VOV4.K’ho- Tàm tơngume Pơrlòng đờn ca tài tử dà lơgar dơ̆ 3 Cần Thơ nam 2022, drim ngai 07/4, Ƀộ Văn hóa, Thể thao mờ Zu lịc pơgồp bal mờ ƀòn dờng Cần Thơ bơyai lơh ràng tơlik phan nhơl gùng đơs crih bơh jŏ ală jơi bơtiàn kòn cau Việt Nam nam 2022. Dơ̆ bơyai lơh ràng tơlik 100 pang rùp mờ rlau 200 sră nggal, phan lời kir phan bơna, sră nggal đơs bè rài kis phan bơna mờ nùs nhơm bơh ală jơi bơtiàn kòn cau, ală ù tiah tàm gùt lơgar. Tàm hơ̆, đơs nền tus bơta phan nhơl gùng đơs crih bơh jŏ niam ngan, tiơng pơn rơ bơh ală jơi bơtiàn kòn cau Việt Nam dê.

Ràng tơlik geh lơh mờ uă broă lơh bal mờ tơngume li la. Phan nhơl gùng đơs crih ală jơi bơtiàn kòn cau tiah kơh bơnơm đah tô dà lơgar niam mờ krơi is mờ kơm buat, kơ wào bơh cau Mông dê; tiah kềng gah dà lềng tàm gùl lơgar mờ sơng gơr Parnưng, sơng gơr Ghi năng, kơm buat Saranai... Ală jơi bơtiàn kòn cau tiah Trường Sơn- Tây Nguyên geh cing mồng, rơ kèl ngke rơpu, đờng T’rưng, kơm buat, đờng lŭ, đờng ding đơr, kơ wào điñ năm, bơr lềm...

Cau mblàng K’Duẩn