VOV4.K’ho - Drim òr (21/04), tàm bảo tàng tam lơh Hồ Chí Minh, Kụk Cíñ trị Quân khu 7 bơyai lơh ràng tơlik rùp “Bơta pràn ling klàng bal mờ làng bol tàm tam lơh Hồ Chí Minh mờ tam dră mờ kòp gơtờp, dong klàs làng bol”.

                                                               Tus sền dơ̆ ràng tơlik

Ràng tơlik geh yal rơlao 300 pang rùp, sră, phan geh ală mpồl ling he ngui tàm dơ̆ sò tơm mờ ntào tam lơh kàl prang nam 1975 mờ rơlao 500 pang sră. Bơta ơàng ràng tơlik geh lơh jăt 2 tơngu me: Bơta pràn ling klàng mờ làng bol tàm dơ̆ sò tơm mờ ntào tam lơh kàl prang nam 1975; Ling klàng mờ làng bol he dùl nùs bal lơh ngan jai pha kòp Kovid-19 gơtờp. Đơs tàm dơ̆ sơn đờm ràng tơlik, Đại tá Thái Thành Đức, Phó kwang atbồ Kụk Cíñ trị Quân khu 7 đơs: tam klăc bal ling klàng mờ làng bol là bơta tờm geh bơta pràn lơh geh jai pha tam lơh kàl prang nam 1975. Tàm dơ̆ kòp Kovid-19 dơ̆ 4, ling klàng bal mờ làng bol Quân khu 7 neh geh rơlao 200 ngai tam dră mờ kòp gơtờp. Ai tơlik uă nùs nhơm “Tam dră mờ kòp bè tam dră mờ ling sò tơm”, mờr 10 rơbô nă ling tờm bơh Quân khu 7 mờ rơlao 70 rơbô nă ling gàr ƀòn lam lài tus tàm tiah gơtìp kòp.

Cau mblàng Ndong Brawl