VOV4.K’ho- Dar pơrlòng bơh sơnrờp Futsal HDBank Jak ngan Dà lơgar nam 2022 ngan ngồn sơnđờm tàm pơrlòng tàm ƀòn dờng Dà Làc, càr Lâm Đồng dê tàm ngai do 01/06. Jơh ală broă lơh rơcăng ai dơ̆ pơrlòng in neh geh Mpồl bơyai lơh mờ anih lơh broă geh gơnoar bơh càr Lâm Đồng dê lam lơh sir jơh. Dơ̆ pơrlòng Futsal HDBank Jak ngan Dà lơgar nam 2022 geh 11 mpồl tus bal.

Mpồl bơyai lơh pơn jăt tai lơh jăt broă tàm pơrlòng tam pà gơs 2 tơngai nàng gơguh tai bơta tàm pơrlòng, bơta lơh gơkờñ mờ bơta niam bơh ală dơ̆ tàm pơrlòng dê. Tơngai dơ̆ dùl (dar sơnrờp) geh lơh bơh ngai 01/6 tus ngai 09/06, mờ 5 mpồl tus bal. Ală mpồl do geh tàm pơrlòng dar pơdar dùl dar nàng kờp điềm, săp sèng. Tàm hơ̆ 4 mpồl geh săp sèng jơnhoa ngan rlau jơh geh mŭt pơrlòng tơngai dơ̆ 2 bơh dơ̆ pơrlòng dê. Tơngai dơ̆ 2 geh 10 mpồl tus bal tàm pơrlòng dar pơdar geh 2 dơ̆ lòt mờ rê. Tàm hơ̆, dơ̆ lòt geh lơh bơh ngai 13/06 tus ngai 04/07 tàm anih tờm Pơlam tàp mờ tàm pơrlòng tàp pràn să jan càr Lâm Đồng, dơ̆ rê kờp dŭ geh lơh bơh ngai 5/11 tus ngai 26/11/2022 tàm Hìu tàm pơrlòng Đa năng Cần Thơ.

Cau mblàng Lơ Mu K’Yến