VOV4.K’ho- Tus mờ phan sa bơh cau Rơđê dê bơdìh mờ ală phan sa bơkah mùl gŏ bơh ală bơta biăp brê gam geh ală phan sa bơkah mơnga ngan geh gơm bơh bơkàu brê, bè bơkàu bơlhong, bơkàu núc nác, đo ju...Cau Rơđê ngui bơkàu lơh gơs biăp sa mờ trŭ gơm gơs ală phan sa bơkah, phan sa sơnơm sơm kòp geh cồng nha ngan. Tàm hơ̆, ờ gơtùi ờ yal tus phan sa lơh bơkah kờñ ngan cau bơh bơkàu rơmĭt brê.

Mŭt tàm pơgăp nhai 4, nhai 5 là kàl bơkàu rơmĭt brê tàm pơrlòng să lì niam ngan. Cau Rơđê tàm jà tai gơ̆p àñ sơ̆ lòt pik bơkàu rơmĭt brê. Bơh rài yau, cau Rơđê neh gĭt trŭ gơm biăp sa bơh bơkàu rơmĭt brê. Tài bè hơ̆, rùp să bơkàu rơmĭt brê kung geh đơs tus tàm ală jơnau đơs pơnđik mờ jơnau đơs tàm pơn jăt ờ tŭ lơi jơh bơh cau Rơđê dê. Tờm bơkàu hòn lềng do mìng lì bơkàu tơnơ̆ ală dơ̆ mìu bồ nam. Ờ mìng cèng bơta niam hàng bơnĕ ngan bơh brê bơnơm Tây Nguyên dê mờ ală dơ̆ sa piang lơi geh biăp sa trŭ gơm bơh bơkàu rơmĭt brê ngan ngồn glah piang hơ̆ ờ gam tai bơsàp bơr. Bi H’Lai H’đơ̆k, ơm tàm ƀòn Cuôr Knia, xã Ea Bar, kơnhoàl Buôn Đôn, càr Dăk Lăk pà gĭt, bơkàu brê trŭ gơm geh uă ngan phan sa bơkah kờñ ngan cau. Tơnơ̆ tŭ pik rê plŏk jơh đar bơkàu, mìng lời wơl ngkhòr tàm dơlam sàng bềng dà gời lơm. Do ngan là bơnah bơkah ngan rlau jơh bơh bơkàu rơmĭt brê dê nàng trŭ gơm gơs ală biăp sa bơkah kờñ ngan cau. Bi H’Lai H’đơ̆k, yal: Broă gơm lài ngan he ràu goh, tơm bà mờ dà duh rơmbăc, tơnơ̆ hơ̆ kuă lời rơsơh dà mờ bŏ mờ khuah phòng. Broă dơ̆ bàr là he tơm bà sơl, kuă lời rơsơh dà, tơnơ̆ he wơr mờ ka hâp, hala ka lề, cĕ tai dùl êt mrĕ den bơkah ngan.

Bơdìh hơ̆ tai, ngkhòr bơkàu gơtùi tơm bà, hồl sin halà wơr mờ pròc iar geh gàr bè ờs bơta ƀô thồm mùl gŏ bơh bơkaù dê, bơta rơbă bơkah ngan bơh ngkòng bơkàu dê kung sa lơh gơkờñ ngan cau. Să bơkàu rơmĭt gơtùi bŏ mrih halà buh rơđồ tàm bơnhă ồs rơnga bal mờ ka rị, boh mrĕ mờ ƀòk ngòk bŏ lề ngan gơ gơs phan sa ro. Bi Y Đăp Êya, ơm tàm ƀòn Nui, xã Tâm Thắng, kơnhoàl Cư Jŭt, càr Dăk Nông yal: lài do, pah dơ̆ lòt mìr, làng bol tàm ƀòn pik geh dùl sơ̆ cèng rê lơh biăp sa. Mơya tŭ do, geh uă năc jòi blơi bơkàu rơmĭt brê rê nàng trŭ gơm gơs biăp sa den tàng mŭt tàm kàl bơkàu rơmĭt brê làng bol lòt jòi pik mờ cèng rê tăc mờ ală cau năc in nàng geh tai priă jền. Ngan den tàng bè hơ̆ mờ bơkàu krơi is ngan do kung gơlik gơs ờ huan ngan geh sơl. Bi Y Đăp Êya, đơs: Bơkàu rơmĭt brê hòn jăt tơl tiah. Gơ jăt tàm bơta kờñ bơh tơl nă cau dê geh trŭ gơm gơ gơs biăp sa krơi is. Añ kờñ tơm bà mờ bŏ lề mờ khuah phòng, hañ brê, mrĕ. Tŭ do, bơkàu rơmĭt brê kung ờ huan geh tai, lòt ală tiah ngài rlau den hơ̆ sồng pik geh uă gơ.

Kàl bơkàu rơmĭt brê mìng geh dùl dơ̆ tàm nam, pơlai soh ngan dilah cau lơi tus mờ ƀòn lơgar Rơđê dê tàm dơ̆ do mờ ờ geh sa biăp sa trŭ gơm bơh bơkàu rơmĭt brê. Bơkàu rơmĭt brê gam bè ờs bơh yau, sàng goh mờ niam bơnĕ ngan ờ mìng wăc sềr gơs dùl pang rùp niam ai tiah kơh bơnơm bazan in lơm mờ gam lơh gơs tai ală biăp sa cèng bơta ƀô bơkah ngan bơh brê bơnơm dê tai.

Cau cih H’Zawut Byă- Cau mblàng Lơ Mu K’Yến