VOV4.K’ho - Drim òr (11/02), tàm Hà Nội, Ƀộ Nông nghiệp mờ Phát triển Nông thôn bơyai lơh pơrjum pờ tơlik tàm internet gùt lơgar bè broă rơcang sơndră mờ kòp tàm phan ròng mờ phan tàm dà nam 2022. Nam 2021, phan geh lơh bơh phan ròng gơguh rơlao 4% pơn drờm mờ nam 2020, mơya geh ờ uă kòp ngòt rơngơ̆t tàm nam pa do gơtìp neh lơh hoàc huơr bè lơh sa rơlao 2 rơbô 500 tơmàn đong.

Ƀộ Nông nghiệp mờ Phát triển Nông thôn kung neh ai ală càr, ƀòn dờng in git nđờ jơ̆t rơbô ding sơnơm vaccine mờ ală bơta hoá cất rơcang sơndră mờ kòp tàm phan ròng bal mờ phan tàm dà. Jăt jơnau đơs bal, nam 2022, kòp gơtờp tàm phan ròng mờ phan tàm dà di gơlan gơtìp uă. Den tàng, tàm pơrjum, ală kwang bàng cri bơyai bè broă lơh jăt ală broă sền gròi ală bơta kòp gơtờp ngòt rơngơ̆t tàm phan ròng mờ phan tàm dà nàng ai geh bơta ƀuơn tàm broă ròng tai, tơnguh mpồl phan ròng, gàr niam khà geh ai phan sa mờ drơng tàm broă tăc phan mờ lơgar bơdìh.

Cau mblàng Ndong Brawl