VOV4.K’ho- Lơh chờ phan sa mờ nhơl chờ ƀòn lơh broă Hà Nội nam 2022 di Sea Games dơ̆ 31 kờñ yal phan sa Hà Nội, yal tus cau năc nhơl chờ tàm lơgar mờ lơgar bơdìh in bơta niam ƀòn lơh broă ờs mờng bơh càr lơgar-do là tiah tơrgùm geh 47 tàm 52 broă lơh ờs mờng bơh càr lơgar dê.

Lơh chờ kờp dŭ geh bơyai lơh tàm 5 ngai, bơh ngai 19 tus 23 nhai 5, tàm tiah jăt gah gùng Lê Quang Đạo, quận Nam Từ Liêm (tam toh mờ gùng pơrlòng F1). Mpồl bơyai lơh pà git, lơh chờ geh 6 tiah jăt tơl tơngu me krơi is, tàm hơ̆ geh ờ uă ƀòn lơh broă ờs mờng neh tơnguh bơtàu geh bal kă bro mờ nhơl chờ mờ ală broă nhơl chờ ƀòn lơh broă geh gốm sứ Bát Tràng, ƀòn lơh broă tàñ ồi bơrteh Vạn Phúc, tàñ rơyah, gle Phú Vinh, sơn mài Hạ Thái, Sơn Đồng... Do là broă lơh kờñ hòi jà nhơl chờ geh bơyai lơh dờng mờ geh kwơ màng ngan, lam sồr làng bol càr lơgar đơs is mờ lòt nhơl chờ tus ală tiah niam Hà Nội dê; hòi jà làng bol ală tiah tàm gùt lơgar tus mờ càr lơgar Hà Nội đơs bal; mờ yal ală bơta kwơ niam bơnĕ bơh ƀòn lơh broă, phan sa Hà Nội dê.

Cau mblàng Ndong Brawl