Dom harei puac bilan 6, xã Ea Trol, huyện Sông Hinh, tỉnh Phú Yên lac labik pandiak njaom mbak jit ruak ngan haong yaok pluh urang njauk Covid-19. Hadei di 2 bilan, rilo urang ruak lac bhap bani urang bangsa takik hu taong abih ruak. Mai veik palei blaoh salah tukvak brei daok karei, dom urang nan hu pathau khan ka bhap bani drei thau jalan pacang caga jit. Urak ini, bhap bani bangsa takik xã Ea Trol thau klaak dom bruk bhian randap piah padang rai diuk siam mekre bahrau. Kadha vak di Thanh Thắng daok di bhum kreh negar hu khan brei thau ka bruk nan:

Yaom lac jit ruak daok srau kadau, harei tết trung thu oh daok hu bui sambai, chreih chrai, min dalam hatung hatai di dom uranaih jeng daok maong hu raok Tết Trung thu haong melam ia bulan hadah tapen dom menuac anit ranam di drei. Thau hu hatai caong nan, yaom lac raidiuk gaok rilo kan kandah, min Tết trung thu jeng hu rilo menuac di ban Tây Ninh sangka brei ka anek bhik. Kadha vak di Lê Thùy –Ngọc Bích angaok báo Tây Ninh brei thau ka bruk nan:

Urak ini, bruk pablei kaya nong daok gaok rilo kan kandah ngan haong dom tỉnh hu jit Covid-19. Tok hu dom hợp tác xã, kapul pambuak bruk hu jalan pablei kaya nong, daok urang nong biak kan piah pablei hu, daok jien buh tabiak ngak ye tagok jang 3-4 mbang. Meyah gah ngak nong oh hu jalan ngak prong meda gaok rilo cuang kandah kayua bruk pablei pandap meda jaoh jaleih kayua kan kandah di jit ruak. Kadha vak di Phương Hoài- urang vak di rayo sap ndom VN hu ndom ka bruk ini:

Pataom veik bruk daong prein, daong pandap ka bruk pacang caga jit COVID-19 di dom agama dalam tukvak tapa:

Hadei di tuk Giáo hội Phật giáo Việt Nam ba tabiak bruk “taoh ao cà-sa cuk tame ao blouse mbong patih nao pacang caga jit”, tal urak ini hu 1.250 tăng ni, cư sĩ, phật tử halan hatian nao ngak pahla di dom sang iek ruak pacang jit saong daong ka bol bhap rahra di dom labik pacang veik. Dalam labik kan kandah, glaih glar, labik bo bruk metai lahik biak jaik, tuk halei jeng mboh di anak meta, dom urang nan daok rik prein daong ka dom urang ruak yam tapa dom harei kan kandah. Urang vak Hạnh Ý saong Như Danh di Báo Giác Ngộ hu kadha vak ka dom urang Phật giáo halan hatian daong bruk di Sang iek ruak Hồi sức cấp cứu Covid-19 (Sang iek ruak Ung Bướu TP.HCM labik ka 2), da-a mikva saong taong abih gauk tui pang:

Yaom lac rilo tỉnh, ban jeng daok peih bruk pa-atah di gauk, min hadei di tuk peih thun bac bahrau, taong abih dom tỉnh, ban hu ba tabiak jalan ngak ka thun bac bahrau. Oh hu bảng jhuk, phấn mbong patih, di rilo labik, gru pato haong saih bac tok hu taom gaok tapa màn hình phone tangin. Hu biak rilo kan kandah, tavak tavaiy dalam thun bac bahrau, min taong abih gauk jeng kham merat salih jalan pato saong bac, piah ka anek saih yaom lac “padeih tal sang bac min oh padeih bac”. Kadha vak di urang vak Minh Hường:

Hadei di labaih 2 bilan pataom prein tame pacang caga jit, urak ini, bruk ngak iek passport vaccine ka tuai dunya di Phú Quốc, Kiên Giang daok hu caik hatai sangka. Bahrau ini, Rajaei hu pato tacei brei peih ngak meng ini tal puac thun, Phú Quốc meda dui pachreih meng 2-3 triệu mbang tuai negar langiu. Min tal tukvak ini, vaccine brei ka Phú Quốc jeng ka oh pabak hu hatai caong. Bruk tavak tavaiy ini brei hu langyah piah peih bruk rok tuai di bilan 10 anak tal. Kadha vak di urang vak Lam Hiếu hu khan brei thau ka bruk ini:

Dalam tuk jit praong COVID-19 daok rah tabiak sarau kadhau, ngak tui panuac pato tacei di Thủ tướng Rajaei, di mBan tacei pato pacang caga jit COVID-19 saong Mintri Quốc phòng, Bhum 4 Hải quân brei parilo dom kapul, daong dom pandap panda kaya mbang tal dom labik drei hu mbaok. Gam haong nan, dom kapul meng mbaok haluk tal pulao atah peih ngak catang dom bruk pacang caga jit, khik salamat meng gah tasik saong ngak hu siam dom bruk caga mesuh. Kadha vak di urang vak Thu Lan:

Piah daong khik caga dom jak jeng dalam bruk pacang caga jit, tukvak tapa, langiu di patagok bruk ngak di dom kapul eng drei khik ramik, dom palei Cam daok hu jak ba dom urang hu angan je, dom halau janeng hu mbaok tame pathau khan ka dom but pajaih, dom baoh sang ngak catang dom bruk pacang caga jit, ba tangin tame saong puk palei khang hatai khik caga bhum hijao. Kadha vak di Minh Trieu, urang pambuak bruk saong rayo sap ndem VN:

Tui pathau khan di dom tinh, bal, kuhria tal puac bilan 8, hu jaik 12 ribau ranaih lac F0, 27 ribau ranaih lac F1, daok taong ruak, brei daok karei piah pacang caga njom mbak COVID-19, gam saong nan hu yaok rituh ranaih laih tame matui ame, matui amaik kayua njauk Covid 19. Oh hu iek glang meng amaik ame, gauk gar ngak brei dom adei mboh biak pandik harao hatung hatian. Kadha vak di Kim Thanh hu ndem tal bruk ini: