VOV4.K’ho- Pơrlòng niam chài bơh jŏ ală kòn cau tiah Trường Sơn- Tây Nguyên rề ơnàng dơ̆ 3 nam 2022 tàm tiah nhơl chờ brê bơnơm dà lơgar Măng Đen, thị trấn Măng Đen, kơnhòal Kon Plông, càr Kon Tum bal mờ broă lơh ràng tơlik ală tềl lời wơl, ală broă tàm pơrjum gah jat yàng, lơh chờ; ală bơta đơs crih tamya kòn cau, ràng tơlik phan soh kòn cau... gam geh bơta bơ tòm tơrgùm niam chài phan sa kòn cau ală tiah dê bơh dơ̆ pơrlòng klau chài, ùr jak neh gơ hòi gơ jà làng bol mờ nac nhơl chờ tus sền.

Tàm ràng tơlik niam chài bơh jŏ ală jơi bơtìan kòn cau tiah Trường Sơn- Tây Nguyên rề ơnàng dơ̆ 3 nam 2022 tàm tiah nhơl chờ brê bơ nơm dà lơgar Măng Đen, thị trấn Măng Đen, kơnhòal Kon Plông, càr Kon Tum, pơrlòng klau chài, ùr jak geh tơnggume yal tơnggŏ sơlàu pơ dơng phan sa ờs mờng kòn cau he dê geh bơta gơ hòi gơ jà krơi is ngan tus mờ làng bol mờ nac nhơl chờ

19 mpồl nghệ ñân bơh 19 càr, geh 5 càr Tây Nguyên mờ ală càr: Tuyên Quang, Vĩnh Phúc, Bắc Ninh, Hải Dương, Hà Nam, Thanh Hóa, Nghệ An, Quảng Trị, Thừa- Thiên Huế, Quảng Nam, Quảng Ngãi, Đồng Nai, An Giang mờ ƀòn dờng Hồ Chí Minh neh yal tơnggit git nđờ rhiang phan sa ờs mờng bal mờ bơta bơkah krơi is ngan. Ồng Nguyễn Công Trung, Phó Kwang atbồ Kụk niam chài kâp hơ đơm- Ƀộ Văn hóa, Thể thao mờ Zu lịc pà git: “Jơi bơtìan kòn cau he geh niam chài phan sa li la ngan. Bol hi ờ di bơyai lơh pơrlòng trŭ gơm phan sa mờ là ràng tơlik dùl sơlàu pơ dơng phan sa ờs mờng. Bol he geh uă ngan ală ngai chờ, ngai sa tềp, ngai lơh yàng. Tơl jơi bơtìan ndrờm geh sơlàu pơ dơng phan sa ờs mờng is he dê. Bơh dơ̆ pơrlòng do, bol hi kờñ yal tơnggit tus gal ngan làng bol in git bè ală sơlàu pơ dơng phan sa ờs mờng bơh tơl jơi bơtìan kòn cau oh mi tàm gùt lơgar dê”.

 Tiah Trường Sơn – Tây Nguyên mờ ală bơta phan sa ờs mờng bè piang prùh tàm ding đơr, iar buh, nha bùm blàng wơr... lơh uă cau mìng pa rơp sa dùl dơ̆ kung gơtùi kah bè bơta bơkah, bơta krơi is bơh ală phan sa do dê. Nghệ ñân Ksor Chung ơm tàm ƀòn Kép, ƀòn dờng Pleiku, gơ wèt Mpồl càr Gia Lai đơs bè bơta krơi is bơh ală phan cik tàm sơlàu piang cau Jrai dê bè do: “Ală phan cik do là mờng quèng, geh ngui sùm pah ngai nàng sàu piang halà cèng lòt tàm mìr. Geh boh ngòñ sràt, boh plăng lào, boh nha é.. Ai do là plai mat kơnrồ dê, he lơh boh cik kung ai bơh plai mat kơnrồ dê sơl. Boh ngòñ sràt den bol hi lòt tàm brê nàng kup. Ai boh do dà kòn cau hòi là cờ roách, kơnuh do kung ai bơh tàm brê sơl nàng lơh phan tĕ. Dà cik halà wơr nha bùm mblàng kung pal geh cờ roach nàng wơr. Cau Jrai tàm tŭ lơh yàng halà rơcang sơlàu piang pah ngai là ờs mờng bloh, ai nac nhơl chờ den sa dùl dơ̆ là khi kờñ mờ kah sùm”.

Mpồl càr Tuyên Quang yal tơnggit sơlàu pơ dơng phan sa ờs mờng kòn cau Dao Tiền dê mờ biap iar hồl bơrlŭ nha cañ, poac rơpu buh, poac sur buh, cuh tơn bluh trồm, ƀắp sú dềt lơh nộm mờ ka buh; ală biap trŭ bơh ka ndung... geh trŭ gơm nền nòn ngan, geh dà màu mờ ƀô bơkah krơi is ngan. Mpồl An Giang yal tơnggit sơlàu pơ dơng phan sa mờ ală phan sa ờs mờng cau Khmer dê bè ƀañ ca, ală phan sa geh lơh bơh plai thốt nốt halà gỏi kơn rồ Khmer. Nghệ ñân Lê Quang Nhuận, Mpồl ƀòn dờng Hồ Chí Minh yal tơnggit ală phan sa ờs mờng bơh đum sum mờ ală bơta ƀañ ƀao tiơng pơn rơ ngan cau Lo dê: “Đum sum là hòi bal ai ală phan sa geh rùp rài dềt, geh dùl tap ƀòk bơh bơdìh lơ hơ mờ tàm dơlam là să. Geh 2, 3 bơta đum sum ờs mờng bè há kảo ka ti, há kảo poac, xíu mại ka ti poac. Ai mìng is gơ wèt mờ ƀañ ƀao, geh mòn mờ li la rlau pơndrờm mờ ƀañ ƀao bè ờs. Ƀañ ƀao dờng geh 8 nai tap, ƀañ ƀao bơceh mòn gơs rùp. Rùp să lơh gơlik bơta krơi is mờ niam ngan. Ƀañ ƀao plai đào geh ngui nàng drơng ai ală dơ̆ lơh yàng hìu bơnhă halà tàm ală dơ̆ sa tềp”.  

Mờng quèng mơya kung niam ngan là jơnau đơs bal bơh làng bol, nac nhơl chờ kung bè uă cau jak chài phan sa dê tŭ sa ală phan sa tàm sơlàu pơdơng phan sa ờs mờng bơh ală jơi bơtìan kòn cau dê geh 19 mpồl nghệ ñân yal tơnggit tàm tơngume ală broă lơh bơh Pơrlòng ràng tơlik niam chài bơh jŏ ală jơi bơtìan kòn cau tiah Trường Sơn- Tây Nguyên rề ơnàng dơ̆ 3 nam 2022.

Cau mblàng K’Duẩn