VOV4.K’ho - Drim ngai 10 nhai 02, tàm Ƀảo tàng-Thư viện càr Kon Tum, Mpồl cau cih ƀăo càr Kon Tum bơyai lơh sơn đờm Ràng tơlik ƀăo Nam pa Ñâm Zần càr Kon Tum nam 2022 mờ tơngu me “Chờ gờm Đảng jăk chài, Chờ gờm Nam pa Ñâm Zần”.

                Cau sền ƀăo tàm dơ̆ ràng tơlik sră ƀăo Nam pa Ñâm Zần càr Kon Tum nam 2022

Đơs tàm dơ̆ sơn đờm, Phó Củ tịc UɃÑZ càr Kon Tum ồng Nguyễn Hữu Tháp đơs tờm, ràng tơlik ƀăo nam pa Ñâm Zần càr Kon Tum nam 2022 là ngai chờ bơh ală cau cih ƀăo; Dong kờl yal ală phan sră ƀăo tus mờ cau sền; Lam sồr nùs nhơm lơh broă tơriang tơriồng, bơceh lơh bơh mpồl cau cih ƀăo nàng di pal mờ broă kờñ jơnau tơngit ngai sơlơ geh uă bơh cau sền, cau iăt in

Yal bơta niam chài rơgơi phan sa ờs mờng tàm dơ̆ ràng tơlik sră ƀăo Nam pa Ñâm Zần càr Kon Tum nam 2022

Tàm Pơrjum ƀăo nam pa Ñâm Zần càr Kon Tum nam 2022 gam geh bơyai lơh uă broă bè: tus sa phan sa ờs mờng kòn cau Bơnhàr, Jeh-Triêng; Anih ràng tơlik rùp niam Ù tiah mờ Kòn bơnus Kon Tum; Yal ală phan OCOP càr dê mờ 5 hìu ràng phan... geh bơyai lơh bơh ngai 10 tus 13 nhai 2, ràng tơlik ƀăo nam pa Ñâm Zần càr Kon Tum nam 2022 là dơ̆ nàng mpồl cau lơh ƀăo lơh broă tàm ală anih lơh sră ƀăo tìp bal, bơsram bal broă mờng chài, bơh tŭ hơ̆ geh tai jơnau git wă nàng tơnguh broă lơh ƀăo. Do kung là dơ̆ nàng càr Kon Tum yal ală bơta niam chài rơgơi niam bơnĕ ngan tus mờ làng bol, cau năc tàm càr mờ càr ndai in.

Cau mblàng Ndong Brawl