VOV4.K’ho- Mho ngai 20/4, tàm ƀòn dờng Pleiku, càr Gia Lai, Ngai chờ Niam chài ală jơi bơtiàn kòn cau dùl êt nă cau càr Gia Lai dơ̆ 1 nam 2022 neh tơn jơh. Tơnơ̆ 2 ngai tus bal ală broă lơh, mờr 800 nă nghệ ñân tus bơh 16 kơnhoàl, thị xã, ƀòn dờng neh cèng tus ƀòn dờng kơh bơnơm Pleiku in nùs nhơm duh hồl ngan, bềng lìu bơta niam chài bơh jŏ. Ală mpồl neh lơh wơl ù tiah ơm kis bơh mpồl bơtiàn dê bơh ală broă lơh: Dròng cing jañ mồng, đơs pơnđik, tamya kòn cau, nhơl phan teh gùng đơs crih kòn cau, ràng tơlik trah mòn rùp dơm chi, tàñ phan mờ gle đơr, tàñ ồi...

Jơh ală phan lơh, broă lơh pơn yơu bơh ală mpồl dê bè hìu rông, hìu ƀồc... ndrờm geh mòn bơh phan geh is bè dơm chi, ja, gle. Mpồl bơyai lơh neh jàu pà ƀằng khen, bồng bi kir sơnrai ai ală mpồl geh cồng nha jak ngan tàm ngai chờ in. Mpồl Nghệ ñân kơnhoàl Chư Păh ai geh khà dùl tơngume đơs pơnđik; mpồl nghệ ñân Pleiku ai geh khà dùl 2 tơngume tamya kòn cau mờ dròng cing jañ mồng; mpồl nghệ ñân kơnhoàl Đăk Đoa ai geh khà dùl tàm gah nhơl phan teh gùng đơs crih bơh jŏ.

Cau mblàng K’Duẩn