VOV4.K’ho- Ngai 19/05, tàm ƀòn dờng Buôn Ma Thuột, Mpồl cau bơceh đơs crih Việt Nam pơgồp bal mờ càr Dăk Lăk bơyai lơh Pơrlòng đơs crih gùt lơgar dơ̆ dùl nam 2022 mờ bơta tus bal bơh mpồl đơs crih tam ya bơh 20 càr mờ ƀòn dờng tàm jơh gùt lơgar dê. Geh lơh bơh tŭ do tus jơh ngai 20 nhai do, pơrlòng đơs crih gùt lơgar dơ̆ do geh 52 jơnau đơs crih gơwèt ală bơta đơs crih, teh kơlñi, ngui đờng goòng.

Pơrlòng đơs crih gùt lơgar dơ̆ dùl nam 2022 geh bơyai lơh tàm Dăk Lăk

Tơngume ală jơnau đơs crih jờng rơ Đảng, Ƀác Hồ, Dà lơgar mờ tơngume dà lềng, bồt bơlào Việt Nam; cồng nha lơh geh, srơh bơ̆t bơtàu ƀòn lơgar pa tàm lơgar he tŭ do. Kwơmàng geh uă jơnau đơs crih geh bơceh jăt gùng đơs crih yau ală kơnhoàl ù tiah ƀòn lơgar dê, ngan là gùng đơs crih bơh yau tiah Tây Nguyên dê.

Pơrlòng đơs crih là ngai chờ bơh cau bơceh đơs crih mờ cau gơboh jơnau đơs crih dê nàng kờñ jờng rơ, yal tơngĭt ală jơnau đơs crih, broă lơh đơs crih pa, pơn jăt tai pơndờm pơnđiang, hòi jà bơta jòi sơnơng bơceh pa tàm ală gah broă lơh: bơceh cih, lơh đơs crih tam ya mờ bơto đơs crih; Kung là tŭ tìp măt cribơyai, tàm lùp bơta mờng chài bơceh jơnau đơs crih đah ală cau bơceh jơnau đơs crih, ală cau đơs crih lơh geh jơnau kờñ iăt sền jơnau đơs crih tam ya ngai sơlơ uă bơh làng bol dê.

Cau mblàng Lơ Mu K’Yến