VOV4.K’ho- Nàng lơh niam broă drơng broă Sea Games 31 sơnđờm geh bơyai lơh bơh ngai 12/5 do, Tập đoàn Ƀưu Cíñ viễn Thông (VNPT) neh lơh mhar tŭ tơngai crăp phan bơna Viễn thông- măy mok yal tơngĭt jơnau tàm ală tiah geh bơyai lơh dơ̆ tàm pơrlòng. Tus tŭ do, ală broă lơh lồi dŭt gam geh VNPT lơh sir mờ lơh ngui tơrlòng lài nàng drơng broă ai dơ̆ tàm pơrlòng dờng in. Là dùl tàm ală broă lơh tàp pràn să jan lam lài bơh tiah do dê, jat jơnau đơs bơh Mpồl bơyai lơh, kờp dŭ, broă lơh geh gơ hòi gơ jà tus 1 tơmàn nă cau sền bơh anih sơñio rùp mờ tàm internet mờ 1 rơbô 200 jiơ pờ tơlik tơn. Bơta do ai tơlik ală bơta kơn jơ̆ kơn jŭt dờng ngan tàm broă gàr niam phan bơna Viễn thông- măy mok yal tơngĭt jơnau drơng broă ai dơ̆ tàm pơrlòng dờng in.

Nàng lơh niam ai phan bơna Viễn thông drơng broă tàm dơ̆ pơrjum dờng in, VNPT neh crăp tai uă gùng pờ internet mhar mờ ală phan bơna cường sóng 3G, 4G tàm ală tiah tàm pơrlòng tàm Hà Nội mờ 10 càr, ƀòn dờng ndai. Do là ală gùng pờ internet geh lơh kươ màng ai gơnoar pờ jơnau yal tơngĭt mhar, mhar ngan, neh geh sền gròi mờ ngui tơrlòng lài, gàr niam bañ lời gơlik geh bơta gơ kòl nàng kờñ dong kờl uă ngan rlau jơh ai broă sền gĭt cồng nha tàm pơrlòng Sea Games 31 in.

Cau mblàng K’Hạnh