai ală kơnòm dềt in nàng ală kơnòm dềt sơlơ kờñ gơboh jơnau đơs pơn đick, bơta niam bơnĕ bơhiàn niam chài jơi bơtiàn he dê. Mò đơs: Añ kờñ bơto tơngkah mờ bơtê oh kòn kòn sau in gĭt mờ kờñ gơboh bơta niam chài jơi bơtiàn he dê. Dilah bè bol he ngan ngồn neh geh bơta chài den pal lơh ngan jòi gĭt, bơsram sùm, ờ gơtùi lời huĭ ală gùng đơs pơnđick, jơnau đơs pơnđick, phan teh kòn cau dê ờ. Bulah lòt tiah lơi kung ờ huĭ tơngu ryah tờm.

Nghệ ñân H’Ƀim đơs Eirei

Ồng Y Nguk Niê (hòi là ồng Suang) ơm tàm ƀòn Huk B, xã Cư̆ M’gar, kơnhoàl Cư̆ M’gar, càr Dăk Lăk là dùl tàm ală nghệ ñân sùm lòt đơs bal mờ ùr nghệ ñân H’Ƀim đơs, nghệ ñân H’Ƀim geh uă bơta chài ngan, pơgồp bơnah prap gàr mờ ngui niam bơhiàn niam chài rơgơi jơi bơtiàn kòn cau dê tàm ƀòn lơgar mờ geh làng bol kờñ gơboh. Ồng mờ làng bol tàm ƀòn sền dờng màng ngan ală bơta tă pơgồp bơh nghệ ñân H’Ƀim dê. Ồng Y Nguk Niê đơs: Añ kung là nghệ ñân dờng sơnam, mơya đơs ờ jak bè nghệ ñân H’Ƀim ờ. Uă ngan nghệ ñân dờng sơnam neh rê mờ ồng pàng, bol añ là rơnàng tơnơ̆ do ờ rơngòt ală dơ̆ lòt yal tơngĭt jơnau đơs pơn đick, phan teh kòn cau, cing mồng jơi bơtiàn he dê gùt ală ƀòn lơgar rềp, ngài in.

Ồng A Măng- Phó Kwang atbồ Cơdŭ lơh broă Niam chài yal tơngĭt jơnau kơnhoàl Cư̆ M’gar, càr Dăk Lăk pà gĭt: tàm tiah do tŭ do kung gam geh bàr pe nă nghệ ñân yau. Hơ̆ là ală cau geh nùs nhơm jơh nùs ngan mờ bơta niam chài bơh yau bơh jơi bơtiàn he dê. Tàm hơ̆, mò H’Ƀim Kƀuôr là dùl tàm ală nghệ ñân pơn rơ jak ngan. Ồng A Măng đơs: Nghệ ñân H’Ƀim geh săp đơs niam ngan, tàm ală tŭ đơs gơtùi tàm sơrbŏ bal mhar ngan, săp đơs mpong, mờ uă cau kờñ iăt ngan. Pơgồp bơnah gàr niam, prap gàr, bơdìh mờ tus bal ală dơ̆ ràng tơlik, dơ̆ pơrlòng kung bơyai lơh mblàng yal jơnau đơs pơn đick kòn cau Rơđê he dê bè đơs Eirei, đơs kư̆t.

Iăt nghệ ñân H’Ƀim Kƀuôr yal jơnau, sền ală phan bơna mờ mò tàñ mờ iăt kơno mò đơs jơnau đơs pơn đick niam ngan, bơkah tồr ngan, làng bol tàm ƀòn sền gĭt ală bơta hèr, bơta niam. Bơh hơ̆, sơlơ kờñ gơboh mờ sền dờng màng broă prap gàr bơhiàn niam chài bơh jơi bơtiàn he dê.

Cau mblàng K’Hạnh