VOV4.K’ho- Ală ngai do, cau lơh broă sa tàm càr Gia Lai gam mŭt tàm kàl tờm pik plai tiêu. Tơnơ̆ uă nam muăt jrùm ngan tài bơh kòp bơtờp mờ tăc ờ yòm, tŭ do tiêu geh tam jăt gùng dà kơ̆ kơl jăp jŏ jòng, hơ pơrgon lơh geh priă cồng ai cau tam in.

Hìu bơnhă mò Nguyễn Thị Lệ Thu ơm tàm thôn 3, xã Nam Yang, kơnhoàl Đăk Đoa, càr Gia Lai geh 5 lồ 5 sào tiêu gam tàm tơngai gơ ai sa. Mò Thu pà gĭt, lơh gơlik tiêu hữu kơ, hìu bơnhă lời ñhơ̆t hòn is tàm sươn nàng gơ in lơh geh bơta rài snồp, mơkung dong lơh gàr niam bơta sùh iò ai ù in. Phơng hoá họk ờ huan ngan ơn, ala tàm hơ̆ là mìng ơn phơng ề kơnrồ neh ồm lề mờ nsồp khuah jơm lề bal mờ kơmhò kơphê; sơnơm hoá họk kung geh ala mờ ală cế phẩm sinh họk sơl. Ală broă tam phan pal cih pah ngai tàm sră pơ àr lơh sa nhai kàl. Tàm khăt tơngai lơi, mpồl lơh sa kă bro blơi geh lòt tus hờ sươn ai khăt dùl bơta nha, plai tiêu lơi. Dilah nha mờ plai khăt ai hơ̆ lơh geh tơl jơnau sồr den phan bơna tiêu hìu bơnhă dê geh blơi mờ giă jơnhoa rlau mờ giă tàm drà 30%. Mò Nguyễn Thị Lệ Thu pà gĭt, kàl lơh tiêu do, sươn chi gơ ai cồng nha pơgăp 3 tấn nggùl tàm dùl lồ. Cồng nha lơyah rlau mờ lài, mơya mờ giă tăc gơguh tus 110 tơlak đong dùl tấn, den priă cồng gơ jơnhoa rlau. Mò Nguyễn Thị Lệ Thu yal: Ală nam pa do, giă tăc bro ờ niam ngan, drà kă bro ờ gŏ kơ̆ kơl jăp. Cau lơh broă sa kal ke ngan. He lơh ngan sơrlèt gan, bơcri dùl êt ală phan ờ duh kờñ pal geh. He sac rwah jăt gùng hữu kơ nàng sơrlèt gan bơta kal ke gơ in niam. Kung bơtuah đau sơl là nam hơ̆ añ lơh bal geh mờ Kông ty Hương Gia Vị Sơn Hà blơi tiêu hữu kơ tăc mờ câu Âu. Gơ niam ai he in mơkung gơ niam sơl ai kông ty in, niam ai pràn kơldang să jan ală cau lơh ai he in mờ niam ai tiah ơm kis in.

Hìu bơnhă mò Thu gam pik plai tiêu hữu kơ

Kung kơnờm tam tiêu jăt gùng dà kơ̆ kơl jăp jŏ jòng mờ Hợp tak xã Drơng broă mờ Lơh broă sa sươn sre Nam Yang, kơnhoàl Đăk Đoa ờ mìng sơrlèt gan tŭ tơngai kal ke mờ gam lơh geh măt kă bro phan Tiêu Lệ Chí lòt tăc tus drà dunia. Ồng Nguyễn Tấn Công, Kwang ătbồ Mpồl duh broă ătbồ kă bro pà gĭt, hợp tak xã geh 80 lồ tiêu gam tàm tơngai gơ ai sa, uă ngan lơh gơlik tiêu lơh geh tơl jơnau sồr tăc mờ ală lơgar geh jơnau sồr kal ke ngan bè bơta niam. Bal mờ broă tăc tiêu ờ hềt lơh gơs phan niam, hợp tak xã neh lơh is geh ală phan bơna tiêu jù, tiêu tơngoh, tiêu pram dà. Tàm hơ̆, bàr pe phan bơna neh geh sră cơng tàng OCOP 4 sơrmañ. Ồng Nguyễn Tấn Công yal: Bơh dơ̆ kòp lơh aniai kơn jơ̆ ngan mờ giă tăc bro ờ niam ngan tàm nam 2017, nam 2018 mờ nam 2020, làng bol lơh broă sa bol añ kơrhia ngan, lơh jăt tam tàm bơrlŭ bal, ờ tam dùl tờm chi, ờ gŏ tam ur ar bè lài. Pơlam gùng dà bơh bol añ dê mờ cau lơh broă sa dê là tam phan kơ̆ kơl jăp jŏ jòng, tam phan ù tiah ƀòn lơgar brê bơnơm, hữu kơ, wèt tus kơ̆ kơl jăp jŏ jòng bè tiah ơm kis, bè priă lơh geh mờ bơta kơ̆ kơl jăp bơh sươn chi dê.

Tơnơ̆ 2 nam lam lơh, broă lơh “Lơh mờ rề ơnàng sơngka sền gàr tiêu kơ̆ kơl jăp jŏ jòng” tàm kơnhoàl Đăk Đoa, càr Gia Lai neh dong làng bol tam gơl broă tam phan, sơlơ ngui phơng sih hữu kơ, tơrmù phơng sih hoá họk mờ sơnơm sền gàr phan tam nàng sươn chi in kis dờng kơ̆ kơl jăp jŏ jòng. Bơh sơnrờp broă lơh neh lơh geh cồng nha, pờ gơlik gùng lòt pa ai cau tam tiêu in. Anih tờm dong kờl bơto pơlam lơh broă sa sươn sre càr Gia Lai neh pơgồp bal mờ Kông ty Kổ phần bơcri priă mờ bơ̆t bơtàu Trường Thịnh gam hòi là Kông ty OLAM tìp măt cribơyai mờ ală hìu bơnhă làng bol neh tơlik măt mpồl lơh broă bal lơh gơlik tiêu tàm 2 xã: Nam Yang mờ Hải Yang. Bè đah Kông ty OLAM kung neh kĭ sră hơ blơi jơh phan bơna mờ ală mpồl lơh bal nàng kờñ gàr sùm dră tăc phan ai làng bol in. Tơnơ̆ 2 nam lam lơh broă lơh do, priă lơh geh bơh làng bol dê gơguh rlau 15% pơndrờm mờ lài do. Tơnơ̆ tŭ tơn jơh rơndăp broă lơh, ală tiah pal sồr anih lơh broă geh gơrềng lơh pràn mblàng yal, bơto pơlam cau tam tiêu rề ơnàng lơh uă broă lơh, pơgồp bơnah kơ̆ kơl jăp bă ù jăt rơndăp ù tiah bơh Ủy ƀan Ñân zân càr dê.

Hợp tak xã Drơng broă mờ Lơh broă sa sươn sre Nam Yang sơrlèt gan dơ̆ giă tăc ờ yòm ngan

Ồng Đoàn Ngọc Có, Phó Kwang ătbồ Sở Nông nghiệp mờ Phát triển Nông thôn càr Gia Lai pà gĭt, tŭ do, kờp jơh bă tiêu tàm càr Gia Lai là 13 rbô 600 lồ. Cồng nha lơh geh kàl do kờp bal geh 3 tấn 3 tạ 7 tàm dùl lồ. Bă ù tam tiêu geh gàr kơ̆ kơl jăp bơh tơnơ̆ dơ̆ gơbàn kòp chơ̆t mhar, chơ̆t lơyài nam 2017- 2018 tus tŭ do, tàm ală tiah ù tiah gơdờp mờ geh tam jăt gùng dà kơ̆ kơl jăp jŏ jòng. Bơta chờ hờp là 2 nam do, giă tiêu gơguh jơnhoa bơh 75 rbô tus rlau 80 rbô đong dùl kĭ, mơya ờ geh jơnau kơl sơrbì tờm chi tam ndai nàng tam tiêu ur ar. Ồng Đoàn Ngọc Có đơs là, broă kơrhia bơcri priă mờ tam gơl gùng dà tam tiêu hữu kơ neh dong cau lơh broă sa lơh geh priă jền sùm. Ồng Đoàn Ngọc Có, đơs: Bă tiêu lài do neh geh tam gơl tus chi tam ndai nàng cèng wơl cồng nha uă rlau. Ai jơh ală bă tiêu gam wơl tŭ do geh bơtàu tơnguh kơ̆ kơl jăp jŏ jòng, geh tam gơl tus gùng dà lơh sa jăt gùng dà jăt tơl jơnau sồr, kơ̆ kơl jăp jŏ jòng mờ kung neh tơrmù uă bơta tu kòp lơh aniai tàm chi tam. Pơnyơu bè kòp chơ̆t mhar, chơ̆t lơyài, bă tiêu bơtờp kòp ờ uă. Kơnờm bơh hơ̆ mờ cồng nha lơh geh mờ tiêu lơh geh sùm.

Cau cih Nguyễn Thảo- Cau mblàng Lơ Mu K’Yến