VOV4.K’ho- Pơrlòng đơs crih tamya, gùng đơs crih gùt lơgar dơ̆ 2 nam 2021 pa geh lơh tàm càr Dăk Lăk. Ală ngai do, ală mpồl đơs crih tamya mờng chài bơh ală càr, ƀòn dờng tàm gùt lơgar neh cèng tus cau sền in ală jơnau bơyai lơh niam ngan. Tơl nă cau chài mờ ală mpồl ndrờm lơh ngan jơh pràn nàng bơyai lơh dùl bă wil tơl.

Ai bơta kờñ gơboh bơh broă bơtàu tơnguh bơh ù tiah mờ kòn bơnus dê, mpồl đơs crih tamya càr Bình Dương tus bal pơrlòng đơs crih tamya, gùng đơs crih gùt lơgar dơ̆ 2 nam 2021 mờ broă lơh đơs crih tamya geh tơngume “Bình Dương- Ù ram- Nùs nhơm kòn bơnus”. Tàm 2 tap “Ù tiah ram” mờ “Nùs nhơm kòn bơnus”, cau sền gơtùi git gŏ tơl tŭ tơngai bơh bơta bơtàu tơnguh càr dê, bơh jơnau kah kir bè dùl tŭ tơngai rồ ù, bơt bơtàu ƀòn lơgar bal mờ ală ƀòn lơh broă bơh yau. Tus ală tŭ tơngai tam gơl pa lơh sa mờ măi mok, tŭ Bình Dương gơ gơs là ƀòn dờng lơh sa mờ măi mok, là tiah bơ tòm tơrgùm bơh làng bol làm gùt bă tiah dà lơgar dê tus ơm kis, lơh broă sa lơh.

Ồng Trần Thanh Sơn, Kwang atbồ Anih tờm niam chài- đơs crih tamya càr Bình Dương là cau tờm pơlam đơs crih tamya, cih mờ lam lơh đơs crih tamya pà git, mờ ală jơnau đơs crih, tamya, nhơl bal phan teh gùng đơs crih, đơs crih mpồl bal, jơnau đơs crih tamya tơrgùm rlau 70 nă cau chài, cau đơs cih, krang bàng, cau lơh broă tus bal mờ dong kờl: “Do là dùl dơ̆ pơrlòng đơs crih tamya, gùng đơs crih tamya mờng chài den tàng kung pal geh bơta rơcang lài nền nòn mờ ală broă lơh tàp bol hi dê kung geh lơh bơh rlau 2 nhai sơl. Bơta niam bè đơs crih tamya, gùng đơs crih den ndrờm là bol hi ngui ală dà đơs bơh Bình Dương dê lơm, kờp bal phan nhơl gùng đơs crih là ală phan mòn bơh Bình Dương dê lơm bè yang, gri, khàr, mờ ală dang che đơr alà pang mpàn bol hi pơgồp wơl gơs dùl mpồl nhơl gùng đơs crih kòn cau nàng ai tơnggŏ do là dùl bơta niam chài krơi is, mờ Bình Dương geh phan lơi den he ngui phan hơ̆”.

Tơl mpồl cèng tus dơ̆ pơrlòng in dùl bơta niam chài krơi is bơh tơl tiah dê

Pơrlòng đơs crih tamya, gùng đơs crih gùt lơgar dơ̆ 2 nam 2021 geh 22 mpồl đơs crih tamya bal mờ rlau 1 rbô nă cau chài mờ kwang bàng, cau lơh broă gah niam chài đơs crih tamya tàm gùt lơgar tus bal. Bulah kòp Kovid-19 neh gơ rềng uă ngan tus ală broă lơh niam chài đơs crih tamya mơya ală mpồl neh geh uă bơta pơn đơl pràn, lơh ngan, bơceh pa tàm broă lơh gơs ală jơnau pơrlòng, jơnau tus bal bơyai lơh mờ uă bơta krơi is. Sơrlèt gan ală kal ke, bơta ờ niam tài gơ rềng bơh kòp bơtờp mờ tŭ tơngai tàp gơ jă gơ jal, ală cau chài neh pơn đơl jơh pràn nàng gơtùi geh ală jơnau tus bal pơrlòng niam ngan rlau jơh. Cau đơs crih A Tâm, mpồl đơs crih tamya càr Kon Tum đơs: “Tus bal pơrlòng dơ̆ do gơ lơh krơi rlau. Tài tơnơ̆ tơngai kòp bơtờp, jơh tơl broă lơh đơs crih tamya đơs is mờ ală broă lơh ndai đơs bal den tus pơrlòng dơ̆ 2 do den ală cau chài ndrờm kơp gơn lơm. Hơ̆ là bơta lơh ngan bơh jơh gùt mpồl, bơh mpồl kwang đơng lam bồ, bơh anih lơh broă, mpồl lơh broă mờ jơh bal ală cau pơlam dê sơl neh lơh broă dùl bă jơh nùs ngan, jơh pràn tàm dùl tơngai bulah ờ huan jŏ jòng ir mơya jơh tơl nă cau neh dùl nùs bal”.

Ờ mìng gơ wèt mờ ală mpồl tus bal pơrlòng, gah niam chài đơs crih tamya càr Dăk Lăk kung neh lơh ngan sơl nàng ai tơnggŏ niam gơnoar broă bơh mpồl tờm bơyai lơh dê. Jat ồng Đặng Gia Duẩn, Phó Kwang atbồ Sở Văn hóa- Thể thao mờ Zu lịc càr Dăk Lăk yal, bulah tàm bơta geh ngan là phan bơna ờ tơl pơndrờm mờ jơnau kờñ đơs crih tamya bơh uă jơnau pơrlòng dê mơya càr neh lơh ngan nàng wă rò mờ rơndap anih niam ngan rlau jơh ai rlau 1 rbô nă cau chài tus bal pơrlòng in, lơh jat jơnau sồr bơh ală mpồl dê nàng gơtùi geh jơnau pơrlòng wil tơl ngan rlau jơh. Ồng Đặng Gia Duẩn đơs: “Broă lơh rơcang lài ai dơ̆ pơrlòng in dùl bă nền nòn ngan, jơh ală tơngume pơrlòng tus phan bơna, sap ntas, bơta àng, anih ơm wơl, broă drơng gàr tus ală tơngume ndai den Dăk Lăk neh lơh jat ală jơnau kờñ pal geh tus ală jơnau kờñ uă rlau bơh ală mpồl dê. Jat jơnau đơs bơh ală mpồl dê den tus tŭ do, mpồl tờm lơh là càr Dăk Lăk neh lơh niam kơnòl bơh mpồl tờm bơyai lơh dê”.

Ală jơnau tus bal pơrlòng geh rơcang lài nền nòn bè tơl bơta

Geh lơh bơh ngai 17 tus jơh ngai 30/6, pơrlòng đơs crih tamya, gùng đơs crih gùt lơgar dơ̆ 2 nam 2021 geh mờr 200 jơnau tus bal pơrlòng tàm tơl bơta bè đơs crih, tamya, teh phan nhơl gùng đơs crih dùl nă să, nhơl phan gùng đơs crih mpồl bal, kải lương, lơh lèu đơs crih, cèo, tuồng. Tơl jơnau pơrlòng jŏ jòng bơh 65 tus 100 phuk neh cèng tus cau sền in ală jơnau yal bè rài kis mờ bơta niam chài krơi is. Hơ̆ là cồng nha lơh broă mờ bơta pơn đơl pràn, bơta lơh ngan bơh tơl nă cau chài, tơl mpồl niam chài đơs crih tamya dê nàng pơgồp bơnah tàm cồng nha mờ bơta gơ rề uă bơh dơ̆ pơrlòng dê, ai ală bơta đơs crih tamya tus rềp rlau mờ làng bol.

Cau mblàng K’Duẩn