VOV4.K’ho- Nàng kờñ gàr niam, tơnguh cồng nha lơh sa, tơnguh khà lơh geh gah lơh sa suơn sre tàm tŭ tơngai kong gơ rềng tài bơh kòp Kovid-19, càr Lâm Đồng gam tơrgùm chồl pràn broă lơh bal tam, lơh gơlik mờ tac phan lơh gơs bơh suơn sre ai cau lơh broă sa in. Lâm Đồng tŭ do geh rlau 180 ròt mpồl lơh bal tam gơ jat bal mờ tac ală bơta phan bơh suơn sre mờ mờr 18 rbô 400 hìu bơnhă lơh broă sa tus bal. Kơnờm bơta lơh bal do, 520 rbô tấn phan bơh suơn sre ală bơta bơh cau lơh broă sa dê tàm nam pa do neh gàr kơ̆ kơljap bè anih blơi phan lơh gơs.

Càr Lâm Đồng tơlik jơnau kờñ tơnguh khà ròt mpồl lơh bal lơh sa gơguh tus 200 mpồl tàm nam do, mờ bơta tus bal bơh rlau 20 rbô hìu bơnhă lơh broă sa mờ khà phan bơh suơn sre tac geh rlau 600 rbô tấn. Nàng gơtùi lơh geh jơnau kờñ do, càr geh tơrgùm lam lơh uă broă lơh dong kờl nàng bơtàu tơnguh ală broă lơh Hợp ták xã, mpồl lơh sa kă bro dềt mờ di mơ, pơn jat tai dong kờl cau lơh broă sa ngui ală broă lơh tam phan pa tơnguh bơta niam mờ khà lơh geh phan bơh suơn sre.

Cau mblàng K’Duẩn