VOV4.K’ho- Ồng A Blôih, kòn cau Sơdàng ơm tàm ƀòn Hring, xã Ea Hđing, kơnhoàl Cư Mgar, càr Dăk Lăk là nghệ ñân ưu tú. Mờ bơta kờñ gơboh đơs pơnđik mờ geh kơnòl tàm broă sền gàr niam chài bơh jŏ jơi bơtiàn kòn cau dê, ală nam do, ồng neh tus bal đơs pơnđik tàm ală dơ̆ pơrlòng đơs pơnđik tamya kòn cau bơh kơnhoàl mờ càr bơyai lơh. Bal mờ hơ̆, nghệ ñân A Blôih gam bơto teh đờng, đơs pơnđik, dròng cing jañ mồng ai ală cau kơnòm să in mờ mòn ală phan teh gùng đơs crih mờ gle, đơr, pơgồp bơnah sền gàr mờ ngui sùm niam chài bơh jŏ kòn cau Sơdàng dê.

Pah dơ̆ geh tŭ rê còp ƀòn Hring, xã Ea Hđing, kơnhoàl Cư Mgar, càr Dăk Lăk boh bơr mờ làng bol den uă cau tàm ƀòn ndrờm git tus nghệ ñân ưu tú ồng A Blôih. Pah nam, tàm ƀòn sùm bơyai lơh chờ ñô lir bông halà ală dơ̆ mờ gah niam chài tàm xã bơyai lơh dròng cing jañ mồng, đơs pơnđik den ndrờm bè ồng A Blôih geh mat lơm, tus bal jơh nùs mờ geh kơnòl ngan.

Rlau 2 nam do, tài bơh kòp Kovid-19 gơlik geh kal ke tàm mpồl bơtiàn, bulah ờ geh tơrgùm gal cau mơya mờ nùs nhơm geh kơnòl uă, bal mờ bơta kờñ gơboh, bơta jơh nùs he dê, ồng A Blôih kung gam lơh ngan jòi tơrgùm ală jơnau dròng cing jañ mồng, ală gùng đơs pơnđik nàng bơto wơl ai ală nghệ ñân tàm ƀòn in. Bơdìh hơ̆ tai, ồng gam geh bơta chài mòn ală phan teh gùng đơs pơnđik kòn cau bè đờng ting ning, đờng t’rưng, klông pút... Ồng A Blôih pà git: “Lài do, să tờm añ dê mìng là cau tus bal đơs crih, dròng cing, jañ mồng mờ nhơl ală phan teh gùng đơs crih kòn cau, digơlan añ ờ gơtùi lơh dilah ờ geh ală rơnàng lài do, ală nghệ ñân lam lài, khi tŭ lơi kung kờñ dong kờl, pơlam mờ bơto wơl añ in. Tàm pơ dờn ală bơta lơi mờ nghệ ñân lài do neh tă pơgồp dà kơl hề nàng jòi tơrgùm, pơlam tàp, bơto bơtê wơl den tàng añ pal kơ̆ dơn bơsram gơ in gơtùi. Tŭ do, añ pơn jat tai cih jơnau pa ai ală gùng đơs pơnđik in bè: rơngê, ting ning, chiếo... Tus tŭ do, añ kung neh mòn gơs 2, 3 bơta phan teh gùng đơs crih kòn cau bè đờng ting ning, t’rưng, klông pút”.

Nghệ ñân ưu tú ồng A Blôih

Nàng sền gàr ù tiah niam chài cing mồng bơh ƀòn Hring dê, ồng A Blôih neh lời uă nam nàng hòi jà làng bol tàm ƀòn mờ 2, 3 nă làng bol tàm ƀòn ndai tus bal. Tus tŭ do, nghệ ñân neh crơng gơs uă mpồl cing mồng- đơs pơnđik, tàm hơ̆ geh rlau 20 nă nghệ ñân bơh ƀòn Hring dê. Tŭ do, ồng gam pơlam, bơto bơtê tơn ai ală sau tàm ƀòn in bè bơta chài dròng cing jañ mồng, đơs pơnđik mờ ală gùng đơs niam ngan, tàm hơ̆ geh bal mờ kòn klau tơnhua ồng dê, sơn đan là A Gut. A Gut pà git, tŭ do neh ngui chài ngan 2, 3 bơta phan teh gùng đơs crih bơh jŏ bè cing mồng, đơng t’rưng, git đơs uă jơnau pơnđik kòn cau Sơdàng dê: “Añ là cau kơnòm să, añ geh lơh ngan nàng tề lam ală oh pơn jat tai sền gàr niam chài bơh jŏ mờ bèp ồng neh lời wơl, mùl màl là ngui ală phan teh gùng đơs crih mòn mờ gle, đơs bơh kòn cau he dê. Añ git kàr lơi den geh bơto wơl ală oh in kàr hơ̆, Kơp kờñ ală oh git bè gùng đơs pơnđik mờ bơta chài nhơl đờng t’rưng. Tơngai tus do, dùl poh añ geh lời bơh 1 tus 2 ƀùi nàng bơto ală oh in git bè bơta chài nhơl đờng t’rưng. Rơnàng cau kơnòm să bol hi ờ huĭ bơta kuơ niam chài bơh jŏ mờ bèp ồng neh lời wơl”.

Sră jờng nghệ ñân ưu tú A Blôih

Ai ồng A Héo, là nghệ ñân tàm mpồl cing mồng- đơs pơnđik ƀòn Hring den gŏ là, nghệ ñân ưu tú ồng A Blôih là cau jak ngan mờ jơh nùs mờ niam chài bơh jŏ kòn cau he dê: “Bè cing mồng den añ gŏ nghệ ñân A Blôih geh kơnòl ngan, pơlam, bơto bơtê wơl nền nòn ngan ai oh mi bol hi in bè bơta chài dròng cing, jañ mồng. Chờ hờp ngan là tŭ do nghệ ñân kung neh bơto kòn klau ồng dê in git dròng cing mồng sơl. Ồng A Blôih pơlam, bơto bơtê jơh nùs ngan ai oh mi bol hi in bè ală jơnau cing mồng kòn cau Sơdàng dê. Gơtùi geh bơta hơ̆ là kơnờm geh bơta kơlôi sơnơng, bơta jơh nùs mờ mờng chài uă nam bơh ồng dê. Bè bơta niam dròng cing jañ mồng den kơnờm ồng geh uă mờng chài den tàng oh mi bol hi iang nùs ngan, bol hi neh geh tŭ lòt lơh tàm uă tiah bơh kâp xã, kơnhoàl tus kâp càr, geh tŭ bol hi gam geh lơh, geh pơrlòng tàm ƀòn dờng Pleiku, Hà Nội tai”.

Bơh tŭ git dròng cing jañ mồng, đơs pơnđik tus tŭ do neh rlau 40 nam, ồng A Blôih neh lời uă tŭ tơngai, dà kơl hề nàng bal mờ mpồl bơtiàn cau Sơdàng sền gàr, ngui sùm bơta niam chài bơh jŏ kòn cau he dê. Bulah bè hơ̆ ồng gam uă bơta kơlôi rơcang tềng đap jơnau pơhìn gơtìp roh huĭ ală bơta kuơ niam chài, ngan là gơ wèt mờ cau kơnòm să: “Lài ngan, pal mblàng yal ai cau kơnòm să in git bè ală bơta kuơ niam chài bơh jŏ kòn cau dê, tàm hơ̆ geh bal mờ dròng cing jañ mồng, đơs pơnđik. Pa do, añ geh lùp 2, 3 nă ơruh pơnu tàm ƀòn, 2, 3 nă ală oh dềt den jơh nùs kờñ geh bơsram dròng cing, nhơl ală phan teh gùng đơs crih kòn cau. Bơdìh hơ̆ tai, kung geh 2, 3 nă ơruh pơnu ờ huan kờñ bè phan teh gùng đơs crih kòn cau, gùng đơs pơnđik bơh jŏ he dê. Hơ̆ là dùl bơta moat jrùm ngan, añ tŭ lơi kung kờñ bơto wơl ală oh, ală sau in nàng khi in git dròng cing jañ mồng, git đơs pơnđik. Să tờm añ ờ mìng mòn đờng ting ning, t’rưng, mờ gam mòn tai ală phan nhơl gùng đơs crih ndai bơh gle đơs bè kơl wờk, klông put”.

Nghệ ñân ưu tú ồng A Blôih bal mờ kòn klau A Gut (teh đờng t’rưng ơm đah kiau) tàm cơldŭ kup sap đơs crih bơh VOV Tây Nguyên dê

Mờ bơta kờñ gơboh, bơta jak chài, bơta jơh nùs mờ ală dà kơl hề tă pơgồp he dê, nam 2019, ồng A Blôih neh geh dà lơgar pà khà jờng “Nghệ ñân ưu tú” tàm gah “Niam chài bơyai lơh jơnau bơh yau kòn cau dê’, ồng gơ gơs là Nghệ ñân ưu tú cau Sơdàng sơn rờp ngan bơh càr Dăk Lăk dê. Ai làng bol tàm ƀòn den mờng hòi ồng A Blôih là cau gàr huềng gùng đơs pơnđik bơh jŏ bơh cau Sơdàng dê.

Cau mblàng K’Duẩn