VOV4.K’ho- Gơ ơm tàm ală broă lơh wèt tus ngai duh kah bơtau sơnrờp dà lơgar dê bơtau Hùng ngai 10/03, jăt nam lơgar he, Ƀảo tàng Kah yau dà lơgar neh bơyai lơh broă lơh dơ̆ lòt nhơl “Rê mờ rài Hồng Bàng” tàm hơ̆ geh ală broă lơh lòt sền nàng gĭt bè rài bơt bơtàu dà lơgar bơh ală bơtau Hùng dê kung bè lòt sền nàng gĭt bè bơhiàn mờng kwèng tàm dơ̆ lơh chờ pơrjum ñô sa chờ hờp bơh làng bol Việt Nam rài yau dê. Mờ tàm ngai sơnrờp tơlik măt tơn, dơ̆ lòt nhơl “Rê mờ rài Hồng Bàng” neh mhar ngan gơhòi gơ jà bơta sền gròi bơh uă làng bol dê.

Dơ̆ sơnrờp lòt nhơl tàm dơ̆ lòt nhơl “Rê mờ rài Hồng Bàng”, bi Phạm Văn Tuấn, cau bơsram Hìu bơsram Sĩ quan Lụk quân dùl, Ƀộ Quôk phòng bal mờ ală cau bơsram bal geh tŭ lòt sền nàng gĭt nền cê bè jơnau kah yau bơ̆t bơtàu dà lơgar mờ sền gàr dà lơgar bơh ală bơtau Hùng dê kung bè lòt sền ală phan kwơ dà lơgar dê Sơnggơr Lơngô Ngọc Lũ, Ƀồc ơhò Việt Khê bơh broă lơh lòt sền ală anih ràng tơlik: Bơh broă lơh dong bol añ gĭt wă jrô ơnàng rlau bè jơnau kah yau jơi bơtiàn dê, gơlơh sền dờng màng ngan, ưn ngài ală rơnàng cau lài do neh roh uă dà kơlhề bơ̆t mòn. Broă lơh ngai sơlơ geh bơta kwơ rlau tŭ geh lơh di tàm tơngai jơh gùt jơi bơtiàn gam wèt tus ngai duh kah bơtau sơnrờp dà lơgar dê ngai 10/03.

Ală cau bơsram tus bal nhơl chờ “Kŭp ndùng tàm yang”

Tơnơ̆ tơn broă lơh lòt còp, ală cau bơsram tàm Hìu bơsram Sĩ quan Lụk quân dùl geh bơto pơlam, lòt sền nàng gĭt bơhiàn mờng kwèng ờs mờng bơh yau bơh làng bol Việt Nam rài yau dê bè “Piah kòi rơnai yô” (pơrlòng piah kòi, pruh mờ khum phe”, kŭp ndùng tàm yang, wăc rùp bơka tềng măt sơnggơr lơngô Ngọc Lũ, lơh sơgơn tơrnò sềm lơh bơka să tàm dơ̆ lơh chờ. Pơgồp bal tus bal lơh ală broă lơh nàng gĭt mờ ală cau bơsram tàm Hìu bơsram Sĩ quan Lụk quân dùl, Ƀộ Quôk phòng, bơyô Minh là cau bơsram dờng nam lồi dŭt Hìu bơsram Đại họk Văn Hoá Hà Nội đơs: Oh gŏ dơ̆ lòt nhơl do geh kwơ ngan, ai jơh tơl nă cau in lòt sền nàng gĭt tai bè jơnau kah yau, ngan là tàm ală ngai lơh chờ bè do, lơh gơs ală jơnau nhơl ờs mờng bơh yau nàng lơh tơngkah wơl mơkung nàng ală bơyô bè oh geh lơh nàng gĭt ală broă lơh bè piah kòi halà kŭp ndùng tàm yang pa nàng kah bè nggu rơyas ƀòn lơgar tờm mờ bơdìh hơ̆ tai gam gĭt wă tai bè ală phan bơna bơh ƀảo tàng dê, kwơmàng là ală phan kwơ dà lơgar bè sơnggơr lơngô Ngọc Lũ.

Jăt mò Nguyễn Thị Định, Phó Kwang ătbồ Phòng Giáo zụk làng bol, Ƀảo tàng jơnau kah yau dà lơgar, broă pơgồp bal yal tơngĭt ală phan bơna kah yau mờ broă lơh lòt sền nàng gĭt li la ngan jăt tơngume là gùng dà broă lơh geh kwơ dong năc lòt còp in sơlơ kờñ gơboh tai mờ gĭt wă tai jơnau kah yau jơi bơtiàn dê. Mò Nguyễn Thị Định, đơs: Tàm bồ nhai 3 jăt nam lơgar he den chờ hờp bal mờ nùs nhơm bơh jơh gùt lơgar dê wèt tus ngai duh kah bơtau Hùng, Ƀảo tàng jơnau kah yau dà lơgar kung bơyai lơh dơ̆ lòt nhơl geh tơngume “Rê mờ Hồng Bàng” mờ kơ̆p kờñ bơh bol añ dê tŭ bơyai lơh dơ̆ lòt nhơl do là ală bơyô lòt sền nàng gĭt bè tơngume, lòt sền nàng gĭt ală broă lơh gơrềng tus tơngume do, kơ̆p kờñ geh lơh kah wơl ai ală bơyô in bè dà kơlhề bơh ală bơtau Hùng dê, ală cau geh dà kơlhề bơ̆t bơtàu dà lơgar mờ bơto bơtê bơhiàn “hùc dà kah tô dà”, “sa plai kah cau tam chi”.

Bal mờ ală broă lơh tờm, làng bol gam geh tus bal nhơl ală jơnau nhơl bơh yau bè yàl che, tàm dŭi che, sơnđoh ƀào dờng, nhơl gơpài, nhơl ô quan; mòn phan bơh ù buh mờ kƀàng pơdar, lơh rùp Đông Hồ, rùp klìu...lơh phan bơna kir sơnrai. Gŏ geh ală tềl tơngŏ niam ngan mờ dơ̆ lòt còp “Rê mờ rài Hồng Bàng” dê cèng wơl, Thượng tá Nguyễn Bá Quốc, Ƀí thư Đảng ủy, Cíñ trị viên Tiểu đoàn 1, Hìu bơsram Sĩ quan Lụk quân dùl, pà gĭt: Loh làng dilah mìng bơh ală broă lơh đơs mờ bơr mờ sră pơ àr lơm halà bơh ală rùp hin den gơtùi ơm tơn tàm hìu, bơh ală anih yal tơngĭt jơnau mpồl bơtiàn halà ală sră ƀăo den bol añ kung gam gơtùi sền nàng gĭt geh mơya loh làng tàm do là geh yal tơngĭt mờ ală rùp hin mờ ală phan bơna mơkung geh bơsram tàp lơh nàng gĭt jơh ală broă lơh geh ngan den loh làng là geh bơta kwơ uă rlau mờ ngan ngồn là geh lời wơl ală jơnau kah wơl jrô ơnàng ngan tàm kwang bàng, cau ling bơh mpồl hìu bơsram dê.

Tê tờm tàp lơh phan bơh ù buh tàm kƀàng pơdar

Duh kah Bơtau bơh sơnrờp  dà lơgar dê Bơtau Hùng là ngai chờ dờng bơh jơi bơtiàn dê, là tŭ nàng bơto bơtê bơhiàn “Hùc dà kah tô dà”, tơngŏ nùs nhơm gĭt uă ngài jrô ơnàng ală bơtau Hùng neh geh dà kơlhề bơ̆t bơtàu dà lơgar mờ ală cau lài do tam dră mờ bol sò tơm sơgràm phà dà lơgar nàng sền gàr dà lơgar. Bơh hơ̆, tơl nă cau sùm bơsram, bơsram tàp nùs nhơm bơta jak nàng drơng ai broă lơh bơ̆t bơtàu dà lơgar, dipalo mờ dà kơlhề bơh ală rơnàng cau khin cha jak chài jơi bơtiàn dê mờ mò pàng he dê rài yau. Broă lơh dơ̆ lòt nhơl “Rê mờ rài Hồng Bàng” geh bơyai lơh tus jơh ngai 11 nhai 04 do tàm Ƀảo tàng Jơnau kah yau dà lơgar.

                  Cau cih Thủy Tiên- Cau mblàng Lơ Mu K’Yến