VOV4.K’ho - Tŭ do, geh uă ngan cau bơyô gam kơnòm să bal mờ làng bol kis tàm ală ƀòn Tây Nuyên neh geh uă broă lơh nàng prăp gàr, tơnguh bơta niam chài rơgơi ờs mờng kòn cau dê, nàng wă cau năc nhơl chờ tus tơnơ̆ mờ kòp kovid-19 gơtờp neh geh kơrian, nàng brồ guh lơh sa, ring niam rài kis.

Bŭ lah sơnam gam kơnòm, mơya bi Siu Thanh, 25 sơnam, kis tàm ƀòn Pleiky, thị trấn Nhơn Hoà, kơnhoàl Chư Pưh chài ngan mờ broă dròng cing kòn cau dê. Bi Siu Thanh pà git, bi git dròng cing bơh tŭ gam dềt, git uă ngan jơnau cing ờs mờng. Mơya, bơta niam chài rơgơi cing mồng tàm càr Gia Lai đơs is mờ ală càr tàm Tây Nguyên đơs bal gam di gơlan gơtìp roh, ờ geh cau bơto. Den tàng, tàm tơngai tus, bi Siu Thanh kơ̆p kờñ geh broă sền gròi rơlao tai bơh ală kấp, gah lơh broă, nàng bơto pơlam, yal bơta niam chài rơgơi cing mồng tàm ală anih pờ tơlik jơnau đơs; lơh wơl ală broă lơh chờ ờs mờng geh pơnrơ niam pơgồp bal mờ broă lơh chài rơgơi cing mồng. Bi Siu Thanh đơs: “Bơh lài tus tŭ do, añ sùm lơh ngan jơh nùs nàng prăp gàr mờ yal bơta niam chài rơgơi ờs mờng geh mò ồng neh lời wơl bơh yau, geh dùl bơta gơtìp moăt ngan là tŭ do, làng bol he neh huĭ rơhời bơta do. Mơya tŭ do, añ gam bal mờ ală oh mi tàm ƀòn lơh ngan yal ală bơta niam chài rơgơi tàm bơta chài rơgơi kòn cau dê nàng ală bơyô rềp ngài in git bal. Mờ tŭ do pal lơh ngan rơlao tai tàm broă bơto wơl ală rơnàng tơnơ̆ do in git dròng cinh, nàng oh kòn he tơnơ̆ do pơn jăt tai prăp gàr mờ tơnguh bơta niam chài rơgơi ờs mờng kòn cau he dê”.

Là kwàng bàng bơh Cơldŭ lơh broă Niam chài, Yal tơngĭt jơnau kơnhoàl Kbang, càr Gia Lai dê, Đinh Mỡi geh kơnòl ătbồ bàr pe tiah nhơl chờ jơnau kah yau bơh kơnhoàl dê. Broă lơh tờm bơh bi dê là pơlam mờ yal năc lòt nhơl in bè srơh kăc màng bơh làng bol ƀòn lơgar dê tàm 2 rài tam lơh mờ bol sò tơm Tây, bol sò tơm Mỹ mờ ală bơhiàn niam chài ờs mờng bơh yau bơh cau Bahnar dê. Mơya, bơh bồ nam 2021 tus hờ ndo, broă lơh nhơl chờ tàm do gơtìp gơrềng tài bơh kòp dờng Kovid-19, mơya bi kung gam hòi jà làng bol kơ̆ nùs tàp bơsram, gàr sùm mpồl cing mồng, tàñ ồi yau. Tŭ do, gah nhơl chờ neh geh tềl tơngŏ bơtàu tơnguh wơl, bi mờ làng bol chờ hờp geh broă rơndăp lơh pơn jăt tai tă pơgồp bơta pràn yal tơngĭt ràng tơlik ală bơhiàn niam chài, jơnau kah yau bơh kơnhoàl ù tiah ƀòn lơgar Kbang khin cha jak chài ai năc lòt nhơl in. Bi Đinh Mỡi, Kwang bàng lơh broă niam chài tàm kơnhoàl Kbang, càr Gia Lai, đơs: Tiah tềl lời wơl jơnau kah yau niam chài kâp càr hơ̆ là Tiah 10 tàm xã Krong, kơnhoàl Kbang, càr Gia Lai neh geh lơh bơtàu wơl. Do là tiah tềl lời wơl jơnau kah yau kwơmàng ngan, tàm 2 nam do, kòp bơtờp gơbàn kơn jơ̆ ngan, gah nhơl chờ kal ke ngan. Tŭ do, tŭ kòp bơtờp neh ờ huan đau, nhơl chờ geh tềl tơngŏ bơtàu tơnguh wơl, să tờm añ geh lơh ngan pơgồp bal mờ làng bol bơ̆t bơtàu mờ bơtàu tơnguh cing mồng, ală bơta niam chài, ală broă lơh bè đơs pơnđik, tam ya, đơs crih tam ya mờ bơh hơ̆ dong sền gàr mờ ngui niam, bơtàu tơnguh ală bơta niam chài ờs mờng bơh yau jơi bơtiàn he dê niam rlau mờ yal tơngĭt rùp hin nhơl chờ ai năc lòt nhơl tàm lơgar mờ bơdìh lơgar in. Ală cau chài kung bè làng bol bal mờ gơ̆p sền gàr, yal tơngĭt, ràng tơlik rùp hin jơnau kah yau mờ mblàng yal wơl ai ală oh kòn, kòn sau in nàng oh kòn, kòn sau in gĭt geh tiah kwơmàng gơwèt mờ kăc màng, gơwèt mờ làng bol tàm Gia Lai đơs is mờ jơh gùt lơgar đơs bal.

Ală ngai lơh jăt broă tam cah ngài mpồl bơtiàn nàng rơcang sơndră mờ kòp kovid-19 gơtờp là tơngai mờ mò Thị Pyơm, kis tàm ƀòn Bu Nrung, xã Dăk Bu So, kơnhoàl Tuy Đức, càr Dăk Nông lơh ngan tàñ gơs ală bơta ồi yau. Mò pà git, rơlao 60 nam đềt mềr mờ broă tàñ ồi yau, ờ hềt tŭ lơi mò tàñ uă bè tơngai pa do, Tŭ do, rài kis neh rê wơl bè ờs, mò pơn jăt tai bơto tàñ ồi nàng ală oh kòn, kòn sao in git mờ prăp gàr bơta niam chài rơgơi kòn cau dê. “Ală pang ồi yau añ tàñ bneh tăc jơh. Bơdìh hơ̆ tai, añ tàñ nàng ngui tàm hìu nhă tai. Añ kung tàñ uă phan ồs mờng nàng prăp gàr ai oh kòn in, mờ bơto oh kòn in git tàñ ồi nàng prăp gàr broă lơh ờs mờng do. Tŭ do, ală cau git tàñ ờ gal tai, di lah ờ bơto den cau gam kơnòm ờ git tàñ”.

Cau mblàng Lơ Mu K’ Yến - Ndong Brawl