VOV4.K’ho - Bơh 36 dơ̆ coh geh bơyai lơh tàm ƀòn dờng Dà Làc, càr Lâm Đồng, dơ̆ lòt bơh dar coh plai Futsal HDBank dà lơgar nam 2022 neh tơn jơh tàm mho ngai òr (04/07).

               Tơn jơh dơ̆ sơnrờp bơh pơrlòng coh plai Futsal HDBank dà lơgar nam 2022 tàm Dà Làc

Dơ̆ coh dŭ ndơl bơh dơ̆ lòt dar coh plai Futsal HDBank dà lơgar nam 2022 geh bơyai lơh bơh bàr mpồl Thái Sơn Bắc mờ Sài Gòn FC tơn jơh, bơnah jai pha geh đah mpồl coh plai Sài Gờn FC mờ khà 3-0. Bè hơ̆, tơn jơh dơ̆ lòt, Sahaco là mpồl coh plai lam lài mờ 20 điểm, pơn jăt tai là 2 mpồl coh plai Thái Sơn Nam mờ Thái Sơn Bắc kung ndrờm geh 15 điểm, Sài Gòn FC 14 điểm. Ơm dŭt ndơl là 2 mpồl coh plai Cao Bằng mờ Tân Hiệp Hưng, ndrờm bal 5 điểm. Jăt Mpồl bơyai lơh coh plai Futsal HDBank dà lơgar nam 2022 yal, bơh ală dar coh plai mờ dar lòt geh bơyai lơh tàm ƀòn dờng Dà Làc pà gŏ, bơta niam bơh ală mpồl coh plai neh gơguh uă rơlao pơn drờm mờ ală kàl coh plai lài. Bơta do pà gŏ, di gơlan geh cèng ală dơ̆ coh plai niam ngan tàm dar rê bơh dơ̆ coh plai do dê geh bơyai lơh tàm ƀòn dờng Cần Thơ nhai 10 tus do.

Cau mblàng Ndong Brawl