VOV4.K’ho- Kờp tus ngai 25/03, Việt Nam neh geh 6 ngai ờ geh cau bơtờp kòp Covid-19 pa tàm mpồl bơtiàn. Tus tŭ do, lơgar he kờp jơh geh 1 rơbô 601 nă cau bơtờp kòp Covid-19 tài bơh bơtờp kòp tàm lơgar, tàm hơ̆ ală cau bơtờp kòp pa kờp bơh ngai 27/01 tus tŭ do là 908 nă. Kờp jơh cau ơm rềp mờ cau kòp mờ mut bơh tiah kòp gam geh ai ơm yah ngài là 36 rơbô 480 nă. Tàm ală cau bơtờp kòp Covid-19 gam sơm kòp, ală cau bời mờ virus Sars CoV-2 là 120 nă.

Jat broă lơh cĭt sơnơm vaccine pờ ơnàng dà lơgar, tàm ngai 24/03, gùt lơgar geh tai 1 rơbô 906 nă cau geh cĭt sơnơm vaccine kơryan kòp Covid-19. Ngai 24/03, ală càr Quảng Ninh, Tây Ninh, Đồng Tháp neh sơn đờm lam lơh cĭt sơnơm vaccine kơryan kòp Covid-19. Bè hơ̆ tus tŭ do, sơnơm vaccine kơryan kòp Covid-19 neh geh cĭt tàm jơh 19 càr, ƀòn dờng gơwèt tơngai dơ̆ 1.

Cau mblàng K’ Hạnh