VOV4.K’ho- Pơrlòng tàp pràn să jan Đông Nam Á SEA Games 31 tơn jơh mờ dơ̆ bơyai lơh tơn jơh tàm Hìu pơrlòng ntoat tàm hìu Mỹ Đình, Hà Nội mang ngai 23/5 tơnơ̆ 12 ngai pơrlòng ngan ngồn.

                                                              Tơn jơh SEA Games 31

Mờ tơngume “Bơtòm tơrgùm nàng sòl àng- Gather to shine”, broă lơh tơn jơh SEA Games 31 geh tam pà gơs 3 broă lơh. Bơh tờm bơh dơ̆ tơn jơh dê là broă lơh 2 “Bơtòm tơrgùm” mờ dơ̆ cào kơ, dơ̆ lik lòt bơh mpồl 11 lơgar, 40 môn tàp pràn să jan, mpồl trọng tài mờ cau lơh broă dong kờl is dê. Bal mờ hơ̆ là ală rùp hin niam ngan tàm 12 ngai geh lơh SEA Games 31. Bơta tờm tàm broă lơh do là dơ̆ jàu bồng bi đah ala mat Liên đoàn Tàp pràn să jan Đông Nam Á mờ lơgar Việt Nam ai ala mat Ủy ƀan Olympic Campuchia- là lơgar tờm lơh SEA Games 32. Pơrlòng geh 40 môn bal mờ 526 tơngume, geh bơta tus bal bơh 11 mpồl tàp pràn să jan Đông Nam Á, mờ kờp jơh geh mờr 10 rbô nă cau pơrlòng, cau pơlam tàp, kwang bàng, trọng tài. Cồng nha dut dơl, jat ƀàng sap sèng kờp jơh gai lòng bơh Mpồl bơyai lơh pơrlong dê, lơgar tờm lơh pơrlòng là Việt Nam ơm khà dùl ƀàng sap sèng mờ 205 gai lòng biàng, pơn jat hơ̆ là Mpồl Thái Lan mờ 92 Gai lòng biàng, ơm dơ̆ 3 là Indonesia mờ 69 gai lòng biàng.

Cau mblàng K’Duẩn