Pandik harao saong mboh biak huac nan lac panuac di rilo menuac tuk ndom tal bruk apui khuah ngak brei 5 urang metai saong 2 urang njauk rambuac rah tabiak tuk subuh page harei 21/4 di labik daok tập thể phường Kim Liên, quận Đống Đa (Hà Nội). Gah padam khuah hu mbaok biak samar piah padam pui min dom urang labik khuah nan metai kayua mblung sauk apui dahlau di tuk apui khuah tal. Kadha vak di Mạnh Khánh angaok mbao điện tử di TTXVN hu ndem veik ka bruk nan yau panuac preo khang piah ka abih gauk paglong jang hatai sangka haong apui khuah, abih di nyu lac dalam tuk tabung glong bilan pandiak urak ini:

Hadei di rilo kham marat, tukvak lễ 30/4 saong 1/5 thun ini, ban raya HCM meda ba tame pandar rilo danak dak jalan mbak hu makna praong piah duh ka bhap bini. Urak ini, di dom labik padang ngak, urang ngak daok jar var haong dom bruk puac abih piah ngak salah tui njauk tukvak ba tabiak. Daa mikva saong taong abih gauk pang kadha vak di Hà Khánh, urang vak di rayo sap ndom VN daok di ban raya HCM brei thau ka bruk sami samar ngak bruk di dom danak dak ini:

Anak dom sarau kadhau oh lagaih di darak pasa Trung Quốc ngak ka urang pala thanh long di ĐBSCL gaok kan kandah kayua oh pablei hu atau pablei khat. Yaom lac yau nan, min jeng hu dom Hợp tác xã (HTX) thanh long dang khang kajap, dom urang dalam HTX jeng hu laba. Kadha vak di Ngọc Phúc mangaok mbao SGGP hu ndem ka dom siam lagaih bo urang pala thanh long daok di dom tỉnh dalam ĐBSCL mek hu meng hu mbaok tame HTX, daa mikva saong abih gauk tui pang:

Tui jalan pato bruk ngak pambuak haong caong khin di xã hội saong ba bruk ngak hadei di tuk bac blaoh, Sang bac Cao đẳng Nghề Ninh Thuận tuk halei jeng sangka buh jien tame padang ngak cơ sở vật chất, roh duah ilamo, pandar siam lagaih công nghệ, duah jalan bahrau piah pabak ka bruk pato pakai, tapa nan rik tame bruk pabak manuac ngak hu ilamo glaong, pabak hu siam bruk caong pilih ruah urang ngak dalam tukvak mbiek drei tame dunya. Kadha vak di Minh Triều lac urang pambuak haong danak dak hu ndem ka bruk pato bruk ngak dalam saman 4.0 di Ninh Thuận. Daa mikva saong taong abih gauk tui pang

Bruk khik ramik saong cakrok palei ngak di bhum taneran kraong Cửu Long tukvak tapa hu rik daong oh sit tame bruk paglaong raidiuk, bruk ngak mbang kinh tế di dom tinh, ban. Dom labik, baoh sang, urang ngak saong doanh nghiệp ngak bruk dalam gah palei ngak, bruk ngak palei pala hu rilo kham marat piah cak rok patagok khang kajap dom palei ngak. Kadha vak di Thanh Dũng saong Minh Khởi mangaok mbao Nhân dân hu ndom ka bruk cak rok khang kajap palei ngak di bhum taneran kraong Cửu Long. Daa mikva saong taong abih gauk tui pang.

Tukvak jaik di ini, dom urang nong di huyện Đức Huệ saong huyện Bến Lức, tỉnh Long An ginup meda tagok meng pala rau má – janih phun dahlau daih tamuh ban glai ban klo dalam bein. Yaok ha, urang nong pala rau má laba hu labaih 40 triệu đồng sa vụ. Urang vak Vinh Quang daok di TP.HCM hu kadha vak ndem ka urang nong salih jalan sahneng pala drak tapa bruk pala rau má VietGap.

TP.HCM lac labik ba akaok nao dahlau di taneh ia dalam bruk cak rok patagok kinh tế số. Ban raya ba tabiak jalan ngak lac tal thun 2025, kinh tế số meblah 25% dalam GRDP saong tal thun 2030 lac 40%. Piah ngak hu bruk nan, ban raya hu padang ngak rilo sarak jhul patagok kinh tế số. TP.HCM maong iek bruk patagok kinh tế số lac prein khang cak rok kinh tế dalam tukvak anak tal. Urang vak Lệ Hằng saong Vinh Quang hu kadha vak ndem tal kinh tế số, prein khang patagok di TPHCM:

Ilamu bangsa lac halau gha prein khang di bangsa drei dalam dak padang song khik caga taneh ia, khik caga độc lập bangsa. Kayua yau nan ye, bruk khik ramik song patagok dom yaom glaong ilamu bangsa lac bruk di tong abih menuac urang piah khik ramik hu ilamu siam mekre di bangsa, gam pataom mek dom siam mekre di ilamu menuac sia dunya dalam tuk mbeik drei yam tame. Tapa duah thau 53 bangsa takik jiak di ni brei mboh lac dom cuang kandah ngan song bruk khik ramik ilamu di dom bangsa takik, rilo inem krung saong dom yaom glaong ilamu dok lahik nao. Kadha vak hadei ni di An Nhiên angaok mbao Biên Phòng hu ndom ka bruk ni:

Đồn biên phòng La Êê khik iek labaih 35 km jalan tapen negar, daok dalam 2 xã La Êê saong Chơ Chun, huyện Nam Giang, tỉnh Quảng Nam. Dom urang jakar, urang lin biên phòng tuk halei jeng maong iek “Đồn lac sang, taphia negar lac puk palei di drei, bhap bini bangsa lac adei sa-ai ralow darah” piah daong ka bhap bini patruh eik patrun kathaot, khik kajap quyền ngak po, sron mbon bhum taphia negar. Urang vak di rayo sap ndom VN daok di bhum kreh negar hu kadha vak ndom tal talei rohim di bol bala haong bol bhap rahra labik tapen negar. Da-a mikva saong taong abih gauk tui pang:

Dalam dom mbang rah tabiak dom rija roya di bangsa atau dom harei lễ, Têt…dom palei Cam dui pachreih hu yaok ratuh rabau tuai dalam saong lingiu taneh ia mai ravang mein, duah thau. Tuk mai tal libik ini, tuai oh lac hu ba drei tame raidiuk yaok harei bo daok hu thau cambaih jang ka dom yaom glaong ilimo gheih mekre saong hadah krah di urang Cam Ninh Thuan