VOV4.K’ho- Mang ngai 29/03, tàm xã Ka Đơn, kơnhoàl Đơn Dương, càr Lâm Đồng neh geh lơh Dơ̆ sơnđờm mŭt lơh Ngai chờ Niam chài, Tàp pràn să jan tiah jơi bơtiàn kòn cau dùl êt nă cau càr Lâm Đồng dơ̆ 5 nam 2022.

Mblàng yal bè ngai chờ tàm ală gùng drà, ƀòn lơgar

Mờ tơngume “Mpong ntas tiah kơh bơnơm”, Ngai chờ Niam chài, Tàp pràn să jan tiah làng bol jơi bơtiàn kòn cau dùl êt nă cau càr Lâm Đồng dơ̆ 5 nam 2022 geh rlau 300 nă cau chài tus bơh 12 kơnhoàl mờ ƀòn dờng tàm càr dê tus bal. Tàm tơngai 2 ngai, ngai chờ geh lơh uă broă lơh nàng mblàng yal bè prăp gàr, ngui niam bơta kwơ phan lời wơl Ù tiah niam chài cing mồng Tây Nguyên; tàm pơrlòng lơh jăt geh cồng nha Kơrnoăt Pơrjum dờng kwang bàng ala măt gùt lơgar dơ̆ XIII bơh Đảng dê.

Ală mpồl cau chài tus bal ràng tơlik ală phan ồi yau kòn cau he dê

Kwơmàng là dơ̆ sơnđờm mŭt lơh mờ Mang chờ tam klăc dờng “Mpong ntas tiah kơh bơnơm”, uă jơnau lơh geh lơh jăt broă lơh lèu, lơh tơngŏ wơl jơnau lòt rò yàng Ồs, Yàng Cing, lơh yàng duh khuai bơtơ̆t dơng dà bơh cau Cru dê; pơrlòng trŭ gơm phan sa mờ dròng cing mồng, tam ya, broă lơh ơm kis mpồl bơtiàn bơh ală cau chài là cau Mạ, cau K’ho dê...Bơdìh hơ̆ tai, ngai chờ gam geh lơh ală dơ̆ pơrlòng bè tàp pràn să jan, ală jơnau nhơl bơh yau, pơrlòng dròng cing mồng mờ đơs pơnđik...

Cau mblàng Lơ Mu K’Yến