VOV4.K’ho- Ngai 14/04, Ủy ƀan Ñân zân càr Kon Tum pơgồp bal mờ Hìu bơsram Đại họk Đà Nẵng tàm Kon Tum mờ Mpồl gĭt gơ̆p lơh bơyô bal Việt Nam- Lào- Campuchia càr Kon Tum bơyai lơh Sa tềp bơhiàn yau Bunpimay mờ Chol Chnam Thmay ai ală kơnòm bơsram lơgar Lào mờ Campuchia gam bơsram tàm càr in.

Dơ̆ lơh yàng duh khuai mang tàm jàu sơnam bơh lơgar Campuchia dê

Tàm broă lơh do, cau ala măt mờ ală kơnòm bơsram lơh jăt broă lơh kơ̆t brài tềng ngko tê tàm dơ̆ sa tềp bơhiàn yau Bunpimay lơgar Lào dê mờ lơh yàng duh khuai mang tàm jàu sơnam sa tềp bơhiàn yau Chol Chnam Thmay lơgar Campuchia dê, chờ hờp bal tam ya jơnau Lăm Vông,...Di tàm dơ̆ do, Ủy ƀan Ñân zân càr Kon Tum, Hìu bơsram Đại họk Đà Nẵng tàm Kon Tum neh pà ală bơnah phan pà geh kwơ ngan mờ ală jơnau nting bơr gờm chờ niam bơnĕ ngan tus mờ ală kơnòm bơsram in di dơ̆ sa tềp bơhiàn yau. Geh gĭt, tŭ do geh rlau 160 nă cau bơsram dờng lơgar Lào mờ 17 nă cau bơsram dờng lơgar Campuchia gam bơsram tàm Hìu bơsram Đại họk Đà Nẵng tàm càr Kon Tum.

Cau mblàng Lơ Mu K’Yến