VOV4.K’ho- Drim ngai 24/04, tàm ƀòn dờng Kon Tum, Ƀộ Văn hoá, Thể thao mờ Zu lịc càr Kon Tum pơgồp bal mờ Ủy ƀan Ñân zân càr dê bơyai lơh Pơrjum “Nhơl chờ Kon Tum- Bơta pràn mờ gơn kơnờm”.

Ƀộ trưởng Ƀộ Văn hoá, Thể thao mờ Zu lịc ồng Nguyễn Văn Hùng

Pơrjum do gơhòi gơ jà bơta tus bal bơh mờr 500 nă cau ala măt dê là ală cau ătbồ, cau jak chài lam bồ gah do; Tơrgùm ală mpồl, tập đoàn mpồl lơh sa kă bro nhơl chờ, hìu năc, pơndiang phan pơndiang năc; kwang bàng ala măt tus bơh bàr pe càr tiah đah jum lơgar Lào, đah tô mat tơngai lik lơgar Campuchia geh bal gùng nhàr lơgar mờ càr Kon Tum.

Đơs tàm pơrjum, Ƀộ trưởng Ƀộ Văn hoá, Thể thao mờ Zu lịc ồng Nguyễn Văn Hùng đơs nền, Ƀộ mờ ală tiah tàm gùt lơgar gam geh uă broă lơh, jơh nùs lam lơh ală broă lơh nàng bơtàu tơnguh wơl broă lơh nhơl chờ tơnơ̆ tơngai gơbàn kòp dờng Kovid-19. Pơrjum “Nhơl chờ Kon Tum- Bơta pràn mờ gơn kơnờm” là tŭ niam nàng mpồl lơh sa kă bro in tìp măt, lơh kwèng, kĭ hơ lơh broă bal tàm gah nhơl chờ tàm càr.

Cau mblàng Lơ Mu K’Yến