VOV4.K’ho- Mìng gam dùl êt ngai tai, Pơrlòng tàp pràn să jan Tiah đah jum mat tơngai lik câu Á dơ̆ 31 (Sea Games 31) ngan ngồn mŭt lơh. Sea Games dơ̆ do geh bơyai lơh tàm Hà Nội mờ 11 càr, ƀòn dờng rềp bal, bal mờ bơta tus bal bơh rlau 7 rbô 800 nă cau pơrlòng tàp pràn să jan, cau pơlam tàp pràn să jan, kwang bàng bơh 11 mpồl tàp pràn să jan ală lơgar tàm tiah do dê.

Càr lơgar Hà Nội là ù tiah tờm, tiah bơyai lơh dơ̆ sơnđờm mŭt lơh, tơn jơh 18 môn tàm pơrlòng tàm 14 anih, den tàng bè hơ̆, broă lơh rơcăng geh lơh sơrbac mhar ngan mờ neh lơh sir, rơcăng wă rò dơ̆ pơrlòng. Tàm Bắc Giang, Hìu tàm pơrlòng tàp pràn să jan càr neh lơh sir jơh broă rơcăng ai ală dơ̆ tàm pơrlòng coh plai tơrnò iar Sea Games 31 in bơh ngai 16 tus ngai 22/05 do. Tàm Hải Dương, môn plai kƀàng geh bơyai lơh tàm Hìu tàm pơrlòng càr dê bơh ngai 13 tus ngai 20 nhai 05 do. Càr neh tă priă pơgăp 10 tơmàn đong nàng bơtơl, lơh niam wơl phan bơna tiah hìu tàm pơrlòng. Tàm càr Hoà Bình, broă lơh rơcăng ai môn pơrlòng rơndeh coh Sea Games 31 neh jơh rơcăng. Kwơmàng, tàm Phú Thọ, Hìu tàm pơrlòng tàp pràn să jan càr neh rơcăng ai broă bơyai lơh ală dơ̆ tàm pơrlòng coh plai U23 mờ 3 Sea Games 31 in.

Cau mblàng Lơ Mu K’Yến