VOV4.K’ho- Tềng đăp ală bơta gơrềng bơh kòp Kovid-19 dê, lơh broă lơh sa mờ kă bro tìp uă ngan kal ke, bi Y Pôt Niê là cau Rơđê, bi là dùl nă klau pơnu lơh sa kă bro ơm tàm ƀòn Kla, xã Drai Sap, kơnhoàl Krông Ana, càr Dăk Lăk neh rơcăng lài jòi gùng lòt pa nàng gơdờp bal. Y Pôt neh khin cha tam gơl sồ mờ ngui măy mok tàm broă lơh sa, jơh nùs tus bal tàm ală drà kă bro điện tử nàng pờ ơnàng drà kă bro phan bơna. Kơnờm bè hơ̆, bulah tàm tơngai gơbàn kòp, priă lơh geh bơh lơh sa kă bro bơh kông ty dê kung gam lơh geh sùm sơl.

Lơh gơs ală broă dŭt ndơl lài mờ tŭ tăc bơnah phan bơna pa ai năc blơi phan in tàm ƀòn dờng Hồ Chí Minh mờ Hà Nội, bi Y Pôt Niê, Kwang ătbồ Kông ty Trách ñiệm Hữu hạn Rơđê Kơphê, ơm tàm ƀòn Kla, xã Drai Sap, kơnhoàl Krông Ana, càr Dăk Lăk pà gĭt, do là ală sră dan blơi phan dŭt ndơl bơh kông ty dê lài mờ tŭ sa tềp bơhiàn Ñâm Zần. Tơn jơh wơl dùl nam kal ke tài gơrềng bơh kòp Kovid-19 dê, kông ty kung gam lơh geh ală cồng nha pal pơn jờng ngan tŭ kĭ geh 4 sră pơrgon tăc phan mờ lơgar ndai uă ngan bal mờ rlau 40 tấn kơphê robusta. Bal mờ hơ̆, kông ty neh bơceh lơh gơlik geh 3 bơta phan bơna pa là kơphê klài lề ƀô bùm trau, ƀô sầu riêng, mờ kơphê klài lề 3 tàm 1. Bi Y Pôt Niê đơs là, tàm bơta kal ke bơh kòp bơtờp dê, broă kơlôi tus ală drà kă bro pa, ală drà kă bro điện tử ngan là gùng lòt dipal nàng dong khà tăc bro bơh kông ty dê geh sùm. Bi Y Pôt Niê, đơs: Añ gŏ là, tàm tŭ kòp bơtờp bè tŭ do, den broă lơh sa kă bro tìp uă ngan kal ke. Mơya, să tờm añ kung gam sùm sùm jòi ală drà kă bro pa bơh facebook, alibaba, Sen đỏ, shopee, tiki nàng jòi drà kă bro mờ pờ ờ nàng broă kă bro.

Bơh broă gơdờp bal ngac ngar tàm broă lơh sa kă bro, tàm nam lài, priă lơh geh bơh lơh sa kă bro bơh kông ty Trách ñiệm Hữu hạn Rơđê Kơphê dê tàm nam lài geh rlau nggùl tơmàn đong, lơh geh broă lơh sùm ai 10 nă cau lơh broă in, bal mờ priă nhai geh sùm bơh 5 tus 7 tơlak đong pah nhai, tă pơgồp ai kes priă dà lơgar in mờ ală broă lơh ờdo ờdă rài kis mpồl bơtiàn in mờr 100 tơlak đong. Y Pôt Niê yal, sơrlèt gan 4 nam lơh broă lơh gơlik mờ kă bro kơphê, kông ty sùm ơn bơta niam phan bơna là broă jàu khà dùl. Să tờm Y Pôt kung lơh jăt jơnau kờñ ngan lơh kơphê sàng goh sơnđan măt kă bro bơh làng bol he dê. Den tàng bè hơ̆, bơh dì tŭ pa crơng gơs kông ty tơn, bi neh lơh sră cih mat dan sền gàr ală phan bơna sơnđan măt kă bro “Kơphê Rơđê”. Tàm broă lơh bơ̆t bơtàu măt kă bro ai phan lơh geh bơh sươn sre lơh geh bơh ƀòn lơgar do in, kông ty kơ̆ nùs mờ bơta pal jăt tam kơphê sàng goh mờ coh kơphê mờ tê lơm, tàm hơ̆ geh bàr bơta kơphê tờm, là kơphê coh mờ lòng lơh mờ tê mờ kơphê coh mờ măy, lơh jăt ală jơnau sồr bè ờdo ờdă kloh niam phan sa. Bal mờ hơ̆, nàng lơh geh jơnau kờñ bơh drà kă bro dê, kông ty kung rơhời jòi lùp tơrlòng lơh ală phan bơna pa, iăt kơno ală jơnau đơs tă pơgồp bơh năc blơi phan dê nàng lơh gơs ngai sơlơ niam rlau ală phan bơna tŭ do gam geh. Kơnờm bè hơ̆ mờ tus tŭ do, phan bơna Rơđê Kơphê neh geh tăc tàm 54 càr mờ ƀòn dờng tàm lơgar mờ tăc geh mờ drà kă bro ală lơgar, bè: Malaysia, Mông Cổ, Lo. Bi Y Pôt Niê yal: Să tờm añ neh sơrlèt gan uă nam kă bro, bơh dùl nă cau bơsram gah lơh sơnơm neh sang tĕ broă lơh neh bơsram nàng lòt jăt broă kă bro kơphê. Mơya mờ bơta jơh nùs lơh ngan mờ pơđơl pràn sùm, jòi lùp mờ lùp bơsram is bơh làm bă tiah mờ tus tơngai do den kung neh lơh geh đau dùl êt cồng nha sơl.

Tàm nam lài, phan bơna kơphê rubusta gar mờ robusta ƀòk bơh Rơđe Kơphê dê neh geh jờng rơ là phan bơna lơh sa mờ măy mok ƀòn lơgar pơnrơ càr Dăk Lăk dê mờ geh dờp sră cơng tàng phan bơna 4 sơrmañ OCOP càr dê. Tŭ do, kông ty gam tàm ală tŭ tơngai lơh gơs sră nggal mờ rơndăp lơh kơldung prăp phan nàng rơcăng ai bơnah phan tăc tus drà lơgar Nhờk in, digơlan geh lơh tơn tơnơ̆ ngai sa tềp bơhiàn dà lơgar Ñâm Zần. Bal mờ hơ̆, tơnơ̆ ngai sa tềp, kông ty geh pơn jăt tai cribơyai nàng tăc tai ală bơnah phan tus bàr pe dà lơgar ndai. Bi yal: Tơnơ̆ ngai sa tềp, den añ geh tăc kơphê tus bàr pe lơgar bè Singapore mờ Hongkong. Den tàng bè hơ̆, kờñ đơs tus mờ jơh ală bơyô kơnòm să là cau Rơđê gam lơh ngan pơđơl pràn brồ guh tàm bă ù Dăk Lăk do tơn, tơl nă he kờñ pal tơryăng tơryồng, jơh nùs lơh ngan mờ pơđơl pràn, nàng tơl phan bơna he dê lơh gơlik geh đau anih mờ bơngă ngan ngồn tàm drà kă bro.

Tàm tŭ kòp Kovid-19 lơh gơrềng ờ niam ngan lơh tus broă lơh sa, kă bro tìp uă ngan kal ke, kông ty Trách ñiệm Hữu hạn Rơđê Kơphê bơh cau lơh sa kă bro kơnòm să bi Y Pôt Niê dê kung gam geh sơl gùng lòt ngac ngar dipal nàng gàr sùm broă lơh sa. Mờ bơta kờñ ngan lơh jăt ală phan bơna cèng măt kă bro bơh làng bol kòn cau he dê, klau pơnu Rơđê lơh sa kă bro gam pơn jăt tai lơh ngan nàng ai măt kă bro phan Rơđê Kơphê tus mờ uă rlau drà kă bro tàm lơgar mờ lơgar ndai, pơgồp bơnah đơs nền bơta niam phan bơna kơphê geh lơh gơlik tàm tiah do dê.

Cau cih H’Xíu- Cau mblàng Lơ Mu K’Yến