VOV4.K’ho - Drim òr (26/05), tàm ƀlàng coh plai ƀòn dờng Buôn Ma Thuột, mpồl coh plai Việt Nam, Sở Văn hoá Thể thao mờ Du lịc càr Dăk Lăk bal mờ Ƀăo Thiếu niên Tiền phong mờ Nhi đồng pơgồp bal bơyai lơh sơn đờm dar mpồl III bơh dơ̆ pơrlòng coh plai U13 kơnòm dềt gùt lơgar Cup Yamaha nam 2022.

                                       Mpồl bơyai lơh pà bồng bi lời kir ai ală mpồl coh plai in

Tus bal dar coh plai mpồl III bơh dơ̆ coh plai U13 kơnòm dềt gùt lơgar Cup Yamaha nam 2022 geh 7 mpồl coh plai tus bal, tàm hơ̆ geh: Bình Dương, Khánh Hoà, Phú Yên, QNK Quảng Nam, Quảng Ngãi, Hoàng Anh Gia Lai mờ càr Dăk Lăk. Bal mờ mpồl III geh sơn đờm tàm càr Dăk Lăk, den mpồl I, II mờ IV geh bơyai lơh tàm ờ uă càr, ƀòn dờng tàm gùt lơgar. Bŭ lah dar coh plai mpồl, mơya dơ̆ pơrlòng geh bal tàm broă pơrlòng dà lơgar dê, ală cau pơrlòng ndrờm là ală cau jăk gam kơnòm bơh mpồl coh plai ală càr, ƀòn dờng dê, geh bơto di pal, niam tàm broă coh plai.

Cau mblàng Ndong Brawl